Fréttamatið er oft athyglisvert

Eins og ég bendi á í færslu hér fyrir neðan hefur nú verið undirritaður samningur um byggingu framhaldsskóla í Mosfellsbæ. Þetta eru mikil og stór gleðitíðindi fyrir okkur Mosfellinga. Mbl gerði þessu ágætis skil í gær. Í Fréttablaðinu og 24 stundum var frá þessu greint í smádálk á stærð við eldspýtnastokk og Rúv sá ekki ástæðu til að fjalla um málið.

Í Morgunblaðinu í dag er lögð  hálf síða undir umfjöllun um lagningu göngustígs í væntanlegu Helgafellshverfi. Gunnlaugur B Ólafsson og Sigrún Pálsdóttir hjá Varmársamtökunum gera stórkostlegar athugasemdir við væntanlegan göngustíg þar sem hann verður malbikaður, þau telja að hann eigi að vera stráður trjákurli eða malarstígur þar sem hann liggur á kafla nærri Varmánni. Undir þessa umræðu var lögð eins og áður segir hálf síða í Morgunblaðinu í dag. 

Lagning göngustíga með kurli eða möl í þéttbýli tíðkast ekki í dag árið 2008. Slíkir göngustígar eru ágætir upp í miðjum fjallshlíðum. Göngustígar í þéttbýli eru að sjálfsögðu gerðir með það í huga að gera öllum kleift jafnt, hjólandi, fótgangandi, fólki með barnavagna eða fólki í hjólastólum að ferðast um þá með góðu móti. Ein af náttúruperlum Reykjavíkur er laxveiðiá, meðfram henni eru t.d. malbikaðir göngustígar.

Auðvitað er tætingslegt um að litast á meðan framkvæmdir standa yfir en að sjálfsögðu verður allt lagt í sölurnar til að hafa lokafrágang á göngustígunum eins glæsilegan og kostur er. 

Já, fréttamatið er oft athyglisvert.

Athugasemdir

[Gunnlaugur B Ólafsson, 21.2.2008 kl. 10:31]

Útúrsnúningur með trjákurl og möl. Í aðalskipulagi Mosfellsbæjar er 50 m belti sitthvoru megin Varmár tekið frá til verndunar. Í því samhengi er mikilvægt að vanda til stígagerðar í þeirri merkingu að láta þá falla að landi og landslagi á hófstilltan hátt en ekki uppbyggðan malbikaðan þriggja metra breiðan veg sem gjörspillir upplifun fólks af því litla landi sem átti að halda eftir sem ósnortnu og bjóða bæjarbúum upp á tengsl við náttúruna.

Varðandi möl og trjákurl, þá benti ég á að stígurinn hinum megin Varmár er með fíngerðri möl og lagar sig að landslaginu en eyðileggur það ekki. Einnig benti ég á að trjákurl er á smekklegan hátt sett í stígana í Hamrahlíðarskógi. Jafnvel þó að almennur vilji væri í þá átt að hafa stíga malbikaða, sem ég er ekki viss um, þá ætti að vera nægjanlegt að hafa hann um einn meter á breidd en ekki þriggja metra og sleppa þessari umfangsmiklu undirbyggingu á þessari lífæð bæjarfélagsins.

[Karl Tómasson, 21.2.2008 kl. 10:58]

Þetta er útúrsnúningurinn sem Gunnlaugur B talar um af minni hálfu í færslunni hér að ofan um trjákurl og möl. Þetta er haft orðrétt eftir honum af heimasíðu hans.

"Göngustígurinn sem fyrir er upp með Varmá hefði átt að geta verið fyrirmynd, þar sem fín möl er notuð. Jafnvel hefðu þeir getað farið upp í Hamrahlíðarskóg og séð hversu hlýlegir og skemmtilegir stígarnir þar eru með viðarspæni"

Það er mikill munur á hvort rætt er um göngustíg upp í miðri fjallshlíð eða í væntanlegu þéttbýlishverfi.

