Út markaði ákveðin tímamót hjá okkur

Á árunum 1991 og 1992 hljóðrituðum við hljómplötu sem ber heitið Út. Hún var hljóðrituð í Grjótnámunni og um upptökur sá Jóhann Ásmundsson Mezzoforte bassaleikari. Tengsl okkar við Jóa áttu svo eftir að verða meiri þegar fram liðu stundir.

Þegar hér var komið við sögu var Gulli Falk gítarleikari hættur og við orðnir þrír. Á meðan á upptökum stóð gekk gítarleikarinn Sigurgeir Sigmundsson til liðs við okkur og var það mikill hvalreki fyrir hljómsveitina.

Glæsilegir í karrýúlpunum við rútuna okkar. Eins og sjá má auglýstum við fyrir Samúel.

Á Út plötunni fengum við einnig til liðs við okkur fleiri aðstoðarmenn en vanalega. Allir Mezzoforte strákarnir: Friðrik Karls, Gulli Briem og Eyþór Gunnars koma við sögu á plötunni, það var sannarlega gaman að starfa með þeim. 

Hljómplatan markaði ákveðin tímamót hjá okkur félögunum, tvö lög af henni náðu toppsæti á vinsældarlista Rásar tvö og voru mörg lög af henni spiluð oft á útvarpsstöðvum. Í kjölfarið varð bókstaflega brjálað að gera hjá okkur við tónleikahald og spilamennsku um land allt. Við keyptum okkur stóra Benz rútu og merktum í bak og fyrir, réðum okkur bílstjóra, Loft Ásgeirsson, hljóðmann, Ásgeir Jónsson, söngvara úr Baraflokknum og rótara, Helga Pálsson, með í för var einnig oftar en ekki vinur okkar Billi Start. Þetta var sérlega skemmtilegur og samstilltur hópur. 

Gamli góði hópurinn. Efst til vinstri: Ásgeir, Helgi, Billi og Sigurgeir. Neðri röð: Biggi, Kalli, Þórhallur og Loftur.

Gildran ásamt mökum og aðstoðarmönnum að fagna toppsætinu á Rás Tvö. Myndin er tekin fyrir tónleika á Gauki á Stöng.

Athugasemdir

[steinimagg, 10.8.2008 kl. 01:38]

Áttu rauðu buxurnar ennþá ?

[Karl Tómasson, 10.8.2008 kl. 04:00]

Rauðu buxurnar á ég ekki lengur, því miður en ég á beltið og Hemma Gunn jakkann á næst neðstu myndinni með okkur félögunum. 

Hann var keyptur sérstaklega fyrir upptökur á þættinum hjá Hemma Gunn á tali.

[Jóna Á. Gísladóttir, 10.8.2008 kl. 12:27]

Gaman að þessu.

[Valdi Kaldi, 12.8.2008 kl. 16:39]

Hvaða fermingardrengur er þetta sem stendur þarna á milli Ásgeirs og Billa?

[HP Foss, 12.8.2008 kl. 20:48]

Helv var Billi grannur þarna.