Velheppnaður aðalfundur VG í Mosfellsbæ

Rétt í þessu var velheppnuðum aðalfundi Vinstri grænna í Mosfellsbæ að ljúka. Sérstakur gestur fundarins var Guðfríður Lilja Grétarsdóttir varaþingmaður í Suðvestur kjördæmi.

Ólafur Gunnarsson formaður hóf fundinn á því að fara yfir þau mál sem hæst hafa borið undanfarið ár og að því loknu fóru fram opnar umræður um þau. Þar báru hæst, velferðamál, fræðslumál og umhverfismál.

Guðfríður Lilja hélt í lok fundarins tölu og talaði m.a. mikið um fræðslumál. Guðfríður Lilja bar fundinum einnig góðar kveðjur frá flokksforystunni og sagði samstarf okkar við Sjálfstæðisflokkinn í meirihluta bæjarstjórnar Mosfellsbæjar hvarvetna vekja mikla athygli og með því væri fylgst. Hún sagði einnig að samstarfið gengi augljóslega vel þrátt fyrir mismunandi áherslur í mörgum málaflokkum.

Þetta er fjölmennasti aðalfundur frá stofnun Vinstri grænna í Mosfellsbæ og aldrei hafa félagsmenn verið fleiri. Það gefur okkur byr í seglin og sýnir sterka stöðu flokksins í bænum og að starfið gengur vel.

Athugasemdir

[Gunnlaugur B Ólafsson, 8.11.2007 kl. 07:54]

"Þetta er fjölmennasti aðalfundur frá stofnun Vinstri grænna í Mosfellsbæ og aldrei hafa félagsmenn verið fleiri".  Veit að lítið þarf til að gleðja, samanber stórsigurinn sem var 9% í síðustu sveitarstjórnarkosningum.

Hvað mættu margir? Þú varst man ég í vor rausnarlegur á að útbúa dánarvottorð til handa íbúa og umhverfissamtökum hér í bænum eftir fund þar sem mættu tæplega 70 manns. Taldir það sönnun þess að samtökin væru búin að vera. Náðirðu eigin lífsmarksviðmiði?

Er fullkunnugt um að Guðfríður Lilja er glæsilegur kvenskörungur, en hef ekki hugmynd um hver erindi ykkar eru í bæjarmálum Mosfellsbæjar.

[Guðfríður Lilja (IP-tala skráð) 8.11.2007 kl. 13:03]

Kæri Kalli,

bestu þakkir fyrir síðast, þetta var góður og skemmtilegur fundur með áhugaverðum umræðum og það var gaman að koma til ykkar. Gangi þér og ykkur sem allra best og verið trú ykkar sannfæringu hvað sem á dynur!

Guðfríður Lilja

[Þorkell Sigurjónsson, 8.11.2007 kl. 16:50]

Ber er hver að baki nema bróðir sér eigi.  Kveðja.

[Karl Tómasson, 8.11.2007 kl. 19:19]

Heil og sæl Guðfríður Lilja og takk fyrir síðast.

Það var gaman að fá þig í heimsókn og hlusta á áhugaverða ræðu þína og hvetjandi kveðjur frá þér og forystunni til handa okkur Vinstri grænum í Mosfellsbæ.

Heill og sæll Þorkell. Þetta eru orð að sönnu.

Bestu kveðjur frá Kalla Tomm úr Mosó.

[Guðjón Sigþór Jensson, 8.11.2007 kl. 20:53]

Jú þetta var ágætur fundur þar sem við bárum saman bækur okkar eftir venjuleg aðalfundarstörf. Margt er sem þarf aðhuga að í starfinu, verkefnin mörg og sum allsnúin. En innan raða okkar er margt hæfileika fólk, úrræðagott og með frjóa og víðsýna hugsun sem er mikilvægara en að vera bæði seint og snemma að agnúast yfir og skattyrðast út af einhverju hismi. Við verðum að líta heildstætt yfir vettvanginn en ekki gleyma okkur yfir smærri verkefnunum sem oft leysast af sjálfu sér.

Mosi - 

[Herdís Sigurjónsdóttir, 10.11.2007 kl. 09:11]

Maður kemst ekki á bloggið í viku og sjálfsögð kurteisi að kvitta þegar búið er að lesa viku skammtinn.

Annars er alltaf pínulítið skondið eða sorglegt eftir því hvernig á það er litið þegar fólk sér ekki það sem verið er að gera í bæjarmálunum hjá okkur Kalli, það eru fá sveitarfélög ef nokkur sem eru að fara í aðrar eins framkvæmdir og Mosfellsbær.

Hjördís, ég er að hugsa um að fá lokasetninguna þína að láni í ritgerð sem ég er að fara að skrifa um mannhverf viðhorf í siðfræði náttúrunnar ...