Klara Klængs

Á fimmtudaginn kemur, 19. apríl, (sumardaginn fyrsta) verður vígð ný sundlaug í Mosfellsbæ. Sérstakur heiðursgestur við athöfnina verður Klara Klængsdóttir en hún synti vígslusundið í Varmárlaug 17. júní árið 1964.

Nú 43 árum síðar vígir Klara okkar nýju sundlaugina á vestursvæði Mosfellsbæjar við hátíðlega athöfn. Það verður einstaklega gaman að sjá Klöru endurtaka leikinn. 

Klara Klængsdóttir var kennari við Brúarlandsskóla og síðar Varmárskóla um áratugaskeið. Hún var ákaflega farsæll kennari sem að allir elskuðu. Bæði samstarfsmenn hennar og nemendur. Klara hefur sennilega kennt fleiri Mosfellingum að lesa en nokkur annar. Hún hefur sennilega líka og án vafa með góðmennsku sinni, ástríki og lítillæti fengið margan til að átta sig á hvað þarf til að öðlast hamingju.

Ég skora á alla Mosfellinga að fjölmenna við vígslu nýju sundlaugarinnar. Á myndinni má sjá Klöru fá aðstoð frá þáverandi oddvita Mosfellshrepps, Jóni M. Guðmundssyni. Fremst og lengst til hægri á myndinni er pabbi gamli, Tómas Sturlaugsson fyrrverandi kennari og skólastjóri við Brúarlands- og Varmárskóla. 

Topp 100 á fimm dögum

Aldrei hefði ég trúað því hvað það er gaman að blogga. Á blogginu skiptist maður á skoðunum við fólk sem að margt hvert maður hefur aldrei átt samskipti við. Hittir á gamla kunningja, fær hlýjar kveðjur, meira að segja frá fólki sem átti samskipti við pabba og mömmu og afa og ömmu. Þetta er bara gaman. Auðvitað er þetta allt saman mis gáfulegt og ég ákvað það strax í byrjun að hafa það þannig líka. Ég ætla að halda ótrauður áfram og reyna að hafa eins gaman af og ég mögulega get. Markmið mitt í upphafi var nú ekki að ná einhverju sæti á vinsældarlista, vissi ekki einu sinni að hann væri til. En þegar góður vinur minn hringdi í mig og benti mér á að eftir fimm daga blogg mitt væri ég kominn á topp 100 geri ég vart annað en að tékka á stöðunni. Ég er nr. 107 núna. Bloggið fær mig oft til að hlæja og ég hef gaman að því. Hláturinn lengir lífið. Lifið heil.

Kær kveðja. Kalli Tomm.

Óskar Þ.G. Eiríksson

Vestur-Skaftfellingurinn Óskar Þ. G. Eiríksson er mörgum Mosfellingum að góðu kunnur. Eftir hann birtust fjöldi greina og ljóða um árabil í bæjarblöðum Mosfellsbæjar sem vöktu ávalt athygli. Óskar dvaldi löngum stundum í Mosfellsdalnum við skriftir og er Dalurinn honum alltaf kær.

Óskar sendi mér línu á dögunum og fór þess á leit við mig þar sem hann er ekki með bloggsíðu að fá að koma sínum hugrenningum við og við á framfæri hjá mér. Það var auðsótt bón hjá skáldinu. Ljóðið sem hann langaði að byrja á því að senda birtist fyrst á forsíðu Dalalæðunnar og er eitt af hans frægustu og virtustu ljóðum. Það var ort árið 2000 eftir gott sumar í Mosfellsdal og hér kemur það:

Mosfellsdalur                                

Dýrðlegt er í Dalnum,

umvöfnum fjallasalnum,

Þar eru:

Rósabændur og söngfuglar,

grautvíxlaðir graðfolar,

yxna kýr og ofvitar,

nóbelsskáld og gullmolar,

frekjusvín og drykkjusvolar,

ljóðskáld og þurfalingar,

hestamenn og monthanar,

þingmenn og snillingar,

listamenn og letingjar,

klerkur, kirkja,

ég er hættur að yrkja. 

Ó.Þ.G. Eiríksson

 

Gylfi Ægisson

Það er eitthvað í fari Gylfa Ægissonar tónlistarmanns sem hefur höfðað til mín allt frá barnæsku. Ég held að það sé einlægnin í lögum hans og textum, samt veit ég ekkert hvað veldur. "Það er ekki hægt að fela neitt í tónlistinni" sagði einn af mínum uppáhalds tónlistarmönnum, Sting, "það kemst alltaf upp".

Þetta eru orð að sönnu. Tónlistin er galdur eins og öll önnur list og það ber að virða hana þrátt fyrir að hún verði vinsæl á þorrablótum, árshátíðum eða í óskalögum sjúklinga. Lög Gylfa Ægis njóta mörg hver og hafa notið óhemju vinsælda við slík tækifæri og það er gott en þau eru líka falleg og einlæg. Þess vegna ber þeim að fá þá virðingu sem þau eiga skilið. Ég setti af tilefninu nokkur lög frá Gylfa á fóninn hér til hliðar.

