Gefum stjórnvöldum tækifæri

Öllum má ljóst vera að efnahagshrun okkar Íslendinga er meira en nokkru sinni fyrr og alvarlegra en víðast hvar þekkist í heiminum.

Okkur var rænt af fáeinum kverúlöntum sem þáverandi stjórnvöld töldu vera að koma okkur í hæstu hæðir efnahagslífsins. Þau dönsuðu sem aldrei fyrr með "snillingunum" sem sjálfsagt þótti að fengju 300 milljónir á mánuði eða 500 milljónir fyrir að hætta eða byrja í vinnunni sinni.

Ég er á þeirri skoðun að við verðum að gefa núverandi stjórnvöldum, sem aðeins hafa haft nokkrar vikur, meira svigrúm til að leysa vandann, áður en við blásum í lúðrana og hefjum skipulega andúð á starfi þeirra.

Ég átti ekki til orð að heyra í Bjarna Benediktssyni, formanni Sjálfstæðisflokksins, í Kastljósinu í kvöld þar sem hann m.a. furðaði sig á því að ekki hefði mátt gera hagræðingar í heilbrigðiskerfinu.

Á sama tíma furða flokksfélagar hans og fleiri stjórnmálamenn sig á aukinni álagningu á áfengi og tóbaki hjá núverandi stjórnvöldum.

Ég spyr. Hvar á að byrja að skera niður, eða hvar á að byrja að leggja skattana?

Eitthvað þarf að gera. Við verðum að koma okkur upp úr þessum vanda. Öll saman.

Öllum má ljóst vera, að ráðamenn þjóðarinnar vinna daga og nætur til að finna lausn á vanda okkar og ég hef það frá fyrstu hendi, að Steingrímur J. Sigfússon, hafi unnið nánast allan sólarhringinn, frá því að hann tók við embætti sínu sem fjármálaráðherra.

Það eru fá dæmi um að ráðherrar hafi verið jafn fúsir og hann að koma ávalt í viðtal þegar beðið er um til að greina frá stöðunni. Það ber að virða við hann.

Verum sanngjörn þrátt fyrir erfiða tíma hjá okkur öllum.

Gefum stjórnvöldum tækifæri í a.m.k. nokkrar vikur í viðbót.

Bíðum með pottana og pönnurnar í nokkrar vikur.

Fyrrverandi ráðamenn þjóðarinnar fengu 18 ár og skiluðu þessu búi til okkar sem við erum nú að fást við og súpa seyðið af.

 

Athugasemdir

[Óskar Þorkelsson, 3.6.2009 kl. 22:15]

sammála þér Kalli.

[Sigurður Hreiðar, 3.6.2009 kl. 22:23]

Ef berja á hausnum við steininn og hundsa vanda heimilanna, einkum þeirra sem eru með svokölluð gjaldeyrislán sem hafa meira en tvöfaldast að höfuðstól og láta það vera undirstöðuna undir endurreisn bankanna líst mér ekkert á blikuna. Ég get heldur ekki látið vera að furða mig á hugmyndafátæktinni að grípa enn og aftur til þess gamalkunna ráðs að hækka álögur á áfengi og tóbak ásamt viðbótarálögum á bíleigendur. Sem hvort tveggja kemur beint inn í vísitölu og verkar sem hækkun yfir línuna. Til dæmis hefði mátt setja ca. 70 þús kr. neyðarskatt á hverja fjölskyldu með fjórum gjalddögum, eða eitthvað þess háttar sem fer ekki beint út í verðlagið og tekur ekki meira af hverjum einstaklingi en það sem gert var. Svo kemur Jóhanna einn ganginn enn og segir okkur að við stöndum frammi fyrir alvarlegum vanda. Mig undrar ekki þó Steingrímur eigi annríkt í þessari sambúð.

kv.

[Karl Tómasson, 3.6.2009 kl. 22:49]

Takk fyrir komuna kæru félagar, Óskar og Sigurður.

Sigurður, minn kæri sveitungi.

Ég er ekki að berja hausnum við steininn.

