Ekki var Jussi síðri

Athugasemdir

[Ómar Ragnarsson, 14.11.2007 kl. 23:44]

Ég kann alltaf betur og betur að meta Jussi eftir því sem árin líða.

Tvennt átti þátt í því að hann náði ekki að heilla mann eins mikið á þeim tíma sem hann var á lífi og nú.

Hið fyrra var að Benjamino Gigli naut þess að vera frá Mekka óperusöngsins, Ítalíu, og hafði lag á því að syngja lög sem voru í ætt við dægurlög eins og Poppa Piccolino (Bjössi á mjólkurbílnum) eða lagið Mama.

Þegar ég var að komast til vits og ára var Jussi búinn að lifa sitt fegursta og hitt atriðið sem skaðaði orðstír hans hér var það að á leið frá Ameríku til Svíþjóðar millilenti hann í Reykjavík og hélt tónleika í Þjóðleikhúsinu, ferðaþreyttur, áhugalaus og timbraður og hneykslaði með lélegri frammistöðu.

Kannski mætti nefna þriðju ástæðuna, að við Íslendingar héldum að sjálfsögðu á þessum tíma upp á okkar þjóðarstolt, hinn bjarta skagfirska tenór Stefán Íslandi og áttum ef til vill erfitt með að viðurkenna að Jussi væri betri.  

Það var synd að Íslendingar skyldu aðeins kynnast honum þegar hann var að verða skugginn af sjálfum sér, hann drakk of mikið og brann upp langt um aldur fram. En hvílíkur kyndill á meðan á því stóð!

En þegar horft er á upptökur af Jussi á hátindi ferils síns minnir það á Pavarotti, svo ótrúlega áreynslulaust og fullkomið að ekki sé minnst á fegurð raddarinnar.   

[Eyþór Árnason, 14.11.2007 kl. 23:52]

Jussi hafði rödd sem aðeins englar hafa. Kannski taka hann og Stebbi einn og einn dúett saman þegar haldin eru þorrablót á himnum.

[Ómar Ragnarsson, 14.11.2007 kl. 23:56]

Ég sé hér eitt þegar ég glugga aðeins betur í feril Jussa að enda þótt áfengissýkin gerði honum æ erfiðara um að halda dampinum blossaði snilldin upp af og til allt fram í andlátið 1960, þegar hann lést aðeins 49 ára.

Pavarotti taldi hann bestan af fyrirrennurum sínum og kvaðst taka hann ér til fyrirmyndar.  

[Sigrún Ólafsdóttir (IP-tala skráð) 15.11.2007 kl. 00:00]

Þakka þér Karl fyrir að setja þetta myndband með þessum mikla söngvara. Á mínu heimili ólst ég upp við að hið fallega lag, Ó helga nótt var alltaf leikið með honum á jólunum. Ómar Ragnarsson þetta var fróðleg lesning hjá þér.

Takk fyrir Sigrún Ólafsdóttir.

[Karl Tómasson, 15.11.2007 kl. 00:17]

Ég tek undir orð Sigrúnar og þakka þér Ómar þitt innlegg, það var fróðlegt. Ómar þú nefnir m.a. Pavarotti og hrifningu hans á Jussi, ég tel mig einnig sjá áhrif Jussi á Pavarotti í framkomu og líkamsburðum við sönginn.

Ég ólst upp við mikla tónlist á mínu heimili en á fyrst og síðast áhuga mínum á óperusöng að þakka tengdaföður mínum sem var og er mikill óperu- og tónlistar áhugamaður.

Sigrún, talandi um hið undur fagra lag, Ó helga nótt þá hefur það einnig oft verið leikið í jólaboðum hjá mínu fólki og það færist yfir alla mikil og heilög jólastemning þegar það er gert. Ég var satt að segja að hugsa um að setja það inn en taldi það ekki hæfa og vera of snemt.

Stebbi, minn gamli félagi úr bransanum, hver veit nema að við eigum eftir að fara á þorrablót með þeim félögum. 

[Laugheiður Gunnarsdóttir, 15.11.2007 kl. 09:55]

Jussi var alveg frábær og gaman að sjá myndbandið

[Kristín Björg Þorsteinsdóttir, 15.11.2007 kl. 15:17]

Stórkostleg rödd - einstök heiðríkja og birta....