Glímugen

Smá upprifjun um glímuna, því nú er litli frændi og nafni Péturs glímukóngs Eyþórssonar búinn að ná af frænda Grettisbeltinu. Glímukóngur Íslands þetta árið er Pétur Þórir Gunnarsson. Þeir frændur og nafnar eru systkinabörn. Þau eru skemmtileg þessi glímugen.

Glíman er mögnuð íþrótt og í raun ótrúlega flott þegar maður setur sig inn í hana. Einu sinni fór ég á glímuæfingar í kjallaranum í Brúarlandi en þrátt fyrir fjöldann allan af áhugasömum glímumönnum í Mosfellsbæ í þá daga var aldrei stofnuð glímudeild hjá Aftureldingu, ekki frekar en hjá svo mörgum öðrum íþróttafélögum. Mikið væri gaman ef þessi þjóðaríþrótt fengi veglegri sess.

Grettisbeltið er merkasti og sögufrægasti gripur í gjörvallri íþróttasögu Íslands og einnig sá elsti. Hefur það verið farandgripur allt frá upphafi og vinnst aldrei til eignar. Sama ólin fylgir beltinu og var á því upphaflega. Grettisbeltið var smíðað í Reykjavík af Erlendi gullsmið Magnússyni. Það er úr silfri og er mynstur þess mjög skrautlegt. Að framan er á því kringlóttur skjöldur með andlitsmynd er á að tákna Gretti fornkappa Ásmundarson er var fangbragðakappi mikill eftir því sem saga hans segir. Umhverfis skjöldinn er letrað höfðaletri: "Glímuverðlaun Íslands, Grettir." (tilvitnun: Glímusamband Íslands)

Úr Mývatnssveitinni hafa margir fræknustu glímukappar landsins komið. Hver man ekki eftir tvíburabræðrunum Pétri og Inga Þór Yngvasonum frá Skútustöðum? Ingi Þór hlaut Grettisbeltið fjórum sinnum og Pétur fimm sinnum. Minn maður í glímunni var Eyþór Pétursson frá Baldursheimi, það er augljós ástæða fyrir því hjá mér. Ég var í sveit hjá honum í nokkur sumur, það var skemmtilegur tími. Eyþór var af mörgum talinn hafa óhemju fallegan líkamsburð í glímunni. Eyþór hlaut Grettisbeltið tvisvar sinnum. Nú er strákurinn hans, Pétur, búinn að slá pabba gamla út því hann varð Grettisbeltishafi í þríðja sinn nú á dögunum. Hvað ætli pabbi gamli segi við því?

Meðal fræknustu glímukappa á árum áður má nefna Sigurjón Pétursson frá Álafossi. Hann varð Grettisbeltishafi fjórum sinnum á árunum 1910-1913. Ömmubróðir Hjalta Úrsusar Árnasonar, Sigurður Greipsson frá Biskupstungum í Haukadal, hlaut beltið fimm sinnum á árunum 1922-1926 en enginn hefur en slegið Ármann J Lárusson út, hann hlaut Grettisbeltið hvorki meira né minna en fimmtán sinnum á árunum 1952-1967. Það er ótrúlegt afrek.

  

Athugasemdir

[Gunnar Helgi Eysteinsson, 1.4.2008 kl. 06:02]

Takk kærlega fyrir fræðslumolann.

[Ásthildur Cesil Þórðardóttir, 1.4.2008 kl. 13:14]

Glíma er glæsileg íþrótt. 

[Baldur Fjölnisson, 1.4.2008 kl. 21:04]

Skemmtileg og þjóðleg fræðsla. Þakkir.

Með kveðju, Baldur F.

[Jón Birgir Valsson, 2.4.2008 kl. 13:17]

Sem glímumaður þá þakka ég þér Karl fyrir þessa færslu og hlý orð í garð glímunnar.

Ekki vissi ég að glíma hefði verið stunduð í Mosfellsbæ á árum áður. Nema þá ef vera skildi að Sigurjón sem kenndur er við Álafoss hafi staðið að einhverjum glímuæfingum í Álafosskvosinni þegar hann var upp á sitt besta. En gaman að heyra af þessu. Hver var glímukennari þinn á þessum tíma Karl?.

Já Mývetningar hafa alið af sér margan góðan glímumanninn. Nú eru þeir orðnir fimm Glímukóngarnir þaðan. Svo ber að nefna þær Glímudrottningar frá Mývatni sem hafa unnið Freyjumenið þær Inga Gerða Pétursdóttir Yngvasonar 2000 og 2002 og Hildigunnur Káradóttir í Garði 2001. Þarna koma glímugenin aftur við sögu a.m.k. hjá Ingu Gerðu sem ekki bara varð glímudrottning heldur líka fegurðardrottning Norðurlands 2003.