Vinstri græn flökta ekki eins og strá í vindi

Nú þegar einungis sex dagar eru til kosninga er brýnt að allir hugsi til þeirrar baráttu sem Vinstri græn hafa staðið fyrir síðastliðin fjögur ár. Einungis fimm þingmenn hafa starfað fyrir flokkinn á alþingi Íslendinga með  slíkum dugnaði og elju að stór partur þeirrar baráttu er orðin að keppikefli allra stjórnmálaflokka að flagga sem sínu.

Stofnaður var nýr stjórnmálaflokkur til að berjast fyrir umhverfisvernd, Samfylkingin rær öllum árum til að öðlast að nýju traust sem umhverfisverndarflokkur svo margklofin sem hún nú er í þeim málaflokki. Flokkurinn hafði ekki einu sinni þor til að taka afstöðu vegna stækkunar álversins í Straumsvík í sjálfum heimabænum en helsta forystufólk flokksins hafði áhyggjur af 500m löngum vegarkafla í Mosfellsbæ á sama tíma. Framsóknarmenn bjuggu til sitt víðfræga slagorð, ekkert stopp, bara áfram með sama bullið. Frjálslyndir vita ekkert hvort þeir eiga að fara til hægri eða vinstri og Sjálfstæðisflokkurinn vill státa af því að vera orðinn umhverfisverndar- og feministaflokkur. Fuglinn orðinn bleikur og allt í standi.

Já, Vinstri græn hafa áhrif. Þegar flokkurinn svo kemst í oddastöðu eins og í Mosfellsbæ og situr þar við stjórn í fyrsta skipti undir eigin merki virðist sem allt ætli um koll að keyra. Þessa staðreynd virðast sér í lagi Samfylkingin og Framsókn engan vegin þola. Rétt eins og góð barátta þingmannannanna okkar fimm undanfarin ár hefur aðkoma Vinstri grænna að bæjarmálum í Mosfellsbæ þegar haft mikil áhrif.

Eitt af okkar stærstu kosningamálum var að gera leikskólann gjaldfrjálsan í áföngum. Nokkrum mánuðum síðar varð það mál að veruleika þegar fimmáradeildin var gerð gjaldfrjáls. Með því varð Mosfellsbær stærsta byggðarlag landsins til að stíga það skref. Í góðri samvinnu við Sjálfstæðismenn, samstarfsflokk okkar í bæjarstjórn, hefur verið ákveðið að Krikaskóli skuli ekki einkarekinn. Nú á næstu dögum verður auglýst til umsóknar ný staða hjá bæjarfélaginu. Starf þeirrar manneskju verður m.a. fólgið í Staðardagskrá 21. Það var eitt af stóru málum okkar Vinstri grænna í Mosfellsbæ. Í góðri samvinnu við samstarfsflokk okkar var einnig ákveðið að endurskoða fyrri ákvörðun og setja Tunguveg í umhverfismat án þess að til þess bæri bæjarfélaginu skylda. Nú á næstu mánuðum mun bæjarstjórn Mosfellsbæjar fara að huga að ýmsum stórum skrefum í menningar-og ferðamálum.

Já, Vinstri græn geta hæglega látið til sín taka en hafa verður í huga að í öllu samstarfi þarf að sýna skilning og sanngirni, á því byggist gott samstarf og á því hefur samstarf meirihlutans í Mosfellsbæ verið byggt. Á gagnkvæmri virðingu og trausti.

Ótrúleg afskiptasemi og áhyggjur pólitískra andstæðinga Vinstri grænna langt út fyrir bæjarmörk Mosfellsbæjar hafa á köflum borið keim af makalausri afbrýðisemi og heift. Einungis eitt dæmi nefna allir þessir pólitísku fulltrúar um skandal Vinstri grænna í Mosfellsbæ og það er hin víðfræga tengibraut í Helgafellsland. Þegar þessir sömu aðilar fara að tjá sig um málið kemur í ljós slík vanþekking á málinu að betur hefði verið heima setið en af stað farið hjá þessu ágæta fólki að tjá sig um málið.

Engir þessara aðila hafa bent á aðra lausn. Það er nú heila málið!!!