Bestu kveðjur frá Kalla Tomm.

[Gísli Baldvinsson (IP-tala skráð) 21.2.2008 kl. 10:58]

Ég hef nokkrum sinnum tuðað um fréttamat Moggans. Hans besta ritskoðun er þöggun. Góður í því.

[Ásthildur Cesil Þórðardóttir, 21.2.2008 kl. 11:56]

Sammála fréttamatið byggist aðallega á því ef einhver ágreiningur eða rifrildi er til staðar.  Annað virðist bara ekki komast að.

[Gunnlaugur B Ólafsson, 21.2.2008 kl. 12:11]

Karl Tómasson lýsti nýlega á útvarpi Sögu að utanbæjarfólk hefði ekki átt að skipta sér af náttúruverndarmálum í Mosfellsbæ. Þar að auki geri ég ráð fyrir að Gísli og Ásthildur hafi ekki farið og kynnt sér þessar framkvæmdir. Því séu þau ekki dómbær á hvað sé fréttnæmt. Þöggun er akkúrat aðferð bæjarstjórnarinnar í umræðu um lífæð okkar Mosfellinga, útivistar- og verndarsvæðið upp með Varmá.

[Gunnar Helgi Eysteinsson, 21.2.2008 kl. 19:46]

[Fjarki , 21.2.2008 kl. 20:27]

Til hamingju með Framhaldsskólann Mosfellingar.

[steinimagg, 21.2.2008 kl. 21:31]

Það eru nokkrir malbikaðir stígar hér í Mosó, gallin er bara sá að þeir eru flestir hálf ónýtir, vonandi munu stígarnir í Helgafellshverfinu endast betur.

[Steinunn Helga Sigurðardóttir, 21.2.2008 kl. 22:47]

líka hjá mér innlitskvitt !

Bless í nóttina

steina 

[Gúnna, 21.2.2008 kl. 23:24]

Verð aðeins að taka þátt í þessari umræðu. Tek undir með þér Kalli - að sjálfsögðu er stór munur á því HVAR göngustígar eru. Ég hef búið í Mosfellsbæ undanfarin 8 ár (Teigahverfi) Stuttu eftir að ég flutti eignaðist ég barn og til að komast upp í miðbæjarkjarna með barnavagn varð ég annaðhvort að ganga eftir akbrautinni (Hafravatnsveginum) eða fara niður í Álafosskvos og undirgöngin - og síðan aftur upp í miðbæ. Reyndar var göngustígur að brúnni góðu yfir Vesturlandsveginn(þar sem nú er Tröllateigur), en sá var algjör torfæra og ekki malbikaður fyrr en löngu síðar. Fyrir þá sem ekki hafa reynt, upplýsist hér með að það er MJÖG erfitt að keyra kerrur og barnavagna þar sem ekki er malbikað. Því er það engin spurning að göngustígar í og við þéttbýlii EIGA að vera malbikaðir. Svo er það líka meira öryggi fyrir hjólreiðafólk, sérstaklega börnin.

Hvernig er það á veturna þegar snjór er og ryðja á göngustígana - ryðst ekki kurlið í burtu líka??

[Karl Tómasson, 22.2.2008 kl. 00:10]

Takk fyrir komuna kæru bloggvinir.

Mætir bloggvinir mínir, Gísli og Ásthildur Cesil voru ekki að leggja mat sitt á göngustíga í Mosfellsbæ. Þau lögðu einungis orð í belg varðandi fréttamat hjá fjölmiðlum eins og Hjördís bendir á.

Í nýlegu útvarpsviðtali við mig sagði ég ekki að utanbæjarfólk ætti ekki að skipta sér af náttúruverndarmálum í Mosfellsbæ. Ég sagði að algengt væri að jafnvel utanbæjarfólk sem ekki þekkti aðstæður blandaði sér í umræðuna. Viðtalið við mig getur hver sem er hlustað á ef vilji er fyrir hendi.