Uppþvottaburstinn

Þrátt fyrir að konan mín komi mér nú ekki stanslaus á óvart eftir 22 ára búskap þá tekst henni það svo sannarlega enn. Eitt af því sem hún gersamlega bakar mig í það er hvað hún er ofur minnug. Hún toppaði nú samt allt saman í gær. Við vorum að vaska upp og hún benti mér á að uppþvottaburstinn sem ég keypti nú á dögunum væri algerlega ómögulegur. Ég kváði við og vildi fá að vita hvað væri að honum. Þá sagði hún: Gamli uppþvottaburstinn sem ég var að henda var keyptur í október. Hjá mér kom löng þögn og ég sagði: "Lína mín. Að muna hvenær uppþvottabursti er keyptur veldur mér áhyggjum."

Varmársamtökin og Vinstri græn

Gunnlaugur B. Ólafsson, varaformaður Varmársamtakanna og Samfylkingarmaður, hefur undanfarið, eins og nokkrir félagar hans í Varmársamtökunum, verið duglegur að blogga og er enn að. Gunnlaugur beinir reglulega til mín spurningum sem ég hef nú ekki alltaf séð ástæðu til að svara og ég vona að hann fyrirgefi mér það. Kannski er Gunnlaugur að gera þetta til að fá fjör í umræðuna svona rétt fyrir alþingiskosningarnar, ég veit það ekki.

Hingað til hef ég ekki blandað mér nema að sáralitlu leyti í alla þá umræðu sem sprottið hefur upp vegna hinnar marg umtöluðu tengibrautar og í raun var ég að vonast til að þeirri umræðu færi senn að ljúka. Gunnlaugur sagði reyndar sjálfur nú nýlega að umræðan væri búin að ná fullum þroska. Ég veit ekki hvað hann meinar með þroska, á köflum hefur þetta að mínu mati verið hálf þroskaheft umræða. Því skil ég ekki afhverju Gunnlaugur lætur ekki staðar numið.

Varmársamtökin brugðust algjörlega í umræðunni með því að tala máli tveggja flokka. Það var á þeim tímapunkti sem að ég, og ótal margir fleiri, áttaði mig á því að samtökin væru há pólitísk. Samtökin hafa róið öllum árum gegn sitjandi meirihluta Vinstri grænna og sjálfstæðismanna í Mosfellsbæ.

Nýlega benti Gunnlaugur mér á að nálgast kjósendur af virðingu. Ég vona að ég nálgist sem flesta af virðingu og það þurfi ekki kjósendur til. En talandi um virðingu:

Gunnlaugur endilega beindu Varmársamtökunum á rétta braut. Það gengur ekki upp að á sama tíma og þú ert að skrifa eða tala máli Varmársamtakanna þurfir þú ávallt að reyna að vera fyndinn á kostnað Vinstri grænna. Þetta er svo ótrúverðugt og hallærislegt.

Þegar þorrablótið í íþróttahúsinu að Varmá var haldið vorum við í sama liði, það er V og S listi. Þetta veist þú! Þú getur ekkert staðhæft um fylgi Vinstri grænna í Mosfellsbæ. Þetta veist þú! Vinstri græn í Mosfellsbæ fengu ekki 9% í kosningunum. Þetta veist þú! Atkvæði greidd Vinstri grænum duttu ekki steindauð niður í Mosfellsbæ. Þetta veist þú! Vinstri græn í Mosfellsbæ komu ekki í veg fyrir myndun nýs meirihluta í Mosfellsbæ. Þetta veist þú!

Ykkar gengdarlausu árásir á Vinstri græn í Mosfellsbæ hafa gert það að verkum að þingmenn Samfylkingarinnar og Framsóknar opna vart munninn í fjölmiðlum án þess að tala um Vinstri græn í Mosó til að reyna að koma höggi á flokkinn á landsvísu nú rétt fyrir alþingiskosningarnar. Um leið gera þeir sig óttalega bjánalega vegna þekkingarleysis síns á málinu.

Hvernig ætlast samtökin til að þeirra málflutningur virki trúverðugur með þessu móti? Aðkoma Samfylkingarinnar og Framsóknarflokksins í þessu máli hefur verið með ólíkindum. Báðir flokkarnir studdu þessa vegtengingu í Helgafellshverfið allt frá upphafi eins og allir vita. Nú síðustu vikur hafa forystumenn þessara flokka og þá aðallega Samfylkingarinnar, endalaust talað um að það væri rétt að skoða aðra kosti.

Hvaða kosti? Hafa flokkarnir nefnt það? Nei, það hafa þeir aldrei gert. Getur þú, Gunnlaugur varaformaður Varmársamtakanna, af því að ég ætla ekki að hafa þetta mikið lengra, bent mér á annan betri kost til að tengja íbúðabyggðina í Helgafellshverfi við Mosfellsbæ?

Helgafellshverfið er staðreynd og varð fyrir ótal mörgum árum síðan og til þess að komast þangað þarf vegtengingu.

