Löng bið eftir öli

Er það forsvaranlegt að þurfa að bíða í tugi mínútna eða jafnvel klukkustundir eftir afgreiðslu? Nei, ég held að flestir séu sammála um að það þætti ekki góð þjónusta í dag. Flestir sætta sig við einhverjar tafir hjá tannlækninum, heimilislækninum eða hárskeranum en slík bið getur einnig reynt á þar. 

Nú þegar blessuð jólin nálgast þá var mér hugsað til þess þegar ég fór með pabba að ná í jólaölið í Ölgerð Egils Skallagrímssonar sem þá var í Þverholti. Mikið óskaplega var það stór partur af jólunum og allri stemningunni í kringum þau að standa með pabba í röðinni í langan tíma með tvo brúsa og bíða eftir því að fá þá áfyllta. Ég man að okkar brúsar voru hvítir með rauðum grófriffluðum töppum. Það voru allar gerðir af brúsum í röðinni og engir eins.

Iðulega voru brúsarnir geymdir utandyra og mér er minnisstætt að þeir voru orðnir nokkuð bólgnir þegar lýða fór á jólin.

Í minningunni er þetta fallegur og skemmtilegur tími og öll biðin vel þess virði.

 

Athugasemdir

[Hulda Bergrós Stefánsdóttir, 5.12.2007 kl. 23:11]

Þetta var bara hluti af jólunum og biðin var alveg þess virði  

[Halldór Egill Guðnason, 5.12.2007 kl. 23:25]

Nú nennir enginn að bíða eftir neinu. Meira að segja farnir að selja malt og appelsín blandað í dósum. Eiginlega engin þolinmæði til að bíða eftir jólunum heldur. Þeir alhörðustu(IKEA) starta þeim í október. Þegar þau svo loks koma, eru margir orðnir dauðþreyttir á þeim og eftirvæntingin orðin að pirringi.

[Ingigerður Friðgeirsdóttir, 5.12.2007 kl. 23:30]

Já ég man vel eftir þessari bið við Ölgerðina alltaf viss stemning svo var nú beðið líka við Frón kexverkssmiðjuna og keyptar kökur í hvítum fötum þetta voru góðir tímar og mikil þolinmæði til.

Bestu kveðjur Ingigerður. 

[Hvíti Riddarinn, 6.12.2007 kl. 00:33]

Eins og maðurinn sagði:

Ef öl er böl,
þá er sandur möl

[Ásthildur Cesil Þórðardóttir, 6.12.2007 kl. 13:55]

Eða stóri bréfpokinn fullur af eplum og annar af appelsínum, þá var skammtað á heimilin eftir stærð fjölskyldunnar, eplum og appelsínum, það var jólalyktin í þá daga. 

[Mummi Guð, 6.12.2007 kl. 15:26]

Vá hvað ég man eftir þessu. Mér fannst biðin ekki löng sennilega vegna þess hvað þetta var spennandi. En eftir að hyggja þá var þetta löng bið.

[Gunnar Helgi Eysteinsson, 6.12.2007 kl. 17:03]

Ég man eftir þessum brúsum. Ég finn lyktina og er komin í jólafíling.. takk Karl