Hettuþjófar á ferð

Ég varð fyrir því öðru sinni nú í vikunni að vera rændur af hettuþjófum. Ég fæ engan botn í áráttuna hjá þjófunum. Hvurn skrattann gera þeir við hetturnar? Eða er þetta bara stríðni góðra vina? Ef svo er. Mikið ósköp láta þeir líða langt á milli prakkarastrikanna.

 

Í dag eru þessar hettur náttúrulega með öllu óþarfar. Ventlar dekkja halda orðið 100 % og það er liðin tíð að sjá dekkjaverkstæðismenn hrækja á puttann á sér og slengja slummunni á ventilinn. Það er samt notalegt að vita af hettunum, enda fer maður að verða einn af þeim sem eru af gamla skólanum og vill hafa allt á sínum stað. Ventlahettur spila þar m.a. stóra rullu.

Mér hefði óneitanlega liðið betur með hetturnar á ferð minni um Mývatnssveit í vikunni, næst fallegustu sveit landsins. Þetta voru nú engar gúmmíhettur eins og á Velamos hjólinu mínu.

Nei!

Þetta voru alvöru stálhettur, svona rétt til að réttlæta áhuga þjófanna eða stríðnispúkanna á þeim. 

Athugasemdir

[Jens Guð, 28.7.2007 kl. 02:06]

  Ég hélt fyrst að þú værir að fjalla um getnaðarvörnina hettu.  En þú ert sem sé að fjalla um lokin á ventlum dekkja.  Ég hendi þeim alltaf.  Þau eru algjörlega óþörf í dag.  Vertu bara feginn að losna við þetta óþarfa drasl. 

[Sigurður Hreiðar, 28.7.2007 kl. 11:29]

Ég vil hafa hetturnar, eins og Kalli. Það er andskotans töf að því að þurfa kannski að skrúfa ventilinn úr til að hreinsa stútinn þegar maður ætlar bara að athuga þrýstinginn í dekkjunum -- sem alltof margir gera alltof sjaldan!

Ventilhetturnar eru þannig ekkert óþarfa drasl, en kannski helst þér betur á þeim, Kalli minn, ef þú ferð bara til hans Dags í Bæjardekki -- eða heitir það kannski ekki neitt (ekki N-1) núna og færð bara ómerkilegar svartar plasthettur…

[Jóna Á. Gísladóttir, 28.7.2007 kl. 16:09]

Hettuþjófar. Hmmm. athyglisverður starfsvettvangur.

[Steinunn Helga Sigurðardóttir, 28.7.2007 kl. 21:30]

hettuþjófur í Mosó !!!

Ljós og friður til þín frá mér

steina

[Halldór Sigurðsson, 29.7.2007 kl. 11:37]

Setja rannsóknarnefnd í þetta mál ,þetta er líklega alþjóðlegur glæpahringur