Horfðu tvisvar

Um nokkurt skeið hafa verið leiknar auglýsingar í útvarpi þar sem skorað er á bílstjóra í umferðinni að gá vel að sér og horfa tvisvar áður en lagt er af stað yfir gatnamót. Þetta eru auðvitað góð skilaboð og orð í tíma töluð nú um þetta leyti þegar mótorfákunum fjölgar með degi hverjum í umferðinni.

Í dag varð ég vitni af því að engu mætti muna að stórslys yrði einmitt vegna þess að svo virtist sem bílstjóri hafi ekki séð mótorhjól sem kom brunandi áður en hann lagði af stað yfir gatnamót. Sem betur fer fór allt vel.

Það sem hinsvegar situr eftir hjá mér, þar sem ég var næstur á eftir bílstjóranum sem ók næstum á bifhjólamanninn, var hraðinn á mótorhjólinu. Hann var sennilega helmingi meiri en leyfilegt er á þessum vegarkafla og langt umfram allt sem yfir höfuð getur kallast skynsemi.

Einhvernvegin virðist sem sumir mótorhjólamenn séu eins og kýr að vori, gersamlega stjórnlausir.

Mótorhjólamenn og auðvitað allir í umferðinni, endilega temprið hraðann.

Athugasemdir

[HP Foss, 14.5.2008 kl. 09:25]

Þá dettur mér nú í hug allir þessir reiðhjólamenn sem silast um bæinn þessa dagana, móðir og másandi. Ráfast út á göturnar, upp á gangstéttar, alveg eins og sá sem valdið hefur.  Það er nefnilega svo kolmagnað að  um leið og fólk er farið úr vélknúna ökutækinu sínu, finnst þeim mörgum að þeirra sé rétturinn og eitthvert hatur myndast út í hina sem áfram aka um á vélknúnum ökutækjum.

Hver hefur ekki orðið var við frekju hestamanna, kolvitlausir út í mótorhjólamenn, eins og þeirra sport sé eitthvað merkilegra?

Hver hefur ekki séð slóðina um hálendið eftir hrossahópa, menn í hestaferðum með tugi hesta, stundum hátt í hundrað?

Þessi "heilbrigða" lína er ekki endilega það sem allir telja heilbrigt, troðandi niður gilbarma og gíga, rífandi upp steina og börð til að drulla undir.

Bönnum gangandi umferð á vorin um viðkvæm svæði, leyfum mófuglinum verpa í friði, látum náttúruna hafa valið á viðkvæmasta tímanum.

þetta er gert í Dyrólaey með góðum árangri og af ástæðu.

[Jóna Á. Gísladóttir, 14.5.2008 kl. 11:54]

Auðvitað eiga barasta allir að fara varlega. Ég er sammála því sem HP foss segir: Það er nefnilega svo kolmagnað að  um leið og fólk er farið úr vélknúna ökutækinu sínu, finnst þeim mörgum að þeirra sé rétturinn og eitthvert hatur myndast út í hina sem áfram aka um á vélknúnum ökutækjum. Sem mér finnst reyndar frekar fyndið.

En varðandi hraðann á sumum mótorhjólaköppum.. þar er nebblega svo mikil hætta á að fjarlægð mótorhjólsins sé rangt metin þegar mikill hraði er á því.

Held að málið sé bara að við flýtum okkur hægt.

[Gunnar Helgi Eysteinsson, 14.5.2008 kl. 16:56]

100% sammála... öllum fyrir ofan.

[steinimagg, 14.5.2008 kl. 21:50]

Já burt með þessa stórhættulegu reiðhjólamenn sem þvælast fyrir út um allt

[Karl Tómasson, 14.5.2008 kl. 22:41]

Bjútífúl bæsekúl, sagði ég einu sinni við túrista fyrir c.a 20 árum þegar Gildran var on ðe rót. Hann var á svakalegu mótorhjóli af stærstu sort. Honum var ekki skemmt. Félögum mínum í Gildrunni fannst brandarinn hins vega mjög góður. Þetta átti ekki að vera brandari hjá mér, ég bara gleymdi mér í enskunni eitt augnablik.

Bestu kveðjur frá Kalla Tomm.