Viðkvæmni

Hvenær er viðkvæmni slæm og hvenær er viðkvæmni góð? Ég held að viðkvæmni sé aðeins slæm þegar fólk sem gagnrýnir óþarfa viðkvæmni er orðið svo viðkvæmt fyrir sjálfu sér að það treystir sér ekki að koma fram á opinberum vettvangi og standa fyrir sínu máli eða skoðunum á mönnum og málefnum nema undir tilbúnum nöfnum og hefur eilíft skoðanir á viðkvæmni annarra.

Það er viðkvæmni, það er slæm viðkvæmni. 

Það er ekkert nema gott um það að segja þegar fólk er viðkvæmt, sama hvaða starfi það gegnir og er ófeimið að láta þær tilfinningar í ljós hvar og hvenær sem er. Það ber eingöngu vott um næmni og umhyggju fyrir umhverfi sínu og öllu því sem því tilheyrir, manneskjum, gróðri og dýrum. 

"Lífið er fagurt, dularfullt og undur viðkvæmt.

En öll fegurð er sársaukafull,

hún dregur úr manni lífskraftinn,

hæðir og gagntekur í senn". 

Mikines  

Athugasemdir

[Steinunn Helga Sigurðardóttir, 25.3.2008 kl. 06:53]

kæri kalli, þetta er fallegt að lesa á þriðjudagsmorgni. viðkvæmni fyrir mér er líka að vera sensitívur, eða næmur á tilfinningar, bæði sínar eigin og annarra. og það er nú bara af því góða. það er hægt með æfingu að breita því að vera viðkvæmur á þann hátt að það hefti mann í umgengni við mannkyn, til að það verði styrkur bæði fyrir sig og aðra.

þetta er allt um að þróa sig sem best til að hjálpa og vera í þessum blessaða heimi, og sumir er þeim kostum gæddir að vera viðkvæmir!

Blessi þig kæri kalli

steina 

[Ásthildur Cesil Þórðardóttir, 25.3.2008 kl. 09:24]

Það er rétt að viðkvæmni sé slæm, þegar hún er farið að há fólki í samskiptum við aðra.  Viðkvæmni er náttúrlega bara tilfinningar sem eru of næmar, stundum þarf maður að búa um þær, svo þær verði ekki fyrir of miklum sársauka.   Allir vita hvernig það er, þegar einhver hittir á viðkvæman blett, eitthvað sem særir mann meira en annað.  Sumt fólk er líka mjög næmt fyrir því að finna þessa bletti og nota þá gegn viðkomandi.  Það verður alltaf óvinsælt, og oftast nær óþarfi.  En það er eitt af því sem við þurfum að læra í lífinu, að vernda tilfinningar okkar, og kunna að loka á, þegar fer að vella upp úr suðupunktinum.