Ég á í þessum sama vanda og svo margir aðrir landar okkar. Ég á tvö stór hús og ætlaði mér vissulega alltaf að selja annað þeirra til að standa í skilum með afborganir á hinu þeirra. 

Ég þarf væntanlega ekki að segja þér minn kæri hvernig sú staða er í dag.

Ég tel samt sem áður ekkert óeðlilegt að við gefur ráðamönnum tækifæri í nokkurn tíma til að reyna að greiða úr vandanum.

Ég hefði satt að segja gefið þeim það tækifæri hvar sem í flokki standa, hvort sem þú trúir því eða ekki.

Þú verður kæri vinur að viðurkenna það að Steingrímur hefur ekki fengið nein sérstök stórtækifæri til þess sanna sig.

Bestu kveðjur úr Tungunni frá Kalla Tomm. 

[joi (IP-tala skráð) 4.6.2009 kl. 00:25]

Ekki var nú umburðalyndið hjá þér svona mikið í haust þegar efnahagskerfið hrundi. Þá var skundað á austurvöll og afsagnar krafist þá og þegar.

Þú segir að eitthvað þurfi að gera. Það er nú gott að heyra þig segja það. Man ekki betur en að Vinstri Græn hafi risið upp á afturlappirnar þegar Guðlaugur Þór gerði heiðarlega tilraun til að spara peninga í heilbrigðiskerfinu án þess þó að skerða þjónustu. Þá mætti Ögmundur Jónasson og fleiri flokksfélagar þínir og sáu drauga í hverju horni.

Steingrímur J. talaði um fyrir kosningar að "byggja upp réttlátt skandinavískt velferðarsamfélag" svo tekin séu orðrétt ummæli hans í kosningabaráttunni. Vissi hann virkilega ekki hvernig ástandið var? Var þetta bara enn eitt blöffið hjá karlinum til að smala saman atkvæðum?

Á eftir rennur stóra stundin upp. Verða vextir lækkaðir niður í 6-8% eða ekki. Verði það ekki eru ÖLL ummæli Steingríms J. dauð og ómerk. Þá vita menn endanlega að hann er undir hæl AGS. Þeirra manna sem Davíð Oddsson þorði að standa gegn, en þeir sem nú eru með lyklavöld þora greinilega ekki.

Vinstri græn sitja í súpunni hvernig sem á það er litið. Farin að biðjast vægðar eins og þessi aumi pistill þinn í kvöld Karl.

Að lokum vil ég benda þér á að þessir menn, sem þú réttilega bendir á að rændu landinu, gerðu það með fulltingi og 100% stuðninig þess flokks sem vinstri græn sitja nú í ríkisstjórn með. Sá flokkur dansaði með þeim alla leið. Einu stjórnmálamennirnir sem að einhverju viti reyndu að sporna gegn þessum kónum voru tveir menn, Davíð Oddsson og Björn Bjarnson. Það er kannski sárt fyrir ykkur VG að þurfa að kyngja þessu, en þetta eru staðreyndir málsins. Gögnin liggja fyrir og ekkert við þeim að segja. Nú ættu VG að hætta þessu vægðarvæli, bretta upp ermar og fara að gera eitthvað í málunum.

[Sigurður Hreiðar, 4.6.2009 kl. 13:05]

Ég er ekki í neinum vafa um stöðu þína í þessari skuldasúpu, Kalli minn. Sem betur fer er ég sjálfum stórum betur staddur en breytir ekki því að ég skil ekki hvers vegna ekki hefur þegar verið komið til móts við þá sem allt í einu eru komin með höfuðstól lána langt yfir því sem þeim var metið sem greiðslumat þegar lánin voru tekin. Það er ekki verið að tala um neina eftirgjöf eða skuldaniðurfellingu, heldur aðeins eðlilega leiðréttingu. Það var vitlaust gefið í upphafi og það ber að leiðrétta.

Ég veit ekki fyrir víst um tækifæri Steingríms, en mér finnst hann ekki láta mikið á sér bala í samstarfinu við forystu Samfylkingarinnar, sem mér finnst vera að bregðast öllum þeim vonum sem þó var kannski tilefni til að hafa þar um.

