Stórval í 100 ár

Herðubreið er heillandi og þeir eru margir listamennirnir sem hafa glímt við fjallið með pensli sínum. Aðeins tveir listamenn gerðu fjallið að sínu aðal viðfangsefni, það voru feðgarnir, Jón Stefánsson og Stefán Jónsson frá Möðrudal. 

Stefán Jónsson, Stórval eins og hann kaus að kalla sig hin síðari ár tók að mála á gamals aldri. Stefán lék einnig á harmonikku og var mikill áhugamaður um söng. Herðubreið setur sterkan svip á sjóndeildarhring Möðrudalsöræfa, æskuslóðir Stefáns.

Í dag verður opnuð yfirlitssýning á verkum Stefáns í gallerí Turpentine í tilefni aldarafmælis hans.

Þess er ekki langt að bíða að haldin verði sýning á verkum listamanns sem hefur gert Foss á Síðu að sínu aðal viðfangsefni. Nánar um það síðar.

 

Athugasemdir

[HP Foss, 11.7.2008 kl. 18:28]

Já, þá hefði verið gaman að geta sýnt myndina sem ég á eftir listamanninn en hana þurfti ég að selja fyrir skólagjöldum, árið sem ég fékk berklana.

Já, það er gott að eiga góða að .

[Ásthildur Cesil Þórðardóttir, 11.7.2008 kl. 21:14]

Hann var sérstakur karakter hann Stefán

[Gunnar Helgi Eysteinsson, 11.7.2008 kl. 22:28]

Núna verð ég hugsanlega hataður í bloggheimum - Efsta myndin; er dóttir þín búin að gera hana, ef svo er þá er hún flott.

Hinar tvær eru æðislegar...  

[Halldór Egill Guðnason, 11.7.2008 kl. 23:01]

Gunnar.: Þér er hér með úthýst úr bloggheimum....

Ég gleymi hins vegar aldrei sögustundunum með Stefáni, við grásleppuskúrana á Ægissíðunni á sjötta áratugnum, þegar hann lýsti fyrir okkur strákhvolpunum, hrikalegri reið sinni á gæðingi miklum, sem reyndar lemstraði karlinn að lokum svo illa, að hann gekk ekki alveg heill til skógar það sem hann átti eftir ólifað. Barnslega einlægur, einfaldur og góð sál. Er ákveðinn í að sjá sýninguna. Spurning hvort málverkið "Skemmdar Kartöflur" verði þar á meðal verka. Ef ég man rétt, var það gefið mikilmenni á sínum tíma, en ekkert til þess spurst síðan.

[Gunnar Helgi Eysteinsson, 11.7.2008 kl. 23:04]

[Gunnar Helgi Eysteinsson, 11.7.2008 kl. 23:05]

Einn fáfróður um listaverk spyr; Er efsta myndin virkilega talin list?

[Laugheiður Gunnarsdóttir, 11.7.2008 kl. 23:21]

já Gunnar þetta er íslensk list!

[Halldór Egill Guðnason, 12.7.2008 kl. 00:04]

Gunnar.: Þetta heitir víst "Naívismi" á spekingamáli, sem reyndar útleggst sem barnslegt eða einfalt. annars er allt sem enginn hefur gert áður list Ekki flóknara en það. Listin felst í að láta sér detta það í hug sem enginn hefur áður gert og framkvæma.

[Þóra Sigurðardóttir, 12.7.2008 kl. 01:54]

Gunnar: List er það sem þú upplifir sem list.

Ef þér finnst fyrsta myndin ekki vera list þá er hún það ekki.

Fyrir mér er hún list og Stefán frá Möðrudal, snillingur

[Heidi Strand, 12.7.2008 kl. 11:58]

Myndir Stefáns voru ekki taldar mikil list á meðan hann var á lifi.

[Steinunn Helga Sigurðardóttir, 13.7.2008 kl. 10:54]

hehe, gaman af þessum umræðum hvað er list er spurning sem endalaust er verið að spyrja sig að. ætli stefán frá Mö hafi ekki verið listavek í sjálfu sér og þar að leiðandi séu verkin metin eins og þau eru af sumum. blessuð sé minning hans .

kær kveðja til þín kalli

steina 

[Gunnar Helgi Eysteinsson, 13.7.2008 kl. 22:04]

Takk fyrir svarið Halldór... og Þóra.

Ég veit ekki af hverju en mér finnst einhvernvegin listamenn vera þeir / þær sem geta gert ljósmynd með penna og pappír. Ég á níu systkini  og einn bróðir sem er frábær listamaður (að mínu mati) ... "Ég vill taka það fram að hann hefur engan áhuga á að aðrir skoði verkin hans"... En hann gat frá því hann lærði að halda í penna, teikna fullkomnar myndir, skrifa ljóð o.s.fr. Þegar HANN teiknar abstrakt myndir, er það list í mínum huga og ekki bara vegna þess að hann er skyldur mér. Ég gæti aldrei gert svona mynd eins og bróðir minn gerir - - - - En svona mynd sem er efst í þessari færslu gæti 11 ára sonur minn gert! 

Ps. Ég tek því ekki persónulega ef þú skammar mig fyrir þessa skoðun - ég kannski læri eitthvað.  

[Karl Tómasson, 13.7.2008 kl. 22:37]

Gunnar minn kæri.

Í listinni felast margar gátur, gátur sem við getum ekki leyst og þurfum ekki endilega að geta leyst eða túlkað. Herðubreið er flott á ljósmynd en getur jafnvel verið flottari og gefið mér meira á teikningu eftir dóttur mína.

Bítillinn Paul MC Cartney sagði erfiðara að semja einföld góð lög en flókin. Þannig getur það einnig verið í myndlistinni.

Bestu kveðjur minn kæri frá Kalla Tomm.