Það er ekkert sem réttlætir lítilsvirðingu og dónaskap

Öll höfum við okkar skoðanir og tjáningarfrelsi, sem betur fer. Þær eru einnig misjafnar rétt eins og við erum mörg. Oft þurfum við að taka ákvarðanir sem okkur finnst erfiðar. Jafnvel að taka ákvörðun um eitthvað þar sem allir kostir eru slæmir en ákvörðunina verður að taka. Þá hlýtur það að segja sig sjálft að við reynum að velja skásta kostinn að okkar mati.

Í Mosfellsbæ var fyrir rúmum tuttugu árum ákveðið að nýtt hverfi, svokallað Helgafellshverfi, myndi rísa. Strax í upphafi var ráðgert hvar vegur inn í það hverfi ætti að liggja. Umtalaður vegur hefur verið mikið í fjölmiðlum undanfarið ár. Þegar að því var komið að hefja framkvæmdir risu upp mótmæli vegna legu vegarinns. Helstu gagnrýnendur voru nýstofnuð samtök, Varmársamtökin.

Í fyrstu voru athugasemdir samtakanna málefnalegar en á ótrúlega skömmum tíma breyttist það. Samtökin gerðust pólitísk og töluðu máli eins flokks. Samtökin gerðu einnig látlausar athugasemdir við vinnubrögð bæjaryfirvalda og það sem verst var, persónugerðu atlögurnar í tíma og ótíma. All flestum er þessi saga kunn og ætla ég ekki að fara nánar út í hana.

Nú liggja fyrir nýjar niðurstöður helstu og færustu sérfræðinga m.a. frá Umhverfisstofnun um það að fyrirhugaður vegur sé besta leiðin fyrir náttúruna, umhverfið og Mosfellinga flesta þrátt fyrir að hverfið sé nú mun stærra en ráð var fyrir gert í upphafi. Varmársamtökin hafa látið þær rannsóknir sem vind um eyru þjóta og halda samt sem áður áfram, oft á tíðum með ómálefnanlegri umræðu, í krafti t.d. auðvelds aðgangs að fjölmiðlum.

Það er ábyrgðarhlutur að halda úti heimasíðu og flestir sem standa í slíku vanda sig í þeim efnum. Varmársamtökin benda á sem annan link á sinni heimasíðu, á eftir Landvernd, einhverja síðu sem gerð er út af manneskju sem ekki er til. Sá hinn sami er kallaður Valdi Sturlaugz (Varmársamtaka-Valdi). Á þessari síðu er einhverra hluta vegna aðal umræðuefnið gamalkunnugt af síðu Varmársamtakanna. Það er að níðast á persónum með lítilsvirðingu og dónaskap sem Varmársamtökunum eru ekki hliðhollar eða ekki á sömu skoðun og þau. 

Alvarlegast er þó þegar farið er að tala um geðfötlun fólks án þess að nokkur fótur sé fyrir henni eins og gert hefur verið ítrekað á umræddri síðu. Að segja fólk geðfatlað, hvort sem er til að leggja áherslu á orð sín eða í einhversskonar tvískinnungi er engri manneskju eða samtökum samboðið.

Það er heldur ekki samboðið samtökum sem vilja láta taka sig trúanleg að benda á síðu sem inniheldur slíkan málflutning. Það eykur ekki vegsemd þeirra eða virðingu.

Karl Tómasson.

Athugasemdir

[Jens Guð, 10.9.2007 kl. 01:55]

  Kalli minn,  ég veit nákvæmlega ekkert um þetta mál.  Er úti að aka í því og ætla ekki einu sinni að reyna að setja mig inn í það dæmi.  Ég treysti því bara að maður sem hlustar á CCR og ágætar sólóplötur Johns Fogertys viti betur en ég um hvað málið snýst. 

  Hinsvegar vil ég þakka ofsalega vel fyrir leirlistaverkið og titilinn Besti bloggarinn 2007.  Ég er hrærður og hristur yfir verðlaununum.  Takk,  takk,  takk. 

[Anna Ólafsdóttir (anno) (IP-tala skráð) 10.9.2007 kl. 02:27]

Kalli Tomm: Þó að ég þekki þig bara í gegnum bloggið þitt þá þykist ég vera nógu mikill mannþekkjari til að vita að þú kemur fram að heiðarleika og hreinskiptni í þessu Helgafellslandsmáli. Óska þér bara alls hins besta og vona að það sért ekki þú sem lendir í því að verða fyrir skítkasti inni á þessum síðum. Ef svo er þá þurfa þessi samtök að taka til í sínum ranni.

[Jón Steinar Ragnarsson, 10.9.2007 kl. 03:06]

Gleymi því aldrei þegar Bryndís Schram féll grátandi fram í höklinum sínum dýra eins og Jóhanna frá Örk og bar gröfuna miskunnar fyrir mosann.  Sjaldan hefur annað eins samhyggðarklám birst á síðum blaða. 

Oft er ég í miklum vafa hvort þessi "blæðandi hjörtu" eru að vekja athygli á málstað eða á sjálfum sér.  Ég hallast persónulega að hinu síðara.

[Jón Steinar Ragnarsson, 10.9.2007 kl. 03:12]

Bæta má við svona framkoma dæmir sig sjálf og er þeim til háðungar sjálfum sem hæst láta. 