Egill Helgason stjórnandi Silfurs Egils var til að mynda ekki betur að sér en svo í þætti sínum í dag að hann stóð í þeirri meiningu að í Mosfellsbæ væru aðeins ein umhverfissamtök. Það er rangt, í Mosfellsbæ eru starfandi tvö umhverfissamtök og hér á árum áður voru starfrækt umhverfissamtökin Mosi. Eitt aðal baráttumál þeirra umhverfissamtaka var að koma í veg fyrir að Varmá yrði brúuð fyrir neðan Reykjalundarskóg inn í væntanlegt Helgafellshverfi. Ef sú leið hefði orðið fyrir valinu þyrfti að beina allri umferð í gegnum tvö stór íbúðarhverfi og þvera ekki bara Varmána heldur eitt vinsælasta útivistarsvæði Mosfellinga og vistmanna Reykjalundar. Það er sú tilllaga sem að Varmársamtökin leggja til nú í dag. Samfylkingin og Framsókn þegja nú þunnu hljóði yfir þeirri tillögu Varmársamtakanna. 

Við Vinstri græn hér í suðvestur kjördæmi teflum fram öflugum lista með dugnaðar- og reynsluboltann Ögmund Jónasson í fararbroddi. Allt stefnir í að Guðfríður Lilja Grétarsdóttir nái kjöri. Það yrði mikill happafengur að fá hana á alþingi. Hún er einstaklega réttsýn, eldklár og heiðarleg baráttukona með hjartað á réttum stað.  

Vinstri græn geta bæði verið öflugur stjórnarandstöðuflokkur

og öflugur stjórnarflokkur, dæmin sýna það. 

Vinstri græn flökta ekki eins og strá í vindi. 

Vinstri græn hafa hreinar línur.  

Því geta allir kjósendur flokksins treyst. 

Karl Tómasson.

Athugasemdir

[Gunnlaugur B Ólafsson, 6.5.2007 kl. 21:51]

Sæll Kalli

Vinsamlega, forseti bæjarstjórnar, ekki meira bull! Aðaltillaga Varmársamtkanna er að leysa tengingu við Helgafellshverfi með mislægum gatnamótum ofan og norðan núverandi Helgafellshverfis. Varmársamtökin hafa ætíð verið mótfallin allri þverun Varmár hinsvegar er nú búið að heimila hátt í 4000 manna byggð á Helgafellstúninu. Það deiliskipulag er búið að samþykkja og ekki hægt að koma í veg fyrir þau mistök, en verið er að vinna að deiliskipulagi á vegtengingum við Helgafellshverfi ("Allt til endurskoðunar" samkvæmt formanni VG á Draumakaffi). 

Á aðalskipulagi er gert ráð fyrir þverun Varmár við Álanes en ekki Reykjalundarskóg. Umferðarsérfræðingar sem við unnum tillöguna í samráði við sögðu að nauðsynlegt væri að halda þessari safngötu (en ekki tengibraut) við Álanes. Trúi því ekki að þú náir meiri árangri fyrir VG með því að halla réttu máli til að etja hverfum saman í átök um þetta mál. Þú virðist nú styðja þverun Varmár með Tunguvegi án þess að hiksta, þó auðvelt sé að láta Vesturlandsveg fóðra umferð í það hverfi með áætluðum mislægum gatnamótum við Leirvogstungu. Getur þú ekki formað þá draumsýn sem Varmársamtökin berjast fyrir og sett er fram í tillögum þeirra um grænt belti, sem kalla má "Varmárdal", útivistar- og verndarsvæði frá ósum upp fyrir Reykjalund? Þú talar um óþarfa umstang út af 500 m löngum vegarkafla. Þar mælir þú hlutina bara í malbiki en ekki afleiðingum, heildaráhrifum, útivistar- og verndargildi. Bútasaumum næstu metrana!

