Nýtt hjól, ekki samt Velamos eða kopper

Það er gaman að fá nýtt hjól, þá tilfinningu þekkjum við flest. Ég man það eins og gerst hefði í gær þegar ég fékk mitt fyrsta reiðhjól. Það var að gerðinni Velamos, blátt að lit og undur fagurt. Seinna fékk ég svo gírahjól, þriggja gíra sem líktist Koppperhjólunum vinsælu sem komu örlítið síðar á markaðinn.

Stulli frændi var á fraktskipi og pabbi fékk hann til að koma með eitt slíkt fyrir örverpið sitt frá Ameríku. Mitt hjól var eins og áður segir mjög áþekkt Kopper hjólunum vinsælu með gírskiptinguna fyrir miðri stöng, gerfi dempara á framdekkinu og löngum hnakk með baki en með öllu stærra framhjól en á koppernum þrátt fyrir að það hafi verið minna en afturdekkið.

Hjólið mitt vakti strax slíka lukku að ég gat lengi vel selt rúnt á því fyrir einn sleikjó, súkkulaði bita eða eitthvert góðgæti. Nokkru seinna fékk Siggi í Lágholtinu hina vinsælu týpu af kopperhjóli með miklu breiðara afturdekki og minna framhjóli sem hann gat prjónað endalaust á og þar með var allur bisnes úti hjá mér og mitt hjól féll algerlega í skuggann.

Í dag fékk Birna mín nýtt hjól með hvorki meira né  minna en átján gírum og alvöru dempara að framan. Þetta er búin að vera mikill gleðidagur.

Athugasemdir

[Óskar Þorkelsson, 8.7.2008 kl. 22:59]

góður KT, mitt fyrsta hjól var einmitt einnig blatt Velamos hjól.. og helv chopper hjólin skemmdu allt fyrir manni í Eskihlíðinni 1970.. damn

[Steinunn Helga Sigurðardóttir, 9.7.2008 kl. 07:14]

Kæri Kalli til hamingju til litlu dömunar !

ég átti nú bara einhver drusluhjól ! á gott hjól núna sem ég er alltof löt að nota.

en ég hef ákveðið að ég ætla að nota opinberar samgöngur í vinnuna í vetur og þá verður gamla að hjóla á lestarstöðina hérna í bæ. Ég hlakka nú bara til. Leiðin er héðan og til Köge þar sem skólinn er ný fluttur. Ég hjóla á lestarstöðina hérna í Lejre, tek lest til Hóraskeldu, frá Hóraskeldu til Köge frá lestarstöðinni í Köge með strætó að skólanum. Nú er að sjá hvort eg endist í þetta en er með samviskubit yfir náttúrunni blessaðri og ég skulda henni að reyna allavega.

hafðu fallegan dag kæri kalli !

steina 

[Ásthildur Cesil Þórðardóttir, 9.7.2008 kl. 09:13]

Til hamingju með telpuna og hjólið Kalli minn.  Það var til gamalt kvenhjól á mínu heimili þegar ég var um það bil níu ára, ég lærði á það hjól og notaði í mörg ár.  Á meðal annars smá minningaör á hnénu eftir byltu sem ég fékk áður en ég lærði almennilega að halda balans á því.

[HP Foss, 9.7.2008 kl. 17:44]

Ég átti líka svona Vélamos, endist ekki lengi en í dag á ég alvöru hjól, tveggja sylendra Polaris, 800 kúbik, drif á öllum og það eyðir 15 lítrum á hundraðinu.

Já, það er gott að vera til.

[Gunnar Helgi Eysteinsson, 9.7.2008 kl. 18:21]

Fyrst hjólið mitt var hjól sem hægt var að brjóta saman fyrir ferðalög - Það var einn galli við þetta hjól og það var að læsingin sem hélt hjólinu heilu var bilaður - Þetta vakti mikla lukku.

[Laugheiður Gunnarsdóttir, 9.7.2008 kl. 18:22]

Ég man þegar ég fékk loksins hjól úr búð ekki notað eftir systkini mín man að það var rautt og pabbi kom með það alla leið inn í eldhús. Var að skoða heimasíðu Mosfellsbæjar gott framtak hjá ykkur.

[Hulda Bergrós Stefánsdóttir, 9.7.2008 kl. 21:53]

Flott nýja hjólið hennar Birnu.

Mitt fyrsta hjól var rautt Winter (eða eitthvað svoleiðis) þegar það var komið til ára sinna gekk það undir nafninu traktorinn, en Addi bróðir átti eitt af flottustu Cooper hjólunum það var fjólublátt og ef ég man rétt var það keypt fyrir peningana sem hann vann sér inn sem bensíntittur í gömlu Þverholtssjoppunni.

Those wore the days my friend

[steinimagg, 10.7.2008 kl. 08:51]

Munum eftir hjálminum.

[steinimagg, 10.7.2008 kl. 23:11]

Þetta er snilldar tillaga, selja Benzann og kaupa reiðhjól og ekki bara eitt heldur tvö. Eitt með dempurum að framan og aftan til að sportast á um fjöll og firnindi og eitt með Rolhoff drifi til að nota í allt annað allan ársins hring. Kaupa svo bara Trabba og fyrir afganginn.