Svo er ein þumalputtaregla, sem treysta má í þessu samhengi:  Því fátæklegri sem málstaðurinn er, þess meira fjaðrafok þarf að viðhafa til að vekja á honum athygli.

[Halldór Egill Guðnason, 10.9.2007 kl. 10:14]

Það er aumkunnarvert hvernig sumir kjósa að koma "boðskap" sínum á framfæri Karl. Láttu samt ekki málefnalega geldan grátkórinn draga úr þér kraftinn. Óhróður og kjaftæði þeirra dæma sig sjálf. Má vera að minna heyrist í þeim sem sáttir eru við framkvæmdirnar í Álafosskvosinni, en þannig er því nú yfirleitt farið með hinn þögla meirihluta. Þeir sem hæst gala um lýðræðið, eru yfirleitt þeir sem verst una því, er meirihlutinn nær sínu fram og er þessi grúppa þar engin undantekning. Hef trú á að flestir Bæjarbúar taki lítið mark á þessum hóp sem hæst hefur.

[Helgi Jóhann Hauksson, 10.9.2007 kl. 12:21]

Það er því miður háttur margra sveitarstjórna sem og sveitarstjórna og bæjarstjórna að svara andmælum og athugasemdum með skætingi, lítilsvirðingu, útúrsnúningum og út i hött. Það kallar á reiði og jafnvel örvæntingu þeirra sem í einlægni ætla umhverfi sín ekkert nema gott.

Sveitstjórnir vita vel að oftast gerir fólk sér ekki grein fyrir hvað er framundan í skipulagsmálum fyrr en til kastanna kemur. Jafnvel á tímum internetsins eru tillögur kynntar með teikningum sem liggja fram á skrifstu sveitarstjóra í nokkrar vikur en ekki á netinu, og til að kynna sér þær og andmæla þarftu að vita að eitthvað sé í gangi sem snertir þig og fara á skrifstofuna til að kynna þér það.

Það er líka sá hængur á andmælarétti að hann hafa aðeins þeir sem hafa rökstuddra fjárhagslegra hagsmuna að gæta, en ekki allur almenningur í sveitafélaginu t.d. á grundvelli náttúrverndar eða fagurfræði og því síður með félagslegum rökum.

[Gunnar Helgi Eysteinsson, 10.9.2007 kl. 16:02]

No comments

[Hulda Bergrós Stefánsdóttir, 10.9.2007 kl. 16:23]

Allir sem sinna bæjarmálum, hvort sem það er í meiri eða minnihluta vilja bæjarfélagi sínu og íbúum þess VEL. Og hver á sinn hátt.

Það þarf bara að hafa nógu breitt bak til að standa og falla með sinni skoðun og svo er ekki bannað að skipta um skoðun.

En ég held að það séu margir sem halda að það sé hreinlega bannað að breyta og skipta um skoðun !

Gangi þér vel Kalli !!

[Steinunn Helga Sigurðardóttir, 10.9.2007 kl. 19:53]

Kæri kalli, megi þetta fá friðsamlega lausn, er ekki inni í þessum málum, en sendi friðar okru á þessi átök !

AlheimsLjós til þín

steina 

[Guðjón Sigþór Jensson, 10.9.2007 kl. 21:06]

Varðandi þetta vandræðamál um tengibraut í Helgafellshverfið skammt frá Álafosskvosinni þá má geta þess að kvosin hefur ekki neina aðra stöðu í gildandi aðalskipulagi en að vera samansafn nokkurra gamalla verksmiðjuhúsa. Þessi hús eru því miður barn síns tíma, sum eru afar illa byggð, sum af vanefnum og var aldrei ætlað annað en að vera iðnaðarhúsnæði. Þess má geta að elsta húsið var rifið fyrir nokkrum árum enda mun það hafa hangið uppi meir af gömlum vana en eðlilegum stöðugleika sem byggingareglugerð gerir kröfur um. Þá gerist það undir lok síðustu aldar að listafólk fékk leyfi að nýta húsin og koma sér upp vinnuaðstöðu. Ekki þarf að rekja þessa sögu lengra því hún er flestum kunn.

Eiginlega þyrfti að taka á þessu og veita Álafosskvosinni meiri og betri framtíð en að vera gróðrarstöð tortryggni og skítkasts sem enginn græðir á. Kannski mætti efna til samkeppni meðal landslagsarkitekta og fá góðar hugmyndir frá þeim hvernig þeir sjái framtíðina fyrir sér og hvernig megi fella deiliskipulag hennar að nágrenninu og að fá heildarmarkmið hvaða hlutverk Kvosin á að öðlast fyrir framtíðina. Í mínum huga er sjálfur Álafoss sem er höfuðprýði þessa sérstæða umhverfis en annað er manngert umhverfi sem margt getur orkað tvímælis. 

Auðvitað var Álafosskvosin mjög sögulegur staður á sínum tíma meðan þar var spunnið, ofið og gerð hin ágætustu ullarklæði á dögum Sigurjóns á Álafossi og lengi síðan, hátt í mannsaldur. En við megum aldrei láta söguna byrgja okkur sýn heldur líta fremur fram á veginn en ekki líta sífellt um öxl og verða kannski fyrir vikið núið um afglapahátt sem ekki þykir gott í nútímasamfélagi.

Látum landslagsarkitektana kanna aðstæður og fá góðar hugmyndir þeirra!

Mosi - alias 

[Jens Guð, 12.9.2007 kl. 01:10]

  Þetta er nú meira fjörið í Mosó.