Útúrsnúningar og vonlaus rökstuðningur Gunnlaugs B og félaga í tíma og ótíma eru þeim sem virkilega unna náttúrunni og umhverfismálum, sem snúast ekki einungis um birkihríslur heldur einnig um manneskjur ekki til framdráttar.

Í öllu er hægt að ganga of langt, þegar svo er komið missir umræðan marks og er málefnum ekki til framdráttar.

Gunnlaugur B talar um þöggun. Ég hef reynt eftir bestu getu að taka þátt í umræðu um málefni Mosfellsbæjar á minni síðu og oft hefur hún verið málefnaleg og skemmtileg.

Aðeins úr einum ranni hefur í tíma og ótíma verið reynt að leiða hana í villu vegar með útúrsnúningum og rangfærslum. Það er frá Gunnlaugi B Ólafssyni, varaformanni Varmársamtakanna.

Gúnna, það er akkúrat málið að það er stór munur á hvar göngustígur er.

Bestu kveðjur frá Kalla Tomm.

[Karl Tómasson, 22.2.2008 kl. 01:08]

Ólafur nokkur Ragnarsson umhverfisverndarsinni í Hvarfi studdi heilshugar lagningu tengibrautarinnar í Helgafellshverfi og skrifaði um það nokkrar greinar. Ólafur er íbúi við Varmá en tekið skal fram að það er víðsfjarri fyrirhugaðri tengibraut.

Nú hefur Ólafur miklar áhyggjur af lagningu göngustígs við ánna. Gæti verið að hann óttist að tröllvaxinn göngustígurinn verði jafnvel lagður alla leið að heimil  hans? Ég get sagt honum að það þarf hann ekkert að óttast.

Það vekur hinsvegar athygli mína að hann hefur ekki meiri áhyggjur af Varmá eða umhverfismálum en svo að hann er tilbúinn að reisa hús við bakka árinnar ef hann fær leyfi til. Hér koma nýleg skrif frá Ólafi.

"Ég á sjálfur byggingarlóð sem liggur að Varmá en ég fékk skýr fyrirmæli þess að ég verð að halda mig einhverja tugi metra frá ánni með framkvæmdir, nú ef að allir eru jafnir hér í sveit, bæði jón og blanki jón, þá er aldrei að vita nema ég fái að byggja við ána áður en malbikunarhraðlestin nær stæðinu."

Já!!! það vill enginn fá einhvern ósóma í bakgarðinn hjá sér.

Bestu kveðjur frá Kalla Tomm.

[Gunnlaugur B Ólafsson, 22.2.2008 kl. 01:43]

Kalli, einfalt próf hvort fólk sé náttúruverndarsinnar eða umhverfisníðingar;

1. Ég vil leggja stíg meðfram Varmá eins langt frá bökkum hennar og mögulegt er úr náttúruefnum og að hann lagi sig að landslaginu.

2. Ég vil leggja um meters breiðan malbikaðan stíg eins langt frá bökkum hennar og kostur er og að hann lagi sig að landslaginu.

3. Ég vil leggja þriggja metra breiðan malbikaðan stíg meðfram ánni sem er eins langt frá bökkum hennar og kostur er og lagar sig að landslagi.

4. Ég vil leggja þriggja metra breiðan malbikaðan stíg meðfram ánni og hann má liggja eins nálægt ánni og hentar til að hámarka fjölda lóða, en að hann lagi sig að landinu.

5. Ég vil leggja þriggja metra malbikaðan stíg meðfram ánni og tekið er tillit til óska verktakans um að hafa stíginn eins nálægt og þeim hentar, ásamt því að fullur skilningur sé á því að þeir sem um hann fari verði fyrir sem minnstum óþægindum vegna hæðarmunar og því sé eðlilegt að grjótfylling allt að fjórum metrum að hæð sé sett inn á þetta útivistr- og verndarbelti.

