Einstakt starf

Það er með sanni hægt að segja að Páll Helgason tónlistarmaður og kórstjórnandi í Mosfellsbæ hafi unnið einstakt starf í þágu tónlistarinnar í Mosfellsbæ.

Páll hefur um árabil stjórnað fjórum kórum í bæjarfélaginu. Álafosskórnum, Vorboðum, kór eldriborgara, Mosfellskórnum og Karlakór Kjalnesinga.

Í kringum Palla Helga og allt hans starf ríkir alltaf einstaklega góður andi.

Góðir gestir hér kemur Karlakór Kjalnesinga með lag af nýútkomnum geisladiski sem ég skora á alla að eignast.

Mútuþægni ?

"Varmársamtökin verða að gegna hlutverki sérstaks saksóknara eða Evu Joly hér í Mosfellsbæ við sveitarstjórnarkosningar á næsta ári. Vera leiðandi um opna og heiðarlega umræðu þar sem sitjandi stjórnvöld þurfa að verja gjörðir sínar."

Þetta skrifar Gunnlaugur B Ólafsson fyrrum formaður Varmársamtakanna á síðu sinni í gær. Draumar Gunnlaugs um stöðu Varmársamtakanna hér í bæ eru ekki nýir af nálinni og svo sem ekkert við þeim að segja, hverjum og einum er hollt að láta sig dreyma, það má bara ekki gleymast að draumar geta verið fallvaltir.

Það sem vekur hinsvegar furðu mína við þessi skrif Gunnlaugs er eina athugasemdin sem komin er við þau. Það er athugasemd skrifuð af Arnþóri Jónssyni og þar segir:

"Aðrir í stjórn hafa hagað sér eins og gera má ráð fyrir á meðan Karl Tómasson forseti bæjarstjórnar hefur svikið kjósendur sína og selt verktökum hugsjónir sínar fyrir smáaura."

Nú er mér nóg boðið og fer ég fram á það við Arnþór og Varmársamtökin í heild sinni að þau útskýri á ábyrgan hátt afhverju ég sæti stanslausum ásökunum af hendi meðlima samtakanna um að ég þiggi mútur í einni eða annarri mynd. Skemmst er að minnast hamagangsins sem Ólafur í Hvarfi var með hér á síðunni minni vegna þess sem hann kallaði mútuþægni bæjarstjórnar og vildi gera mig ábyrgan fyrir að sú meinta mútuþægni viðgengist enn.

Einnig er vert að minnast orða Snorra Freys Hilmarssonar formanns Torfusamtakanna um mútuþægni bæjarfulltrúa í Mosfellsbæ gagnvart verktökum og fór ekki á milli mála að í þeim orðum átti hann við mig. Aðspurður sagðist hann hafa þetta eftir fólki í Mosfellsbæ en hann var ófáanlegur til þess að nefna það fólk á nafn. Hvað kemur formanni íbúasamtaka í öðru sveitarfélagi til að staðhæfa á þennan hátt um það hvernig málum er háttað í öðrum bæjarfélögum, nema hann hafi það frá einhverjum sem hann telur skothelda heimildarmenn? Það þarf ekki sérfræðing til þess að sjá tengslin á milli Torfusamtakanna og Varmársamtakanna og hvaðan Snorri hafði sínar heimildir.

Arnþór Jónsson, fyrrum íbúi Álafosskvosar, sem af einhverjum ástæðum flutti ekki bara úr Kvosinni heldur einnig bæjarfélaginu fyrir mörgum árum, sér sig nú knúinn til þess að skeiða fram á ritvöllinn með þessar ásakanir. Álafosskvosin er okkur öllum hugleikin, en að hún sé notuð sem skálkaskjól til handa fólki sem á í erfiðleikum með sjálft sig og þarf að taka það út á öðrum, er ekki samboðið Álafosskvosinni.

Það er ágætt að fyrrum formaður Varmársamtakanna láti sig dreyma um framtíð samtakanna en honum væri nær að beina orðum sínum um opna og heiðarlega umræðu inná við til samtakanna sjálfra til að byrja með og sjái til þess að samtökin geri hreint fyrir sínum dyrum. Því alltaf ber allt að sama brunni - Varmársamtökin eru það eina sem það fólk sem ásakar mig um mútuþægni og sér ástæðu til þess að halda úti bloggsíðum sem innihalda níðskrif í minn garð undir nafnleynd eiga sameiginlegt, bloggsíðum sem öllum hefur verið lokað vegna óhroðans.