Hvaða umhverfissamtök eru til önnur í Mosfellsbæ en Varmársamtökin? Mosi er ekki lengur til. Spurði Andrés Arnalds út í marghamraða fullyrðingu um að Mosi hafi lagst gegn þverun milli Álafoss og Reykjalundar. Hann staðfesti andstöðu þeirra gegn slíkri braut, en það þýddi ekki að þeir hafi verið að blessa einhverja aðra. Sama gildir um Ingva Þór Loftsson að þegar umhverfisskipulag er unnið þá er gengið út frá því að það sé staðreynd að tengibraut komi í gegnum Álafosskvos. Hann útilokaði ekki í samræðum við mig að skoða mætti slíka þverun ef vrið væri að lyfta Vesturlandsvegi með brú og í raun verið að endurheimta land í nágrenni Álafoss til verndar og útivistar. Þetta hefur nefnilega allt áhrif hvert á annað. Því miður hefur vantað heildarsýn og þá sér í lagi grundvallarpælingu í tengslum við Vesturlandsveg og Mosfellsbæ.

     Gangi þér vel í baráttunni,

                  vonandi stefnum við að vinstri stjórn eftir kosningar,

                               kærleikskveðjur

[Karl Tómasson, 6.5.2007 kl. 22:39]

Kæri Gunnlaugur. Meira bull eru orð sem eru þér ekki samboðin.

Í tillögu Varmársamtakanna er gert ráð fyrir þverun Varmár fyrir neðan Reykjalundarskóg. (Álanes) sem þið í Varmársamtökunum hafið nú endurskýrt sem Varmárdal öllum að óvörum.

Þá tillögu blés núverandi bæjarstjórnarmeirihluti af. Það er með ólíkindum hvað Varmársamtökunum ætlar seint að verða ljóst um það. Það er furðulegt að heyra varaformann Varmársamtakanna tala um að ég sé að etja hverfum saman, það er ég nefnilega ekki að gera. Það eru Varmársamtökin að gera með þessari tillögu.

Ég furða mig jafnframt á að eins mikill umhverfissinni og þú Gunnlaugur skuli ekki vita að það eru til önnur náttúrverndarsamtök í Mosfellsbæ.

Kær kveðja frá Kalla Tomm.

[Gunnlaugur B Ólafsson, 6.5.2007 kl. 23:56]

 Sæll Kalli

Umrædd gata við Álanes er inn á aðalskipulagi. Varmársamtökin eru með nýlegt bréf þar sem bærinn hafnar ósk samtakanna um að taka þessa tengingu út af skipulagi. Umferðarsérfræðingar töldu líka að nauðsyn væri að hafa hana inni sem safngötu í ljósi þess íbúafjöld sem þið ætlið að hafa á Helgafellstúninu, en við skulum glöð kippa henni út, ef mögulegt er. Meginefni tillagnana eru mislægu gatnamótin í jaðri í stað tengibrautar um Kvos og að lyfta Vesturlandsvegi með brú í Álafosskvos, skapa þannig svigrúm fyrir göngustíga og reiðleiðir og þróa konseptið um "Varmárdal" sem útivistar- og verndarsvæði Mosfellsbæjar.

Hélt að félagið hans Guðjóns væri "náttúrufræðafélag". Ætlað að efla þekkingu á sögu og náttúru tiltekins umhverfis í nágrenni Mosfellsbæjar. Það er verðugt verkefni. En ef félaginu er ætlað að vera einnig íbúasamtök og móta hugmyndir um þróun bæjarins þá fagna ég því innilega. Held að það sé reyndar ekki þannig. Það væri heldur ekki ástæða til, þar sem að Varmársamtökin eru öllum opin. En ef út í það er farið þá ræddi ég við Guðjón Jensson formann þess félags og Úrsúlu konu hans eftir fundinn um Tunguveg og virtust þau bæði vera mjög andsnúinn þeirri vegalagningu. Þannig að ég á von á stuðningi úr þeirri átt að berjast gegn aukningu á steinsteypu eða tjöru á föstu formi í "Varmárdal".

Já, þetta er ansi gott hugtak yfir þetta útivistar- og verndarbelti Mosfellsbæjar, sem gæti orðið aðalaðdráttarafl bæjarins með tíð og tíma. Þetta væri svona stilkurinn á fjögurra laufa smáranum sem myndaður er af hringleiðum á fellin umhverfis Mosfellsbæ. "Varmárdalur" ér svona rómantísk sýn og tákn um hreysti og fagurt mannlíf í góðum tengslum við náttúruna.