Ef ég skil þig rétt þá ert þú með fullan stuðning við útfærslu 5. Reyndi töluvert til að hjálpa til með því að efla vitræna umræðu um valkosti við lagningu Helgafellsvegar í fyrra, en það gekk treglega. Þessi kvarði gæti hjálpað þér inn í málefnalega umræðu. Þó ég vilji 1, þá get ég sætt mig við 2. En ef lengra er haldið fer ég að verða mjög efins. Gefðu okkur rökstuðning þinn afhverju þú vilt ganga svo langt að styðja útfærslu sem felur í sér mest inngrip og skemmdir á þessu verndar- og útivistarsvæði.

[Ólafur Ragnarsson (IP-tala skráð) 22.2.2008 kl. 02:39]

Þetta var nú ágætis skot hjá þér Kalli ;)......

OK ein staðreynd:  ég studdi tengibrautina því ég sé hana sem illskásta kostinn og hafði frekar áhyggjur af aukinni eldsneytisbrennslu við að þúsundir bíla brunuðu upp brekkuna í átt að þingvallavegi til að komast leiðar sinnar.... semsagt umhverfissjónamið fyrst og fremst.

Tilvitnun þín í færslu mína á bloggi annarstaðar er ágæt, en þar sem ég á þegar hús við Varmá er líklegt  að samhengið hafi verið annað en þú gefur í skyn, og að gefnu tilefni þá er hér öll færlsan í samhengi svona til glöggvunar:

"það er ekki nokkur spurning að það er nauðsynlegt að malbika leiðir í þéttbýli þar sem fólk ferðast með vagna, á hjólum eða línuskautum og þessháttar.  Það sem hér um ræðir í þessu tilfelli er að Varmá  er skilgreind sem verndarsvæði í skipulagi og því er óskiljanlegt að menn skuli ganga fram með þeim hætti að grafa upp jörðina á bökkum árinnar til að leggja malbikaðan stíg.  Ef þörf er á slíku umferðarmannvirki á þessum stað hversvegna er þá stígurinn ekki hreinlega hafður lengra frá árbakkanum, þá værið málið dautt. 

Málið er að það má ekki lengur byggja hús of nálægt Varmá og því er ljóst að ef landeigandinn ætlar sér að hámarka hagnað sinn af landinu þá reynir hann að leggja stíginn eins nálægt ánni og kostur er því ljóst er að hann fengi aldrei leyfi fyrir lóð ármeginn við stíginn..  Þannig að sá sem græðir á því að brjóta skipulag um náttúruvernd er landeigandinn.

Það sem vekur furðu mína er ekki að landeigandi vilji græða og hunsi náttúrna, það er að skipulagsyfirvöld bæjarins sem eiga að vera sá aðili sem passar upp á að menn fari að skipulagi skuli leyfa framkvæmdina á þennan hátt.

Það er þegar malargöngustígur þétt meðfram ánni og engin rök fyrir því að það vanti malbikaða braut svo nálægt önnur en þau að fermetri byggingarlands er um 30,000 kr á þessum stað og eftir miklu að slægjast.

Ég á sjálfur byggingarlóð sem liggur að Varmá en ég fékk skýr fyrirmæli þess að ég verð að halda mig einhverja tugi metra frá ánni með framkvæmdir, nú ef að allir eru jafnir hér í sveit, bæði jón og blanki jón, þá er aldrei að vita nema ég fái að byggja við ána áður en malbikunarhraðlestin nær stæðinu."

En ef að þið Vinstri Græn  komið með malbikaða veginn ykkar meðfram Varmánni heima hjá mér, verð ég þá ekki bara að taka því... það þýðir víst ekki að tauta og raula... þetta eru jú umhverfisáherlur Vinstri Grænna og maður rífst ekki við kommana :)

Kveðja,  Óli í Hvarfi

[Ólafur Ragnarsson (IP-tala skráð) 22.2.2008 kl. 03:02]

Gunnlaugur,  flott upplegg í skoðanakönnun !