Með góðri kveðju, kæri vinur og ég vona að allir fari að átta sig á því að þetta var eina raunhæfa leiðin í hverfið. Ég sá það strax og varð að sætta mig við það. Bæjaryfirvöld hafa gert allt til að milda áhrif vegarins og það hefur tekist vel til að mínu mati. Þetta er allt annar vegur nú en hann var fyrir kosningar.

Kær kveðja frá Kalla Tomm.

Gleðilega páska

Kæru vinir og félagar nær og fjær.
Óska ykkur öllum gleðilegra páska.
Kær kveðja frá Kalla Tomm.

Fóbían

Hvernig ætli standi á því að fólk fái heiftarlega fóbíu fyrir öllu mögulegu? Oft er þetta svo slæmt að sækja þarf námskeið til að vinna bug á ástandinu. Maður fær svo sem botn í það að manneskja sem býr í Ástralíu geti verið nervös við loðnar köngulær. Það er hins vegar verra að átta sig á því að manneskja sem býr á Íslandi óttist ekkert meira en krókódíla eða eiturslöngur. Ég er t.d. svo illa haldinn af fóbíu gagnvart hákörlum að þegar ég fór í fyrsta skipti á sólarströnd fyrir fimm árum óð ég ekki dýpra í flæðarmálinu en upp að hnjám. Getur einhver bent mér á hvort það eru haldin námskeið á Íslandi gegn hákarlafóbíu, ég er nefnilega að spá í að fara aftur á Benidorm í sumar. Flugleiðir, sem flytja ógrynni af ferðamönnum á sólarstrandir eru oft með námskeið fyrir þá sem eru með flugfóbíu.

Glóðaraugað

Einu sinni þegar við félagarnir í Gildrunni vorum að spila á Ísafirði ákvað ég að gera smá grín sem endaði með ósköpum. Um þetta leyti voru fegurðarsamkeppnir um allt land og talsverð umræða um þær. Ég ákvað á miðjum tólnleikum án þess að strákarnir hefðu hugmynd um að segja í míkrafóninn að nú væri komið að fegurðarsamkeppni kvöldsins. Ég man alltaf undrunarsvipinn á strákunum sem botnuðu náttúrulega ekki neitt í neinu. Ég sagði að Helgi rótari og benti á hann út í sal, væri nú búinn að velja þær sem komust í úrslit og á topp tíu. Ég stóð upp frá trommusettinu og gekk fram á sviðið og kallaði stelpurnar upp sem Helgi átti að hafa valið eina af annarri. Ég sagði og benti bara eitthvað út í sal, þú þarna í græna jakkanum, þú þarna í rauða kjólnum, þú þarna með svörtu húfuna og svo framvegis, þangað til tíu stelpur voru komnar upp á svið. Þá var komið að því að krýna fegurðardrottningu Vestfjarða sem var stúlkan með sólgleraugun. Ég bað hana vinsamlegast að taka af sér gleraugun sem hún ætlaði seint að fást til en á endanum gerði hún það. Þá kom í ljós það stærsta glóðarauga sem við félagarnir höfum séð. Það myndaðist fljótlega talsverður urgur á staðnum sem átti bara eftir að aukast með kvöldinu og endaði allt með ósköpum. Helgi rótari alsaklaus hvarf inn í búningsherbergi og sást ekki meir. Eftir ballið var okkur tilkynnt af starfsmönnum og dyravörðum að ástæða óánægjunnar hefði verið sú að hin raunverulega ungfrú Vestfirðir sem hafði verið kosin og það helgina áður með miklum yfirburðum komst ekki einu sinni á topp tíu listann hjá Helga. Vinur minn, Helgi, var ekki par hrifinn af þessari uppákomu og hafði oft orð á henni. Göngum hægt um gleðinnar dyr um páskana og njótum komandi helgar.

Auglýsing

Ég verð nú að endurgjalda kollegum mínum í Samfylkingunni og Framsókn greiðann þ.e. auglýsa fyrir þau. Ég vil benda á að það er komið út nýtt blað frá Samfylkingunni í Mosfellsbæ. Það er fullt af fréttum um Vinstri græn í Mosó. Má þar nefna umræðu um það að Tunguvegur verður settur í umhverfismat. Leikskólamál, en Mosfellsbær var fyrsta stóra bæjarfélagið til að gera leikskólavist fyrir fimm ára börn gjaldfrjáls, tengibrautin í Álafosskvos fær líka sitt pláss og margt fleira. Öllum á óvart er einnig talað um að Samfylkingin sé eina mótstöðuaflið gegn Sjálfstæðisflokknum í komandi kosningum. Einnig vekur athygli að formaður Samfylkingarinnar í Mosó vill að leitað sé ráða hjá fagfólki varðandi umhverfið og legu tengibrautanna. Hvernig má túlka slík ummæli? Eru allir fræðingarnir sem lagt hafa á sig óhemju vinnu og rannsóknir með öllu óhæfir? Aumingja Framsóknarflokkurinn fær ekkert pláss í blaðinu. Það er ekki minnst á flokkinn sem sá til þess að Samfylkingin í Mosó virðist en í sárum.

Kær kveðja frá Kalla Tomm.