Svona bara til upplýsingar, þá gengum við nokkur hring á Helgafell á fimmtudag, en farið verður á Reykjafell á þriðjudag kl 17:15. Lagt af stað úr Álafosskvos. Mosfell á fimmtudag.

                  Kærleikskveðjur,

[Karl Tómasson, 7.5.2007 kl. 00:16]

Gunnlaugur minn.

Þessi tenging verður ekki á þessum stað. Núverandi meirihluti hefur komist að þeirri niðurstöðu, endilega hættið að tala um það. Þessi tillaga ykkar er algjörlega fráleit og það held ég að flestum beri saman um. Hin nýju samtök heita Umhverfis- og náttúrufræðifélag Mosfellsbæjar.

Ég átta mig ekki á afhveju Varmársamtökin vilja breyta nafninu Álanes í Varmárdal. Í mínum huga er partur af allri verndun að halda í gömul staðarheiti.

Kær kveðja úr Varmárkvos. Kalli Tomm 

[Gunnlaugur B Ólafsson, 7.5.2007 kl. 01:07]

Tillaga okkar er mislæg gatnamót í jaðri í stað tengibrautar um Álafosskvos. Get sent þér afrit af bréfi þar sm því er hafnað að taka þverun við Álanes út af skipulagi. Ég stakk upp á að í stað þess að vera alltaf að tala um "svæðið upp með Varmá" að vísað yrði til þessarar meginæðar, verndar- og útivistarsvæðis undir heitinu Varmárdalur og væri það í samræmi við hliðstæð svæði í öðrum borgarhlutum og tekin hafa verið frá og vernduð fyrir íbúana til að njóta útivistar og náttúru. Það varst þú sem vildir breyta nafninu á Álanesi í Reykjalundarskóg, var það ekki?

Kær kveðja af Sólvallatúninu,

               sem verður brátt steypunni að bráð,

[Karl Tómasson, 7.5.2007 kl. 01:23]

Gunnlaugur nú þarft þú að  fara með rétt mál. Fyrir neðan Reykjalund er skógur sem alla mína tíð hefur verið kallaður Reykjalundarskógur. Þar fyrir neðan er Álanes sem að þú og þið í Varmársamtökunum viljið kalla Varmárdal, það kennileyti er ekki til. Á því svæði vilja Varmársamtökin þvera og brúa Varmá.

Fyrir það haf bæjaryfirvöld Mosfellsbæjar nú komið í veg fyrir og eru stolt af. Hættu nú að snúa út úr þeim málfluttningi minn kæri. Varmársamtökin opinberuðu sig með þessari tillögu, það veist þú og allir Mosfellingar. 

[Gunnlaugur B Ólafsson, 7.5.2007 kl. 09:10]

Heill og sæll Kalli

Þú virðist ekki ná því að hugmyndin að "Varmárdal" vísar til alls svæðiisins frá ósum Varmár upp fyrir Reykjalund, þar sé haldið eftir útivistar- og verndarbelti. Sambærilegt og önnur bæjarfélög eiga sinn Laugardal, Fossvogsdal, Elliðaárdal. Þetta kallast að eiga sér sýn eða eins og einhver orðaði það hugarfóstur sem vonandi nær að vaxa og dafna, mannlífi til heilla í Mosfellsbæ.

Þú virðist ekki ná því að tillaga Varmársamtakana gengur út á að í stað tengibrautar um Álafosskvos komi mislæg gatnamót fyrir ofan og norðan við núverandi Helgafellshverfi. Hinsvegar ráðlögðu umferðarsérfræðingar okkur að halda inni safngötu við Álanes til að mögulegt væri að leysa umferðarþörf um 4000 íbúa sem þið eruð búin að samþykkja að verði á Helgafellstúninu. Sumir vísa til þess sem græðgisvæðingar og það er auðvitað stærsta skipulagsslysið. Safngatan við Álanes er inn á aðalskipulagi og nýlega staðfest að ekki standi til að taka hana út.