Það kemur mér svolítið á óvar að Kalli Vinstri Grænn skuli ekki vera búinn að setja sig upp á móti þessari framkvæmd svona ofan í ánni... það hlítur að vera í lagi að vera með sjálfstæðar skoðanir og áherslur í bæjarstjórn samkvæmt þeim umhverfisáherslum sem Vinstri Græn standa fyrir svona yfirleitt....  ég er nokkuð viss um að innst inni sé Kalli hundóánægður með þetta vinnuvélabrölt hjá Helgafellsverktökum en vilji ekki styggja sjálfstæðismenn.

Kveðja, Óli í Hvarfi

[Guðjón Sigþór Jensson, 22.2.2008 kl. 09:01]

Góðir hálsar: 

Varðandi stígagerð þá eru ýms atriði sem þarf að huga að. Nú hefi eg verið í stjórn Skógræktarfélags Mosfellsbæjar í nær aldarfjórðung og við höfum í því góða félagi mjög oft verið með hugann við stígagerð. Á vegum félagsins hafa verið lagðir stígar bæði um Hamrahlíðaskóginn og eins í Lágafellsásana ofan við Krikahverfið. Víða hefur þurft að sætta sig við lagningu stíga þar sem fjármagn hefur verið takmarkað og því verið fremur lögð áhersla á magn en gæði.

Bratti í landslagi er nokkuð sem þarf að huga mjög vel að. Lagning stíga þar sem bratt er þarfnast sérstakra aðgerða. Ef vel á að vera þarf að grafa frárennsisrás ofan við stíginn og veita vatni undir hann á heppilegum stöðum. Bæði í Hamrahlíð og í Lágafellsásum má sjá hvar við höfum gert alvarleg mistök þar sem bratti er of mikill og vatn hefur skolað stígaefninu í burtu, bæði kurli og malarsalla.

Varðandi stígaefnið þá hefur kurlið þá kosti að það hefur þá eiginleika að vera mjög mjúkt undir fæti. Gott er að ganga eftir slíkum stígum og það hefur reynst t.d. hlupurum mjög þægilegt undirlag. Hins vegar er afleitt að aka barnavagni eða hjóla eftir slíkum stíg einkum þar sem einhver halli er. Kurlið hefur einnig ýmsa ókosti, það er tiltölulega dýrt og þarfnast oftar endurnýjunar en annað stígaefni. Þá getur stafað slysahætta af því t.d. fyrir hlaupara.

Mölin fíngerða eða öllu heldur malarsallinn eins og Gunnlaugur bendir á í athugasemdum sínum hefur einnig marga kosti. Í þurrviðri koma kostir hennar einna best fram en í votviðri getur mölin orðið að hinu versta foraði. Ef einhver fer eftir slíkum stíg og skilur eftir sig djúp för og allt þornar þannig, þá verður stígurinn mjög slæmur yfirferðar enda tekur oft nokkurn tíma að misjöfnunar afmáist. Eftir því sem stígurinn er breiðari því betur verður að ganga frá undirlagi og að drena hann vel. Sérstaklega þarf að huga að koma í veg fyrir að vatn geti runnið inn á stíginn en slíkt getur orðið slæm slysagildra einkum í frostum.

Nú munu vera til ágætir staðlar um gerð göngustíga. Með því að hafa þennan stíg upp með Varmá breiðari en þann einfalda og frumstæða stíg sem fyrir er sunnan við ána, þá er væntanlega verið að uppfylla þær kröfur sem Evrópusambandið gerir. Með því að hafa þennan stíg bæði breiðan og gerðan með varanlegu efni, malbiki, þá eru bæjaryfirvöld að sýna mikilvæga framsýni í þessu máli. Það er ekki verið að efna til bráðabirgðaframkvæmda heldur eru þær greinilega hugsaðar til lengri tíma. Stígarnir t.d. í Fossvogi í Reykjavík eru 2,5 - 3ja metra breiðir, tvískiptir fyrir gangandi og hjólandi. Þeir eru mjög vinsælir og nú þarf að bæta úr og gera annan stíg til að anna þeirri umferð gangandi og hjólandi.

