Robin Nolan heimsóknin var einstök og ógleymanleg

Ég var að hlusta á þáttinn, Blár nótur í bland, á rás 1, í umsjá, Ólafs Þórðarsonar, (Í Ríó Tríó) Hann spilaði eitt sinn á sérlega skemmtilegum tónleikum á Álafoss föt bezt ásamt Bjössa Thor og félögum. 

Óli, sér um skemmtilegan þátt á áður nefndri útvarpsstöð og að venju fer hann um víðan völl í umfjöllun sinni í þáttum sínum.

Í þessum þætti sem hér um ræðir, talaði hann m.a um gítarleikarann, Robin Nolan.

Robin Nolan, er í dag heimsþekktur gítarleikari og þykir af mörgum vera snillingur. Tengsl hans við Ísland eru svolítið skemmtileg og sérstök saga.

Þannig var að, Þórður Pálmason, sem rak um árabil veitingastaðinn Fógetann í Reykjavík, sá, Robin Nolan og félaga í Amsterdam, en þar voru, Robin og félagar götuspilarar um árabil.

Þórður heillaðist af hljóðfæraleik þeirra félaga og bauð þeim að koma til Íslands og spila, sem þeir og þáðu.

Um þetta leiti var veitingastaðurinn okkar, Álafoss föt bezt, í blóma í Kvosinni og þar var reglulega boðið upp á vandaða tónlist.

Við félagarnir í Gildrunni vorum að spila hjá Þórði á Fógetanum eitt kvöldið þegar styttist í komu Robin Nolan og félaga til Íslands og Þórður spurði mig, hvort mér litist ekki vel á að fá hann til að halda tónleika á Álafoss föt bezt, sem varð svo úr.

Þetta voru án vafa einir flottustu tónleikar sem þar voru haldnir.

Í dag er Robin Nolan ekki götuspilari, heldur orðinn virtur gítarleikari sem er þétt bókaður langt fram í tímann.

Þórður Pálma á vafalítinn þátt í því og Íslandsáhugi gítarleikarans er greinilegur eins og heyra má á myndbandinu sem ég læt hér fylgja með.

Athugasemdir

[Sigga Hjólína, 3.1.2010 kl. 18:17]

Já, ég man eftir tónleikunum þeirra á Álafoss! Hreint út sagt tær snilld.

[Karl Tómasson, 9.1.2010 kl. 07:25]

já, Sigga þetta var mögnuð uppákoma og það er einnig svo minnistætt, hvernig andlitið hreinlega datt af viðstöddum þegar þeir byrjuðu að spila.

Það var engin sérstakur kaupstaðarbragur á köppunum í klæðaburði eða framkomu.

Þeir mættu sáu og sigruðu.

Bestu kveðjur úr Mosó frá K. Tomm.

[steinimagg, 9.1.2010 kl. 18:22]

jamm, þetta var snilldin ein