Þú virðist búin að ná því að Álanes er ekki Reykjalundarskógur. En ykkur sem hafið það meginmarkmið að hræða fólk frá umræðunni um skipulagsmál hentar best að rangtúlka og velja úr einhver slagorð sem að spilla og skemma. Það er tilgangurinn með því að segja að tillögur Varmársamtakanna gangi út á að fara í gegnum Reykjalundarskóg. Það er því miður, verð að segja það, einfaldlega bull og ekki boðlegt af forseta bæjarstjórnar að halla réttu máli með endurteknum hætti.

                                           Með kærri kveðju,

[Hallur Magnússon, 7.5.2007 kl. 12:58]

Þú segir:

Einungis fimm þingmenn hafa starfað fyrir flokkinn á alþingi Íslendinga með  slíkum dugnaði og elju að stór partur þeirrar baráttu er orðin að keppikefli allra stjórnmálaflokka að flagga sem sínu.

Er þá nokkur ástæða að hafa þá fleiri en fimm - fyrst árangurinn er svo góður að aðrir flokkar taka upp stefnumálin? 

[Guðjón Sigþór Jensson, 8.5.2007 kl. 12:16]

Nokkur orð í þessa endalausu umræðu:

Þessi hugmynd Gunnlaugs um brú fyrir ofan Álafoss er fráleit. Einhvern tíma var þessi möguleiki settur inn á skipulagsuppdrátt en sem betur fer tóku skynsamir menn eftir því að þetta væri ekki aðeins rándýr lausn heldur afleit enda hefði hún haft einnig óafturkræf áhrif á umhverfi Álafoss sem og árbakkana þar upp af sem er mikil náttúruperla. Má þar nefna að þar er að finna einn elsta trjálund sveitarinnar þar sem Ágúst í kexverksmiðjunni Frón plantaði m.a. hlyn fyrir um 75-80 árum.

Spurning hvort Gunnlaugur ætti ekki að fá aðrar skemmtilegar hugmyndir. T.d. mætti hann mín vegna beita sér fyrir byggingu bílastæðahús einhvers staðar miðsvæðis og bjóða upp á ferðir með hestvögnum meðfram Álafosskvosinni upp í Helgafellshverfi. Þetta myndi án efa verða vinsælt meðal þeirra sem rómantískir eru og efla verulega atvinnu og hagvöxt kvosarinnar enda veitir sennilega ekki af að styrkja sem best tekjustofna kvosarmanna. Þá væri spurning um þyrluþjónustu en sennilega myndi bæði vagnskröltið, hávaðasöm og rándýr þyrluþjónustu valda Kvosarmönnum meiri búsifjum en umferð um þá tengibraut sem til stendur að byggja.

Ætli það væri nú ekki vitrænna að reyna að takmarka hraða og draga þannig verulega úr umferðarhávaða en að þráast endalaust við að benda á lausnir sem þegar hafa lent á öskuhaugum sögunnar. Þá finnst mér að það mætti skoða betur hvernig almenningsvagnar tengdust hverfinu en með þeim er má draga verulega úr akstri einkabíla.

Mér skildist að Gunnlaugur hefði komið þessari endemisumræðu af stað af því að það væri svo gaman að stríða einhverjum. Nú ef svo er raunin þá má finna fleiri vinkla og sjónarhorn í þessa umræðu en ætli við verðum ekki að treysta þeim sem skoðað hafa þessi mál að þeir hafi góðar lausnir á þeim viðfangsefnum sem við er að etja.

Kveðjur í Kvosina

Mosi

[HP Foss, 8.5.2007 kl. 15:14]

Hefur mönnum ekki dottið í huga að rífa þessi gömlu hús í kvosinni, sem eru nú hálfgerðir kumbalda. Brjótaniður þetta stóra steinhús sem skyggir  á Álafiossinn sjáfan og húsaröðina þar uppaf.

