Gítarsnillingar spjalla

Hér fyrir neðan má sjá nýlegt og fróðlegt viðtal sem Björn Thoroddsen, gítarleikari, tók við Sigurgeir, Sigmundsson, gítarleikara.

Viðtalið er í fjórum köflum og ég set hér inn þann fyrsta. Eftir áhorf á hann koma svo kaflarnir einn af öðrum.

Það hafa verið mikil forréttindi, að fá tækifæri til að spila um árabil með jafn mögnuðum gítarleikara og Sigurgeiri en hann gekk til liðs við Gildruna árið 1989. Sigurgeir er ekki einungis sérstaklega melódískur gítarleikari, heldur einnig tæknilega magnaður.

Í viðtalinu er gamli Fender stratinn hans mikið til umræðu. Ég birti fyrir nokkru síðan hér á síðunni minni gamla upptöku með Gildrunni og þar má einmitt sjá kappann nota umrætt hljóðfæri.

Ég ætla ekki að hafa fleiri orð um þetta. Viðtalið segir allt sem segja þarf.

Jú!!! Eitt enn, hlustið endilega á Fiðring, gamalt og gott lag með Gildrunni sem er í spilaranum mínum hér á síðunni. Þar fer Geiri oft sem áður á kostum í lagi sem hefur alltaf verið í miklu uppáhaldi hjá mér.

Athugasemdir

[HP Foss, 15.12.2009 kl. 23:58]

Stórkostlegt viðtal,  sérlega skemmtilega gert, fannta myndataka og klippingin óaðfinnanleg.

Takk!

[Hjördís Kvaran Einarsdóttir (IP-tala skráð) 16.12.2009 kl. 01:24]

Skemmtilegt viðtal - Geiri er yndislegur maður sem býr yfir miklum sjarma hvort heldur er sem persóna eða tónlistarmaður. Hann er heill í gegn og það skín af honum í allri hans framgöngu og yndislegum tónlistarflutningi. Gaman að heyra hann segja frá ;o)

[Guðmundur St. Valdimarsson, 16.12.2009 kl. 02:42]

Mér hefur alltaf fundist gaman að heyra Sigurgeir segja frá. Hann er svo gegnheill og heiðarlegur í allri frásögn. Stórkostlegur tónlistarmaður, hefur góða nærveru og er vinur vina sinna. Ég var að vinna að öðru verkefni og ætlaði að láta þetta rúlla á meðan. Verkefninu var frestað á meðan farið var í gegnum alla hlutana, enda nauðsinnlegt að horfa á Sigurgeir segja frá, það er svo stór þáttur í frásögnini :o)

[Haukur Nikulásson, 16.12.2009 kl. 07:53]

Takk fyrir þetta Kalli. Gaman að heyra þessa tvo á kafi á sama áhugamáli og maður hefur sjálfur.

[Þórir Kristinsson (IP-tala skráð) 16.12.2009 kl. 22:09]

Sigurgeir er klárlega snillingur. Fingrafiminn og tæknin er auðvitað mikils virði og þar er Sigurgeir alveg upp á 10 en það er eitthvað sem hægt er að æfa upp með elju og vinnusemi.  En Það er þetta meðfædda, þessi hreini hljómur eða tónninn sem kemur að innan, melódían sem skilur á milli hæfileika og snilligáfu.

Sigurgeir getur snert hörpu hinnar himinbornu Dísar svo hlusti englar Guðs í Paradís. Drengurinn hefur náð fram á mér svo oft þvílíkri gæsahúð að ég hef tekið andköf, sannarlega einstakur listamaður sem er hógvær og vænn piltur.

Gildran er sennilega vanmetnasta rokkband íslandssögunnar, þar sem leiddu saman hesta sína snillingar hver á sínu sviði. Kappar sem voru í hæsta gæðastandard getulega á hljóðfærin þar sem menn gátu bæði snert Himin og Helvíti og allt þar á milli, engin getuleg takmörk.

Sigurgeir var klárlega fjórða hjólið í bandinu sem þaut áfram með drifi á öllum og gaf skít í allar tískustefnur og útvarpssmjaður og eftir stendur tónlist sem sannarlega hefur elst vel og staðist tímans tönn.

Sigurgeir á frábært lag á nýju plötunni hans Bigga Haralds og þar sannar karlinn að hann er í flokki með bestu lagahöfundum þessa lands.

Áfram Geiri.

[Karl Tómasson, 16.12.2009 kl. 23:40]

Kæru bloggvinir takk fyrir komuna til mín.

Hljómsveitin Gildran og sá félagsskapur sem í kringum hana var, er eitthvað sem mun lifa í minningu minni alla tíð og vonandi allra sem að hljómsveitinni komu.

Þetta var einstaklega góður félagsskapur.

Allir voru með og hver og einn blómstraði á sínum forsendum.

Það þurfti engar siðareglur eða lög, þetta gerðist allt að sjálfu sér, afslappað og rólega.

Það þarf ekki að semja lög til að búa til góð lög.

Annaðhvort kemur það eða ekki, rétt eins og gott gítarsóló frá Geira.