Það á ekki að lögleiða reiðhjólahjálma

Ég horfði einu sinni sem oftar á bráðskemmtilegan þátt Gísla Einarssonar fréttamanns, Út og suður, á sunnudaginn var. Þar tók Gísli viðtal við greinileg mikinn og góðan hugsjónamann, Magnús Bergsson rafvirkja og reiðhjólamann. Viðtalið var sérlega skemmtilegt og áhugavert. 

Eins og gefur að skilja snérist viðtalið að mestu um áhuga Magnúsar á hjólreiðum. Magnús sagði reiðhjólið hafa opnað fyrir sér nýja heima þegar hann eignaðist það fyrst um fermingu en frá þeim tíma hefur hann notað það sem sinn aðal ferðamáta. Geri aðrir betur. 

Í viðtalinu sagði Magnús þetta áhugamál sitt í dag fyrst og síðast snúast um umhverfismál þrátt fyrir að hafa ekki litið á það þannig í upphafi.

Eins og áður segir fannst mér viðtalið sérstaklega skemmtilegt og áhugavert og satt að segja langaði mig mest að öllu, eftir að hafa heyrt það, að fara í næstu hjólreiðaverslun og festa kaup á góðu reiðhjóli.

Eitt var það þó í viðtalinu sem kom mér verulega á óvart og var það skoðun Magnúsar á notkun reiðhjólahjálma. Hann sagðist á móti lögleiðingu þeirra á alla aldurshópa. Þá varð ég hissa.

Ástæðu þess nefndi hann m.a. að notkun þeirra gerði það að verkum að hjólreiðamönnum fækkaði.

Fyrir mér er nóg til að réttlæta notkun hjálmsins öll þau slys þar sem hann hefur sannarlega bjargað mannslífi. Nærtækast fyrir mér er slys sem einn af mínum bestu vinum lenti í ekki alls fyrir löngu þar sem sannað er að hjálmurinn bjargaði hans lífi. Reiðhjólamönnum hefði fækkað um einn ef hann hefði ekki haft hann á kollinum þá.

Þessa skoðun Magnúsar skil ég satt að segja ekki og er í raun búin að velta fyrir mér allt frá því ég sá þáttinn.

Annars takk fyrir sérstaklega skemmtilegan þátt.

Athugasemdir

[Bjarni (IP-tala skráð) 9.9.2008 kl. 22:52]

Landssamband hjólreiðamanna leggst held ég gegn lögleiðingu hjálma af þeirri ástæðu að þeir auka ekkert öryggi hjólreiðamanna. T.d. komst prófessor nokkur að því að ef að hann var með hjálm í umferðinni var honum sýnd minni virðing en ef hann var ekki með hjálm.

Notkun hjálma er að sjálfsögðu skynsamleg en notkun þeirra á bara að vera bundin við heilbrigða skynsemi, ekki í lög að mínu mati.

Hendi hérna inn einum tengli sem ég fann í fljótu bragði ...
http://www.lhm.is/content/view/172/153/

Finnur eflaust söguna um prófessorinn þarna ...

[steinimagg, 9.9.2008 kl. 23:33]

Ég hef alltaf notað hjálm og hefur það komið sér vel og er á því að allir eigi að vera með hann.

Notkun hjálma er umdeild og er ég á móti því að setja hjálmanotkun í lög. Þegar menn fara að skoða þau mál þá kemur víst ýmislegt í ljós en það má lesa helling um það á vef Landssamtaka Hjólreiðamanna http://www.lhm.is/