Nei, ég varpa þessu nú bara fram því eins  og sagt er, glöggt er gests augað og þetta sé ég.

kv
Helgi Páls

[Gunnlaugur B Ólafsson, 8.5.2007 kl. 16:12]

Heill og sæll Guðjón

Þú virðist misskilja eða af einhverjum ástæðum hefur þú lagt lítið á þig til að kynna þér tillögur Varmársamtakanna. Þær ganga í stuttu máli út á að í stað tengibrautar um Álafosskvos, þá verði byggð upp mislæg gatnamót ofan og norðan við núverandi Helgafellshverfi. Vonandi veist þú líka að í aðalskipulagi er gert ráð fyrir að tengibrautin komi undir Vesturlandsveg og setji Brúarland upp á umferðareyju, ásamt því að gera miðbæinn að rússíbana bílaumferðar. Jafnframt er gert ráð fyrir mislægum gatnamótum á fyrirhugaðan Hafravatnsveg (nú Reykjaveg).

Bæjarstjórn er nýkomin með það útspil að tvöföldun hringtorgs í Kvosinni verði látið duga en umferðarsérfræðingar og Vegagerð segja það algjörlega óásættanlegt að stefna umferð með aðliggjandi brekkum sitthvoru megin á Vesturlandsvegi og umferð 10 þúsund bíla úr Helgafellshverfi inn áformað hringtorg. Því verðum við að gera ráð fyrir hinum alvarlegu afleiðingum sem það hefur í för með sér að leggja tengibrautina undir Vesturlandsveg og koma þannig þvert á reiðleiðir og göngustíga, nálægt íþrótta- og skólasvæði og þeim lamandi áhrifum sem slíkt hefur á miðbæinn.

Þrjú meginrök hafa heyrst gegn tillögu Varmársamtakanna. 1. Hvassviðri Að vegtenging um Ása muni vera staðsett á veðrasömu svæði. Verkfræðingar telja hinsvegar að auðvelt sé að móta landið þannig að þetta verði ekki vandamál. Einnig er eðlilegt að við höldum eftir skjólbetra svæðinu fyrir mannlíf og útivist. Umferð upp í Mosfellsdal hefur í aðalatriðum gengið vandræðalaust með tilliti til veðurs, en með tillögu samtakanna kemur einnig varanleg lausn á Þingvallavegsafleggjara.

2. Aukin vegalengd. Því er haldið fram að íbúar hins nýja hverfis þurfi að fara lengri leið í miðbæ Mosfellsbæjar með þessari tillögu. Það fer eftir hvar viðkomandi væri staðsettur. Ef ökumaður er að koma úr Reykjavík á leið í nýtt Helgafellshverfi þá myndi hann samkvæmt fyrirliggjandi aðalskipulagi og hugmyndum þurfa að taka hægri slaufu undir Vesturlandsveg á mislægu gatnamótum við Hafravatnsveg. Stefnt að miðbænum og síðan meðfram Brúarlandi og undir Vesturlandsveg í Kvosinni, meðfram Álafossi og upp í hverfið. Stærsta hluta þessarar leiðar um lífæð bæjarins væri hámarkshraði 30 km vegna hávaða og slysahættu. Hinsvegar samkvæmt tillögum Varmársamtakanna er hægt að fara á 90 km hraða upp að fyrirhuguðum mislægum gatnamótum, beygja til hægri og halda 50-70 km hraða inn í hverfið. Mun greiðfærari og betri lausn með tilliti til umferðar. Nokkur hundruð metrum lengri fyrir þá sem búa næst Varmá. En þeir fá líka tengslin við náttúruna. Húsin næst Fossvogsdalnum eru eftirsóttust. Menn leggja á sig smákrók fyrir þau lífsgæði.

3. Skert vegtenging við Álafosshverfi. Því hefur verið haldið fram að Álafoss verði úrleiðis með þessari hugmynd. Það er vissulega rétt miða við tengsl með hringtorgi. En þegar farið er eftir aðalskipulagi og afstöðu vegagerðar um að leggja hringtorgið af ásamt því að byggja upp mislæg gatnamót við Hafravatnsveg þá er ekki allur munur á hvort að rúta tekur slaufu í gegnum miðbæinn og meðfram Brúarlandi eða inn á mislæg gatnamót út af Vesturlandsvegi og gegnum Helgafellshverfi. Umferðarsérfræðingar telja þessi tengsl verða góð og þá er að kanna hvort að rútubílstjórar telja eina slaufu betri en aðra. Auk þess eru það mikil sóknarfæri ferðaþjónustu að koma inn í Álafosshverfið sem veröld út af fyrir sig og með aðalgöngustíg bæjarins um hlaðið. Ég vildi persónulega frekar fara á kaffihús í slíku umhverfi en að hafa yfir sér tengibraut með mikilli umferð.

