Þetta er nú eitthvað annað en stanslausa stressið og geðveikin í bænum

Fyrir nokkrum árum síðan vorum við félagarnir á ferð um landið að skemmta. Eins og gengur og gerist var heilmikið spjallað í rútunni og oft hlegið mikið. Eitt að því sem við ræddum einu sinni var hversu algengt að talað væri um stressið og lætin í bænum víða út um land. Þar sem við vorum nú hálfgerðir sveitalubbar úr Mosó vorum við að nokkru leyti sammála en samt ekki því við fundum hjá landsbyggðarfólki að við vorum farnir að tilheyra stresshópnum þegar við vorum komnir í c.a. 300 km fjarlægð frá Mosfellsbæ. Sem sagt orðnir Reykvíkingar í þeirra huga. Við það vorum við auðvitað ekkert sáttir.

Í einni ferð okkar var ákveðið að láta á þetta reyna og fá það í eitt skipti fyrir öll á hreint hvort þetta væri staðreynd. Við ákváðum að gera það þannig að spyrja vertann á staðnum sem við vorum að fara að spila hjá sem að þessu sinni var á Siglufirði hvernig væri að búa á Siglufirði. Ég fékk þetta erfiða hlutskipti að varpa spurningunni fram, logandi hræddur um að fara að hlæja.

Þegar við komum tók Valbjörn eins og ávallt á móti okkur eins og höfðingi og bauð okkur öllum kaffi og meððððí. Þá var komið að því hjá mér. Ég sagði eftir smá spjall grafalvarlegur "segðu mér Valbjörn hvernig er að búa á Siglufirði"?

Það kom smá þögn og svo stóð Valbjörn upp og sagði með miklum tilþrifum. "Það get ég sagt ykkur strákar mínir, þetta er nú eitthvað annað en stanslausa stressið og geðveikin í bænum"

Við félagarnir drápumst allir úr hlátri og stukkum upp frá borðinu eins og bjánar. Valbjörn hefur sennilega aldrei fengið botn í hvað gekk á.

Valbjörn minn ef þú lest þetta, þá veist þú það núna.

Um þessa uppákomu varð síðar til lag sem hægt er að finna á seinni geisladisk 66. Lagið heitir að sjálfsögðu, Þetta er nú eitthvað annað en stanslausa stressið og geðveikin í bænum. 

Bestu kveðjur frá Kalla Tomm. 

Athugasemdir

[Steinunn Helga Sigurðardóttir, 14.9.2007 kl. 10:56]

þetta virðist vera mjög klassisk spurning og mjög klassiskt !

við erum spurð , hvernig er að búa í Lejre, við segjum ,næstum því, þetta er nú eitthvað annað en stressið í Kaupmannahöfn !

gaman af þesari frásögn !

hafðu fallegustu helgina

AlheimsLjós til þín

Steina

[Ásthildur Cesil Þórðardóttir, 14.9.2007 kl. 12:24]

Hehehe svona er þetta bara.  Hér var minn karl með menn í vinnu út í Bolungarvík, þetta voru atvinnuleysingjar, honum fannst einn maðurinn bera af í vinnu, svo hann sagði við hann, komdu bara í vinnu hjá mér.

Hinn horfði á hann dolfallinn, og svaraði svo, ónei, ég fer nú ekki að fara að flytja til Ísafjarðar, þar sem húsaverð er miklu hærra og meira stress

[HP Foss, 14.9.2007 kl. 19:50]

Vestmannaeyjar. Matarboð- þórhallur Árnason- umtal?