Farfuglarnir

Ég heyrði skemmtilegt viðtal við fuglafræðinginn, Jóhann Óla, á rás 1 í morgun. Hann sagði m.a annars í viðtalinu, hafa heyrt af því að sést hafi til Lóu á Álftarnesi 28. febrúar s.l. sem væri, um mánuði fyrr en vanalegt teldist. Hann sagði að hugsanlega væri þar um vetursetu fugl að ræða.

Mesta athygli mína í viðtalinu vakti umræða hans um þær tugþúsundir manna sem væru farnir að heimsækja Ísland á ári hverju til þess eins að skoða fugla og mynda þá. Jóhann Óli sagði góð fuglaskoðunarhús vera mesta aðdráttarafl fyrir fuglaskoðara, því þá kæmust þeir mun nær fuglunum en vanalega, bæði til að skoða þá og mynda.

Hér á landi hefur aðeins verið komið upp örfáum fuglaskoðunarhúsum og er til að mynda ekkert slíkt við Mývatn sem er einstakt svæði á heimsvísu hvað varðar fuglalíf.

Við Mosfellingar reystum í haust fuglaskoðunarhús við Leiruvoginn sem er einnig einstakur hvað varðar líflegt fuglalíf og verður spennandi að nýta sér það og sjá þar blómlegt fuglalífið í eins mikilli nálægð og kostur er á.

Ljósmyndina hér að ofan tók Jóhann Óli. Myndina sáum við hjónin á sýningu hans fyrir nokkrum árum og kolféllum fyrir. 

Athugasemdir

[Sigurður Þorsteinsson, 19.3.2009 kl. 07:15]

Sæll Karl

Frábært framtak. Fór inn á vef Mosfellsbæjar og fann ekki hvar þetta fuglaskoðunarhús er. Finn út úr því.

[Ásthildur Cesil Þórðardóttir, 19.3.2009 kl. 09:15]

Þetta er góð hugmynd.  Og svona til að árétta vortilfinninguna, þá eru bloggaranir hér farnir að finna til vorsins einhverra hluta vegna og það er gott.

[Úrsúla Jünemann, 19.3.2009 kl. 12:43]

Fuglaskoðunarhúsið er við Leirvoginn rétt hjá Langatanga (fyrir neðan gólfvallarhúsið). Það er reyndar ekki alveg tilbúið til notkunar, vantar enn upplýsingarmyndir o.fl. En það verður vonandi bráðum öllum fuglavinum til gagns og gamans.

[Lana Kolbrún Eddudóttir, 20.3.2009 kl. 00:30]

Tengdafaðir minn, sem er mikill fuglaáhugamaður og göngugarpur, fullyrðir að 4-6 lóur hafi haft vetursetu á Seltjarnarnesi í ár. Hann hafi margsinnis séð  þær og heyrt í þeim, á leirum í nánd við golfvöllinn. Hvað segja fuglafræðingar um þetta ?