Það er mín afstaða að Tunguvegur sé óþarfur. Auðvelt er með fyrirhuguðum mislægum gatnamótum á Vesturlandsvegi við Leirvogstungu anna umferð um það svæði. Það fannst mér þú og þín kona vera sammála mér um eftir kynnningarfundinn í síðustu viku.

Varðandi veglagningu um Álanes þá er hún inn á aðalskipulagi Mosfellsbæjar. Nýlega barst Varmársamtökunum bréf frá bæjaryfirvöldum í Mosfellsbæ þess efnis að óráðlegt væri að taka þessa þverun Varmár ofan Álafosskvosar út af skipulagi en þá tillögu bárum við upp í athugasemdum við það deiliskipulag Helgafellslands sem liggur að Varmá. Lega vegarins byggir því ekki á frumkvæði Varmársamtakanna heldur á aðalskipulagi Mosfellsbæjar sem einnig kemur fram í deiliskipulagi Helgafellslands, 3. áfanga. 

Með því að lyfta Vesturlandsvegi með brú yfir Varmá við Álafosskvos, leysa vegtengingar við nýju hverfin með mislægum gatnamótum og endilega taka út vegtengingu við Álanes, ef það er niðurstaða bæjarstjórnar, þá erum við komin með útivistar- og verndarsvæði sem er með því besta á höfuðborgarsvæðinu. Metnaðarfullt og býður upp á mikla framtíðarmöguleika með mannlífi sem einkennist af heilsueflingu og útivist. "Varmárdalur" væri ekki síðri en Laugardalur, Eliðaárdalur eða Fossvogsdalur. Hann væri stilkurinn sem lægji að hringleiðum á fellin fjögur umhverfis Mosfellsbæ. Með þeim fjögurra laufa smára væri ekki hægt að óska sér neins betra.

Varmársamtökin hafa lagt fleiri hundruð þúsund krónur í vinnu við nýjar hugmyndir sem ætlað er að hámarka gildi náttúruverndar og útivistar. Það sem að er enn betra að með þeim er einnig sýnt fram á mjög góða lausn fyrir bílaumferð í Mosfellsbæ. Það er mun meira en fyrirliggjandi hugmyndir gera. Vona að þú og þitt félag komið sterkir inn í þessa umræðu á forsendum náttúruverndar, útivistar og mannlífs í bænum. Vona að þið verðið ekki skálkaskjól fyrir bæjarstjórn, þannig að það verði "allt annað líf" að hafa umhverfissamtök sm blessa hvern steypuskúlptúrinn á eftir öðrum.

                          Með kærri kveðju,

[Kristín Páls (IP-tala skráð) 8.5.2007 kl. 17:39]

Hér má sjá brúna yfir Varmá úr Helgafellshverfi og yfir í Álanesið.

[Guðjón Sigþór Jensson, 9.5.2007 kl. 12:22]

Góðir hálsar.

Af gefnu tilefni vil eg taka fram að eg vil ekki að nýstofnað Umhverfis- og náttúrufræðifélag Mosfellsbæjar sem eg átti þátt í að stofna ásamt fleiru góði fólki, verði dregið inn í neinar deilur hverju nafni sem þær nefnast. Félagið starfar samkvæmt lögum þess á faglegum forsendum og er því keki unnt að krefjast þess að það né nafn mitt verði tengt hagsmunagæslu hóp fólks öðru vísi en því þegar um fagleg málefni ber á góma. Því óska eg eftir því að félaginu sé hlíft við því að vera kallað til hagsmunagæslu um eitthvað sem varðar ekki tilgang þess.

Nú vil eg einnig taka fram að eg er ekki að blanda mér í þessa furðulegu deilu sem formaður þessa félags heldur fyrst og fremst eins og hver annar borgari í Mosfellsbæ. Mér finnst gagnrýni á samborgara okkar Karl Tómasson hafa verið ákaflega ómálefnaleg, órökstutt og oft byggð á ómerkilegu hjali sem er viðkomandi sem þeim brögðum beitir ekki til framdráttar.