Við eigum að huga meir að framtíðinni en ekki vera bundin við líðandi stund með þrasi og masi. Þessi „umtalaði“ göngustígur á ábyggilega eftir að verða mjög vinsæll og vonandi þegar fram líða stundir verði vinsælt að staldra við á væntanlegu kaffihúsi neðan við Álafoss, njóta góðra veitinga og hvíla lúin bein eftir göngu upp og niður með Varmánni. Þá verður sú starfsemi sem nú er vísir að í Álafosskvosinni vinsæll og mikilvægur áningarstaður.

Með þeirri ósk að allir geti átt góðar stundir á vönduðum og varanlegum göngustígum við Varmána.

Bestu kveðjur

Mosi - alias

[Gunnlaugur B Ólafsson, 22.2.2008 kl. 09:33]

Guðjón þó! Ert þú semsagt í númer 5 á skalanum náttúruverndarsinni - umhverfisníðingur. Gerir enga fyrirvara við þetta ofvaxna inngrip í náttúru Varmársvæðisins. Ekki hefði ég trúað því að seta VG í bæjarstjórn gæti blindað þitt náttúruverndarhjarta svo að þú viljir láta malbikið flæða út á bakka Varmár.

Hefur þá hverfisverndin enga þýðingu? Snýst náttúruvernd ekki um fram tíðinna á nytjahyggjan að vera svona miklu æðri verndarhyggjunni í þinni framtíðarsýn? Er framtíðin fólgin í því að verktakar fái frítt spil inn á verndarsvæðum? Váááá ...... ! Ekki vil ég vera í þessu framtíðarlandi.

[Ólafur Ragnarsson (IP-tala skráð) 22.2.2008 kl. 10:47]

Sæll Guðjón og takk fyrir góða grein um stígamál.

Það sem hér um ræðir er mjög einfalt og fjallar um það hversvegna slík framkvæmd er leyfð á bökkum Varmár sem er skipulagt verndarsvæði, nú eða það hvers vegna skipulagsaðilar hafa ekki gengið þá hreint fram og hreinlega endurskilgreint skipulagið og fellt niður verndunarákvæði svæðisins.  Þetta er hreinn skrípaleikur, menn geta ekki bæði haldið og sleppt.

Ef að skipulagsyfirvöld fara ekki að eigin skipulagi og brjóta eigin reglugerðir, ber okkur íbúum þá að fara að reglum, þetta er fordæmisgefandi og eftir höfðinu dansa limirnir.

Ef að malbiksvegurinn hefði verið færður 50 metra frá bakkanum væri málið dautt og allar þarfir uppfylltar, gleymum ekki að það er þegar malarstígur þétt við ána sem þjónar vel sínum tilgangi.

Óli í Hvarfi

[Ólafur Ragnarsson (IP-tala skráð) 22.2.2008 kl. 14:10]

Hjördís, það er nokkuð ljóst að þú berð ekki hlýjan hug til þeirra sem eru ekki að syngja í kórnum og allt í lagi með það.... EN hver er yfirhöfuð málefnaleg afstaða þín... svona í nokkrum orðum.

T.d :

A.  Ég vil að verndarákvæðum við Varmá verði aflétt af skipulagi og síðan malbika braut meðfram Varmá.

B.  Ég vil að malbikuð braut sé lögð um Varmá en er alveg sama þó að farið sé á skjön við verndunarákvæði skipulags.

kveðja, Óli í Hvafi

[Guðjón Sigþór Jensson, 22.2.2008 kl. 14:57]

Góðir hálsar

Varðandi síðustu yfirlýsingu Gunnlaugs hér að framan má benda á að hann hefur lýst aldeilis yfir því að „kofana“ við Laugaveg 4 og 6 mætti gjarna rífa! Kannski það sé í samræmi við alla yfirlýsingagleðina sem virðist hrjá suma Samfylkingarmenn þessa dagana. Mér finnst það miður að menn séu ekki samkvæmir sjálfum sér.

