Allar greinar í Mogganum frá Hannesi Hólmstein, Birni Bjarna og félögum

Það er greinilega mikið rót á Moggabloggurum þessa dagana. Einn af öðrum eru þeir að yfirgefa þennan vettvang. Vafa lítið á maður eftir að sakna margra góðra penna, sem hafa reglulega náð athygli manns. Það er með ólíkindum hvað Dabbi hringlar í hlutunum. Hvar sem hann er og hvert sem hann kemur.

Ég satt að segja veit ekki, hvort þetta upphlaup þessara ágætu bloggara hafi nokkuð að segja. Verið er, að yfirgefa eitt bloggsvæði til að fara á annað, þar sem Dabbi er nú örugglega ekki, það er jú ástæða brottflutningsins. Hver sem er getur opnað síðu á Moggablogginu, dæmi eru þó um, að öðru máli gegni annarsstaðar. Vissulega eru sumir bloggarar greinilega vinsælli hjá Moggabloggsritstjórninni en aðrir, það er svo aftur annað mál.

Ég velti því fyrir mér af hverju verið er að skipta sér af ráðningu Dabba í ritstjórastólinn og allir fjölmiðlar eru uppfullir af því svo dögum skiptir. Á það að koma nokkrum á óvart að Mogginn verði jafnvel aftur hreinræktað málgagn þess arms Sjálfstæðisflokksins? Þeir gömlu forkólfar flokksins, hafa ekki litið bjartan dag, þann tíma sem blaðið stefndi óðfluga í þá átt að vera hlutlaust fréttablað.

Leyfum þessum köllum bara að láta Moggann fara sína leið, verða jafnvel aftur að hreinræktuðum íhaldspésa. Tilhvers að vera að skipta sér af einhverju sem er að gerast á Mogganum? Ég botna bara ekkert í þessu. Hættum þá frekar að skrifa í hann og beinum skrifum okkar annað, t.d. hingað á bloggið og í aðra miðla. Þeir eru nú öllu fleiri möguleikarnir sem við höfum á slíku í dag en fyrir 20 árum. Það væru öflugustu skilaboð sem við getum sent ritstjórn og um leið starfsfólki Moggans, ef okkur er það í mun að stefna blaðsins eigi að vera hlutlaust og málefnaleg.

Mogginn á ekki sjö dagana sæla ef allar aðsendar greinar í blaðinu koma frá Hannesi Hólmstein, Birni Bjarna, Kjartani Gunnars og félögum.

Hjá Morgunblaðinu starfar margt gott fólk og það er vissulega leiðinlegt, að sumt af því hefur nú fengið reisupassann. Ég trúi því ekki að Þeir sem eftir eru hjá blaðinu og vilja veg þess sem mestan láti stjórnast af nokkrum gömlum köllum.

Þessir ágætu blaðamenn gera sér vafalítið grein fyrir því, að ætli blaðið að ná eyrum og augum allra Íslendinga, gengur það aldrei upp, ef allar greinar og fréttaflutningur blaðsins, eigi eingöngu að þóknast gömlum íhaldsmönnum. Sjáum hvað setur.

P.s. Ágætu bloggarar. Endilega takið þátt í skoðanakönnuninni hér upp í hægra horninu hjá mér. 

Athugasemdir

[Guðmundur Pétursson (IP-tala skráð) 30.9.2009 kl. 00:33]

Hver er þessi Dabbi?

[Þórir Kristinsson (IP-tala skráð) 30.9.2009 kl. 22:53]

Hannes Hólmsteinn er tvímælalaust minn uppáhaldspenni algjörlega frábær. Björn Bjarnason er einnig skemmtilegur og rökfastur. Greinar eftir þessa heiðursmenn les ég alltaf hvar svo sem þær birtast. Mér finnst Moggin hafa tekið stórkostlegt stökk uppávið með innkomu Davíðs Oddssonar mesta stjórnmálasnillings íslandssögunnar. Ólafur Steph. var búinn að breyta Mogganum í evrópuáróðursrit sem var algjörlega óbærilegt. Það bókstaflega varð að láta hann víkja.

[HP Foss, 1.10.2009 kl. 15:17]

Heyr heyr! Þórir.

Ánægður með þig og þú ert nú ágætur penni sjálfur, það hef ég nú séð á fleirum en einum vettvangi.

[Þórir Kristinsson (IP-tala skráð) 1.10.2009 kl. 23:20]

Já Helgi minn við timburmenn erum góðir menn en förum stundum fyrir brjóstið á sumum meðan aðrir fá okkur á heilann.

[Guðjón Sigþór Jensson, 2.10.2009 kl. 12:06]

Nánustu aðstandendur Morgunblaðsins tóku gríðarlega áhættu að fá Davíð sem ritstjóra. Uppsögnum á áskrift hafa bókstaflega rignt inn og er eg einn þeirra. Á dögunum kom bréf undirritað af þessum tveim nýju ritstjórum og eru þær eins og börn hafi stýrt þar penna.

Þar eru ágætir áskrifendur grátbeðnir um að kaupa blaðið aftur, gull og grænir skógar boðnir!

Það er spá mín að ekki líði á löngu að Davíð hrekist úr ritstjórnarstólnum enda bera leiðarar blaðsins undanfarna daga þess ljós merki að hann hafi ekkert erindi í þetta erfiða hlutverk. Til þess skortir hann það mikilvæga víðsýni og hlutleysi hvers góðs blaðstjóra þarf að prýða.

Mosi ætlar að þrauka á Moggablogginu uns yfir lýkur. Hvort það verður ritskoðun eða blankheit þeirra Moggamanna að kenna, að skrifum mínum verði úthýst, skal ósagt látið.

Það voru afdrifarík mistök að félag á vegum Vilhjálms Bjarnasonar fékk ekki að yfirtaka Morgunblaðið. Þar hefði verið farið með sanngirni og heiðarleika að útgáfu þessa stórveldis í fjölmiðlun á Íslandi. Því miður náðu peningaöflin og flokkseigendafélag Sjálfstæðisflokksins undirtökunum og ætla sér að ná fyrri vígstöðu sinni með Davíð sem stríðsherra í brúnni.

Hvort þeim verður kápan úr því klæði skal ósagt. En mikið verður fallið þá hriktir í undirstöðunum og blaðið lendir endanlega í þroti.

Mosi

Mosi