Fyrir nokkrum vikum birti Morgunblaðið mjög vandaða og góða grein um stöðu þjóðlendumálsins sem varðar forna kirkjulénið Stafafell í Lóni. Það er mér algjörlega óskiljanlegt að sami maður geti staðið að baki þeirrar frábæru greinar og átt hlut að stríðnisgreinum við okkar ágæta Karl Tómasson. Nú þekki eg báða þessa samborgara mína og vil ekki þekkja þá nema að góðu einu. Mér hefur fundist að eina sem Karli hafi orðið á í messunni að hafa ákveðið að draga sig til hlés þegar málefni tengd þessari guðs voluða Álafosskvos eru á dagskrá hjá Mosfellsbæ. Hann er eftir öllum sólarmerkjum að dæma EKKI vanhæfur að fjalla um málefni þessi þar sem hann hefur ekki fjárhagslegra eða annarra hagsmuna að gæta. Hins vegar kann hann að hafa haft aðra skoðun á þessu máli áður. Það hafa sjálfsagt fleiri haft. En þegar mál eru skoðuð, er þá nokkuð eðlilegra en að breyta afstöðu sinni eða jafnvel skipta algjörlega um skoðun?

Er ekki betra að skipta um skoðun fremur en að halda í hana fram í rauðan dauðann hversu arfavitlaus sem hún kann að vera? Satt best að segja dáist eg að Kalla að geta staðið í þessu þarflausa stappi. Það hefur reynt vel á, en mannshugurinn lætur vonandi ekki undan þeim mótbyr sem stundum vill bresta á, heldur verði sterkari við hverja þá raun sem reikna má að bíði bak við næsta leiti.

Bestu kveðjur til Kalla, Gunnlaugs og allra með þeirri frómu ósk að þessu deilumáli megi kasta sem fyrst á öskuhauga sögunnar og deiluaðilar sættist. Ef ekki þá verður þetta kannski eins og Sagan endalausa eftir Michael Ende. En hún fjallar auðvitað um e-ð annað.

Mosi - alias

[Gunnlaugur B Ólafsson, 9.5.2007 kl. 14:02]

Sæll Guðjón

Veit ekki af neinni stríðni af minni hálfu í garð einstakra persóna og vil umræðuna sem mesta og vandaðasta um þá sýn að fólk sameinist um utivistar- og verndarsvæði upp með Varmá. Á meðan bæjarstjórn heldur ótrauð áfram áformum sínum þá mun andstaða og umræða frekar aukast en minnka. Á meðan hesthúseigendafélag, foreldrafélag Varmárskóla og fleiri eru að vakna til vitundar um hina miklu og ástæðulausu eyðileggingu á lífæð bæjarins þá mun umræðan ekki þagna, heldur eflast. En málið hefur aldrei snúist um Karl Tómasson fyrir mér og ekki heldur um einhverja "guðs volaða Álafosskvos". Hún snýst um grundvöll lífsfyllingar íbúa bæjarins, sé horft til langs tíma og heildrænt.  

Þú veist að ég óska hinu nýja félagi alls hins besta. Hinsvegar mátti skilja hér á síðunni af aðilum að með einhverjum hætti væri reynt að etja eða bera saman hið nýja félag við Varmársamtökin. En auk áherslunnar á umhverfisvernd eru þau íbúasamtök, með áhersluna á aðkomu almennings að skipulagsmálum.

En vonandi sérðu samt að þú fórst ekki alveg rétt með varðandi tillögur Varmársamtakanna og nú þegar ég hef útskýrt þær fyrir þér þá hefði nú verið meira gaman að heyra þig fjalla um kosti þeirra og galla í samanburði við fyrirliggjandi hugmyndir. En þú vildir eins og margir VG menn, helst bara tala um Kalla Tomm. Finnst þér konseptið um "Varmárdal", verndarbeltið frá ósum upp fyrir Reykjalund ekki vera spennandi nálgun? Síðan geta menn leikið sér með gröfur og vörubíla að vild utan þeirra marka.

                       Óska þér alls hins besta,