Alltaf ber nafn Varmársamtakanna á góma og aldrei hafa samtökin séð sóma sinn í því að virkilega hreinsa af sér þessi tengsl og upplýsa hvað raunverulega er í gangi. Opin og heiðarleg umræða Varmársamtakanna ætti m.a. að fela í sér að gera allt sem í þeirra valdi stendur að upplýsa hvaðan einelti og skítleg framkoma í garð samborgaranna er komin. Sérstaklega þegar sú umræða virðist alltaf eiga rætur sínar innan samtakanna eða í tengslum við þau!!!

 

Arnþór - útskýrðu mál þitt!!! Ég krefst þess að þú sannir orð þín og sýnir fram á svo sannanlegt sé að ég hafi selt verktökum hugsjónir mínar fyrir smáaura.

Ég vil benda þér að tilhæfulausar ásakanir af þessu tagi varða við lög.

 

Sjáumst á ný

Birgir, vinur minn, Haraldsson, var rétt í þessu að færa mér sjóðheita sína fyrstu sólóplötu beint úr masteringu. Hljómplötu sem hann og Þórir Kristinsson, textahöfundur Gildrunnar, hafa verið að vinna að undanfarin þrjú ár.

Hljómplatan, sem ber heitið, Sjáumst á ný er sérlega falleg og hugljúf. Hún snertir í manni alla strengi, bæði lög og textar.

Þessi fyrsta sólóplata Bigga er einstaklega persónuleg og einlæg. Biggi hefur óspart leitað til vina og kunningja við gerð hennar og má þar nefna, Sigurdór, bróðir hans sem leikur á bassa, Mána, gítarleikara og Frikka bassaleikara úr 66 ásamt fleiri skildmennum og vinum sem koma að verkefninu. 

Ég hef  einnig verið svo heppinn að fá að taka þátt í þessari plötu þeirra félaga, Bigga og Þóris allt frá byrjun og því fylgst með hugarfóstrinu verða að fullmótuðu verki.

Mikið getið þið kæru vinir, Biggi og Þórir, verið stoltir af þessari plötu. 

Einnig hefur vinur okkar og samstarfsfélagi úr Gildrunni, Sigurgeir Sigmundsson, sannarlega lagt sitt af mörkum við gerð plötunnar. Hann á undurfallegt lag á henni ásamt því að leika á gítara og fleiri hljóðfæri.

Þórir minn. Takk fyrir að koma því á framfæri hér í athugasemd þinni við þessa færslu mína að gleyma ekki Jóa Ásmunds. Hér með er það gert.  

Jói hefur sannarlega lagt sitt af mörkum, það er nú annaðhvort.

Það er ómetanlegt að hafa fengið tækifæri til að starfa svo náið og lengi með jafn stórkostlegum hljóðfæraleikara og tónlistarmanni eins og honum.

Elsku Biggi minn og Þórir. Innilegar hamingjuóskir með frábæra plötu, sem er ykkur sannarlega til sóma.

 

Eiríkur Hauksson 50 ára 4. júlí

Nú er ljóst að söngvarinn góðkunni, Eiríkur Hauksson mun halda upp á 50 ára afmæli sitt með stórtónleikum á Íslandi þann 4. júlí.

Eins og flestum er kunnugt, hefur hann um árabil búið í Noregi og getið sér þar góðs orðs, rétt eins og á Íslandi.

Eiríkur er frábær söngvari það vitum við öll. Upp úr stendur þó, sá einstaki ljúflingur og góða manneskja sem hann er.

Leiðir okkar lágu saman þegar hann, ásamt Pétri heitnum Kristjánssyni, voru í hljómsveitinni Start árið 1981. Þá tókum við okkur saman, hljómsveitirnar Start og Pass úr Mosfellsbæ eins og við kölluðum okkur þá og spiluðum um verslunarmannahelgina í Félagsgarði Kjós. 

Gildran og Start á góðri stundu

Kapparnir úr Start, sem naut mikilla vinsælda um þær mundir, tóku okkur sveitamönnunum úr Mosó opnum örmum. Sú vinátta hefur varað alla tíð síðan, einlæg og góð. 

Seinna gekk Sigurgeir, gítarleikari Start, til liðs við Gildruna eftir að Startararnir lögðu upp laupana.

Mikið verður gaman að fagna með Eika og öllum vinum hans á flottum tónleikum í Austurbæ þann 4. júlí og að þeim loknum í skemmtilegri veislu.

Eiki Hauks, Kalli Tomm og Pétur Kristjáns. Þarna heldur Pétur á uppáhalds plötualbúmi sínu, saumaða albúmi Gildrunnar.

Gildrumezz ásamt Eika. Myndin er tekin fyrir tónleika á Akureyri.