Mosi

[Gunnlaugur B Ólafsson, 22.2.2008 kl. 17:04]

Guðjón, góður háls sjálfur

Þú ferð ekki rétt með, ég taldi ekki verðmæti í húsunum sjálfum en mikilvægt væri að varðveita götumyndina og koma í veg fyrir að í stað 18 aldar götumyndar kæmi fjögurra hæða steypuferlíki. Fékk stuðning í athugasemdum við mín viðhorf frá Torfusamtökunum að málið snérist fyrst og fremst um götumyndina en ekki húsin sjálf. Tillögur Torfusamtakanna að endurbyggingu gera ráð fyrir að undir húsin komi önnur hæð eða að það verði byggð ný hús sem taki mið af húsunum ofan og neðan við, sem ég tel að væri skynsamlegasta lausnin. Allir sjá að húrsin sjálf eru nánast ónýt.

Þannig að ég tel það mikilvægt í pólitík að hafa hugrekki til að taka afstöðu út frá forsendum hvers máls í stað þess að byggja afstöðu sína á einhverjum klisjum sem hafa svo enga innistæðu þegar á reynir. Ég er ekki enn búin að sjá rökstuðning fyrir því að fórna verulegum hluta af verndarbeltinu upp með Varmá undir þessa ofvöxnu og útblástnu, malbikuðu og uppbyggðu braut sem kölluð er göngustígur. Ég er alveg til í að skipta um skoðun ef einhver getur sannfært mig um að þetta hafi verið nauðsynlegt.  Þú ert ekki búin að því.

                     Með hlýhug og góðri kveðu,

                                               Gunnlaugur 

[Linda Björk Ólafsdóttir, Kjalarnesi (IP-tala skráð) 22.2.2008 kl. 17:55]

Kalli

Tekurðu eftir því að allt í einu er verkfræðingurinn Valdi Sturlaugz orðinn öllum hnútum kunnugur í bókmenntafræðikennslu Njarðar P í HÍ?

Þetta minnti mig á að Hulda Hansdóttir nefndi það á sínum tíma að skrifin þarna inni væru lík skrifum Kristínar Pálsdóttur sem einmitt er bókmenntafræðingur og því líklegast kunn kennsluháttum Njarðar.

Einnig hefur Valdi stundum talað um: "hér í bænum", og á þá við Mosfellsbæ. Skrýtið þar sem maðurinn segist vera búsettur í Reykjavík. Kannski þeir sem skrifa rullu Valda muni ekki alltaf nógu vel hver er hvað í hverju þarna. En þetta gerist auðvitað þegar margir reyna að vera á einum stað í einu, þegar ein manneskja er leikinn af mörgum.

Vildi bara benda þér á þetta.

[steinimagg, 22.2.2008 kl. 19:23]

Vá, er einhver sem hefur nennt að lesa þetta allt ?

[Guðjón Sigþór Jensson, 23.2.2008 kl. 00:24]

Leyfist mér að spurja: kvur er þessi Valdi Sturlaugs? Á kvurs vegum er hann og kvaða umboð telur hann sig hafa til að ala á tortryggni meðal góðra manna og kvenna í Mosfellssveitinni? Er hann annars lífs eða liðinn eða hefur kannski hans persóna aldreigi verið til? Eða er búið að kasta síðustu rekunum á þann kúnstuga mann sem virðist helst hafa þrifist í skugganum og þá hjá kvurjum? Mér skilst að hann sé kvurki í þjóðskránni né þeirri skrá yfir útlenda starfsmenn sem svonefndar starfsmannaleigur nefnast - eða kvað svosem það kann að  nefnast nú á dögum? Jafnvel þó svo að hann hafi verið að elta einkvurjar ólar við einkvurja í Mosó.

- Kvur hefur annars mokað þessa hóla?

- Mætti biðja um að kippa þessari umræðu ögn á hærra plan, ha? 

- Mér datt það sisvona í hug - Mosi