Glæsilegt þorrablót Mosfellinga

Það er óhætt að segja að vel hafi tekist til hjá þeim sem stóðu að þorrablóti Mosfellinga sem haldið var í íþróttahúsinu að Varmá á laugardaginn var. Sú vinna sem undirbúningsnefndin lagði á sig dag og nótt til að gera þetta að glæsilegri samkomu tókst eins og best verður á kosið.

Ég vil nota tækifærið og óska þorrablótsnefndinni og öllum þeim sem að þessu komu innilega til hamingju og þakka fyrir mig. Þetta er lang fjölmennasta þorrablót sem haldið hefur verið í Mosfellsbæ og voru gestir um 1000 í húsinu þegar mest var.

Það eitt að bregða sér á barinn gat tekið 30 mínútur. Ekki það að afgreiðslan á veigunum tæki svo langan tíma, það var öðru nær, hún gekk hratt og vel fyrir sig. Ástæðan var, að maður hitti svo marga góða sveitunga á leiðinni sem gaman var að ræða við.

Þarna gekk allt upp, vel að öllu staðið og góðir gestir til fyrirmyndar allt til enda. Það er óskandi að þessi hátíð verði árlegur viðburður í Mosfellsbæ hér eftir.

Á myndinni má sjá veislustjórana Simma og Jóa, sem fóru á kostum, taka við Aftureldingartreyju frá Pétri formanni knattsspyrnudeildar og þorrablótsnefndina á sviðinu.

Athugasemdir

[Halldór Egill Guðnason, 29.1.2008 kl. 23:32]

Maður mætir næsta ár, svo mikið er víst. Kveðja úr Leirutanganum.

[Karl Tómasson, 30.1.2008 kl. 01:01]

Það verður gaman að sjá þig og þína á næsta ári Halldór, þú áttir nú reyndar glæsilegann fulltrúa að þessu sinni.

Anna mín, takk fyrir góðar kveðjur á dögunum. Þorrablót Dalbúa er frábær skemmtun og þar hef ég bæði skemmt með hljómsveit minni og verið gestur. Blótið stækkar með ári hverju og að þessu sinni og í þessum töluðu orðum er ég að leggja lokahönd á Dalalæðuna sem þú þekkir nú vel og ert m.a. með fína og fróðlega grein í að þessu sinni. Dalalæðan sem Bjarki vinur okkar Bjarna hefur gefið út í rúma tvo áratugi kemur alltaf út fyrir þorrablót Dalbúa.  

[Steinunn Helga Sigurðardóttir, 30.1.2008 kl. 07:31]

hef nú ekki farið á þorrablót í mörg ár, læt hann gunna minn um það, hann gerir alltaf matinn á þorrablótum í kaupmannahöfn.

Kærleikur og Ljós til þín kæri kalli 

[Herdís Sigurjónsdóttir, 30.1.2008 kl. 15:02]

Þetta var meiriháttar þorrablót félagi og verður ekki síðra næsta ár. Takk fyrir spilið, þið Hilmar voruð flottir.

[Gísli Baldvinsson (IP-tala skráð) 30.1.2008 kl. 19:02]

Geri ráð fyrir að þorrablót dalbúa sé ekki síðra. Þú ert í beinni kl 21 hjá mér í kvöld. Heiðursboðinn hér með.

[Ásthildur Cesil Þórðardóttir, 31.1.2008 kl. 13:18]

Þorrablót eru æði.  Slík hafa  verið hjá mér frá því að ég man eftir mér.  Fyrst bara heima, þá var langborð fullt af gestum og Gunna afasystir mín flutti ljóð, löng og gerði það vel, síðan var öllu rúttað út úr stofunni og Finnbjörn málari var kominn með harmonikkuna, fyrstu árin voru við látin fara að sofa þegar hér var komið sögu, en þegar við urðum aðeins eldri fengum við bróðir minn að taka þátt í dansinum, þar lærði ég að dansa vals, polka, ræl og alla gömlu dansana.  Þvílíkt fjör.  Svo varð þetta algengara og þá var farið út í félagsheimilin og dansstaðina með þessi þorrablót. 

[Gunnar Helgi Eysteinsson, 1.2.2008 kl. 23:11]

Maður finnur fyrir öfund...