Billi Start og Kalli Tomm á Álafoss föt bezt í Mosó. Billi var um árabil helsti aðstoðarmaður og vinur félaganna í Start og seinna okkar félaganna í Gildrunni.

Ísland á vísa rað

Strákurinn minn og stelpan mín og strákurinn þinn og stelpan þín og börnin þeirra skulu fá að greiða fyrir þessa "snillinga" og þjófa alla, þegjandi og hljóðalaust næstu áratugi.

"Snillinga" sem voru svo færir, að sjálfsagt virtist að þeir fengju 500 milljónir í mánaðarlaun eða einfaldlega fyrir að hætta eða byrja í vinnunni sinni.  

Nýjustu fréttir benda til þess að þetta sé lendingin. Icesave lendingin

Það er ekki hægt að sætta sig við það, aldrei, aldrei, aldrei!!!

Skemmtilegur dagur í Varmárskóla

Birnan okkar var ásamt öðrum nemendum Varmárskóla útskrifuð í dag.

Það var líf og fjör í Mosó í dag.

Þetta er ein af mínum uppáhalds

Og eftir hvern er nú myndin?

Gamlar myndir frá Álafossi

Þegar við bræður og konurnar okkar opnuðum veitingastaðinn Álafoss föt bezt, fengum við margar skemmtilegar myndir frá Ingunni Finnbogadóttur, ekkju Ásbjörns Sigurjónssonar, fyrrverandi forstjóra Álafoss. Erum við henni ávallt þakklát fyrir það.

Ekki alls fyrir löngu var mér færð gömul mynd úr kvosinni sem ég hafði ekki séð áður og ég set hér inn í tvennu lagi þar sem hún var full stór til að geta notið sín á annan hátt.

Glöggir lesendur eiga auðveldlega að geta áttað sig á hvar hún er tekin í sundur hjá mér.

Gefum stjórnvöldum tækifæri

Öllum má ljóst vera að efnahagshrun okkar Íslendinga er meira en nokkru sinni fyrr og alvarlegra en víðast hvar þekkist í heiminum.

Okkur var rænt af fáeinum kverúlöntum sem þáverandi stjórnvöld töldu vera að koma okkur í hæstu hæðir efnahagslífsins. Þau dönsuðu sem aldrei fyrr með "snillingunum" sem sjálfsagt þótti að fengju 300 milljónir á mánuði eða 500 milljónir fyrir að hætta eða byrja í vinnunni sinni.

Ég er á þeirri skoðun að við verðum að gefa núverandi stjórnvöldum, sem aðeins hafa haft nokkrar vikur, meira svigrúm til að leysa vandann, áður en við blásum í lúðrana og hefjum skipulega andúð á starfi þeirra.

Ég átti ekki til orð að heyra í Bjarna Benediktssyni, formanni Sjálfstæðisflokksins, í Kastljósinu í kvöld þar sem hann m.a. furðaði sig á því að ekki hefði mátt gera hagræðingar í heilbrigðiskerfinu.

Á sama tíma furða flokksfélagar hans og fleiri stjórnmálamenn sig á aukinni álagningu á áfengi og tóbaki hjá núverandi stjórnvöldum.

Ég spyr. Hvar á að byrja að skera niður, eða hvar á að byrja að leggja skattana?

Eitthvað þarf að gera. Við verðum að koma okkur upp úr þessum vanda. Öll saman.

Öllum má ljóst vera, að ráðamenn þjóðarinnar vinna daga og nætur til að finna lausn á vanda okkar og ég hef það frá fyrstu hendi, að Steingrímur J. Sigfússon, hafi unnið nánast allan sólarhringinn, frá því að hann tók við embætti sínu sem fjármálaráðherra.

Það eru fá dæmi um að ráðherrar hafi verið jafn fúsir og hann að koma ávalt í viðtal þegar beðið er um til að greina frá stöðunni. Það ber að virða við hann.

Verum sanngjörn þrátt fyrir erfiða tíma hjá okkur öllum.

Gefum stjórnvöldum tækifæri í a.m.k. nokkrar vikur í viðbót.

Bíðum með pottana og pönnurnar í nokkrar vikur.

Fyrrverandi ráðamenn þjóðarinnar fengu 18 ár og skiluðu þessu búi til okkar sem við erum nú að fást við og súpa seyðið af.

 

Ringó var snillingur

Hlustið á trommuleikinn og hi hat sláttinn á þremur og hjá Ringó.

Einfaldleikinn skilar sér alla leið í þessum trommuleik og litar lagið sannarlega.

Hann var sérlega músíkalskur og skemmtilegur trommuleikari hann Ringó.