Var þetta fræga jólalag samið í Mosó?

Ég set hér inn eina ársgamla færslu því brátt mun nú gamla Brúarlandshúsið fá að nýju sitt gamla hlutverk, að vera skólahús.

Á stríðsárunum voru fjölmargir hermenn, bandarískir og breskir með sínar bækistöðvar í Mosfellsbæ. Enn í dag má sjá merki þess t.d. á Ásunum við Þingvallaafleggjara en þar eru enn rústir af gömlu sjúkrahúsi. Margar sögur hafa verið skrifaðar af hjúkrunarkonu sem starfaði þar og talið er að sé þar en á sveimi.  

Á Brúarlandi hjá ömmu Kristínu og afa Lárusi var einnig fjöldi hermanna með sitt athvarf og hefur mamma sagt mér margar skemmtilegar sögur frá þeim tíma. Þá var mamma lítil stelpa, hún er næst yngst í stórum systkinahópi. Brúarland er eitt fallegasta hús okkar Mosfellinga og frá þessu gamla skólahúsi eiga margir Mosfellingar fallegar og góðar minningar.

Nú ári eftir að ég skrifaði þessa færslu mína er þetta gamla fallega hús að fá sitt gamla hlutverk aftur. 

Nýlega sagði góður vinur minn mér skemmtilega sögu, hafða eftir föður sínum, að einn af þeim hermönnum sem hafi verið í Mosfellsbæ á þessum tíma hafi verið Lee Roy Anderson. Lee Anderson samdi skömmu síðar eitt frægasta og fallegasta jólalag allra tíma sem ég læt hér fylgja með í stórkostlegum flutningi Ellu Fitzgerald. Njótið vel.

Þessi mynd af gamla Brúarlandi er fengin frá Sigurði Hreiðari. Hann á stórt og mikið safn ljósmynda og er mikil fróðleiksnáma um gamla tíð í Mosfellssveit.

  

Athugasemdir

[Guðbjörg Elín Heiðarsdóttir, 6.12.2008 kl. 00:41]

Frábært að sjá þessar fréttir um gamla Brúarlandshúsið og verðandi menntaskóla í Mosó. Hvernig væri að gera jólaland ( hátíð ) í Álafosskvosinni og tengja hana í ( við ) gamla Brúarlandshúsið í Mosó í hverjum desember ár hvert, og hafa Lee Anderson svífandi þar yfir með sínu fallega jólalagi ásamt heitu kakó og jólasmákökum.  Bara smá hugmynd sem gæti gert smá jóla - lukku í hjörtum okkar, fyrir jól ár hvert. 

[Björgvin R. Leifsson, 6.12.2008 kl. 10:54]

Til hamingju Mosfellingar - en verður þetta bráðabirgðahúsnæði ekki strax of lítið næsta haust? Svo er eftir að sjá hverjar efndirnar verða hjá íhaldinu sbr. trakteringarnar, sem Fjallabyggð hefur fengið.

[Þráinn Árni Baldvinsson, 9.12.2008 kl. 18:37]

Gaman að þessu!