M. b.kv.

[Karl Tómasson, 4.6.2009 kl. 19:09]

Heilir og sælir Jói og Sigurður Hreiðar og takk fyrir komuna til mín.

Jói. Ég verð nú að neita þessu hvað varðar umburðarlyndi mitt, það er öllu jafna nokkuð gott. Ég tel alltaf rétt að gefa fólki ákveðir ráðrúm til að greiða úr hlutunum.

Það er hinsvegar ekki líku að jafna hvort um fólk er að ræða sem svaf á verðinum eða fólk sem átti engan hlut að máli hvernig fór. Því nefndi ég Steingrím J einan manna í pistli mínum. Nú er bara að bretta upp ermarnar eins og þú segir réttilega og sjá hvað setur. Gefum þeim smá tækifæri.

Sigurður. Það er ömurlegt að alsaklaust fólk þurfi eitt að sitja í súpunni, því er ég algerlega sammála hjá þér. Ég er því einnig hjartanlega sammála að auðvitað á að leiðrétta þetta.

Ég var plataður rétt eins og öll íslenska þjóðin og ráðamenn hennar en það kemur ekki til greina hjá mér að börn mín eða annarra þegna þessa lands okkar þurfi að bera byrðar þessara glæpamanna um ókomin ár.

Bestu kveðjur frá Kalla Tomm.

[Einar Guðjónsson, 4.6.2009 kl. 20:25]

!20 dagar er hellingstækifæri.

[joi (IP-tala skráð) 4.6.2009 kl. 23:18]

Það er marg komið fram að það er ekki einhverjum einum að kenna hvernig fór. Helst þó að þeir sem misnotuðu banka, tóku stöðu gegn krónu, rupluðu, rændu og tæmdu þá sjóði sem var búið að byggja upp marga síðustu áratugi hafi komið okkur á hausinn.

Það er þó alveg á hreinu að ef Íslendingar hefðu sýnt meiri stillingu strax og hrunið varð, þá eru líkur á að betur hefði til tekist. Þannig má eiginlega segja að bakland Vinstri grænna sem spændi þjóðfélagið upp í alls kyns óeirðir hafi átt sinn þátt í hvernig fór.

Í dag sjá menn betur og betur að þáverandi stjórn seðlabankans hafði á réttu að standa varðandi samskipti við alþjóða gjaldeyrissjóðinn. Davíð Oddsson var með það á hreinu að ekki átti að fara í einu og öllu eftir þeim. Þjóðin átti ekki að borga skuldir óreiðumanna.

Nú er hins vegar svo komið að sú stjórn sem hefur setið við völd síðan um áramót hefur í einu og öllu farið rangt að. Varla hægt að benda á eitt einasta atriði sem ríkisstjórnin hefur gert rétt. það er útséð með að hún hefur engin ráð, engan dug og líklega ekki þá hæfileika sem þarf til að vinna úr þessum málum.

Nú þarf þjóðstjórn til að vinna úr enn stærri vandamálum en við vorum í þegar hrunið átti sér stað í haust. Þetta var nákvæmlega það sem menn á borð við Davíð Oddsson bentu á, en af því þetta kom frá honum, þá gat samfylking ekki samþykkt þessa tillögu. Líklega voru þetta mistök af hans (Davíðs) hálfu. Hann hefði kannski átt að gefa Herði Torfa einn góðan súpupott, sleif og það veganesti að sniðugt gæti verið að mynda þjóðsstjórn. Þá hefði samfylking hugsanlega sperrt við eyrun þegar einhverjir auðnuleysingjar úti í bæ kæmu með tillögur.

[Óskar Þorkelsson, 4.6.2009 kl. 23:52]

Ég held að ég hafi ekki séð einn einasta stuðningsmann Davíðs Oddsonar sem er skráður á bloggið mæra karlinn síðan í október...

[Karl Tómasson, 5.6.2009 kl. 00:00]

Hver er hann Joi? það væri gaman að vita. Hann er lunkinn og skemmtilegur penni.

Jói komdu nú úr skugganum, það er ekkert til að skammast sín fyrir kæri vinur.

Bestu kveðjur úr Mosó frá Kalla Tomm.