Gítarveisla Bjössa Thor

Gítarleikararnir sem fram komu á tónleikunum.

Í lok síðasta árs, stóð gítarleikarinn góðkunni og magnaði, Björn Thoroddsen, í fjórða skipti á jafn mörgum árum fyrir tónleikum þar sem allir fremstu gítarleikarar landsins koma fram. Um þetta fjallaði ég hér á síðu minni á dögunum og birti viðtal, Bjössa Thor, við Sigurgeir Sigmunds, Gildrugítarleikara af þessu tilefni.

Sigurgeir í góðri sveiflu með Gildrunni í afmæli mínu. Hjalti Úrsus vel með á nótunum. 

Í gær, kíkti ég í kaffi til Sigurgeirs á skrifstofu Fíh og ræddum við aðallega fyrirhugaða tónleika Gildrunnar í Mosó. Í samtali okkar, stakk ég því reyndar að Geira, hvað mér hafi fundist gaman af viðtali Bjössa Thor við hann á dögunum. Eins og fyrri daginn, ef ég nefni einhvern á nafn, þá er sá hinn sami mættur á svæðið skömmu síðar eins og ég hef skrifað um hér áður. Á því varð engin undantekning í gær, því skömmu eftir að ég nefndi Bjössa á nafn var kappinn mættur, þar sem við Geiri sátum tveir í mestu makindum að spjalla yfir góðum kaffibolla.

Þarna var hann mættur með glóðvolgan diskinn sem hljóðritaður var á gítartónleikunum góðu í Salnum í lok árs, eins og áður sagði og færði okkur Geira sitthvort eintakið. Það er óhætt að mæla með þessum grip, þar sem margir fremstu gítarleikarar landsins fara hreint á kostum.

 

Diskurinn nýútkomni

Meðal þeirra sem fram koma ásamt Bjössa og Geira eru: Tryggvi Hubner, Þórður Árna, Jón Páll, Gunnar Ringsted, Ólafur Gaukur, Þorsteinn Magnússon, Vilhjálmur Guðjónsson, Hjörtur Steinarsson, Eðvarð Lárusson, Sævar Árnason og Halldór Bragason.

Björn Thoroddsen spilaði margoft á Álafoss föt bezt á sínum tíma og mætti alltaf með einvala lið tónlistarmanna með sér. Þeir voru margir ógleymanlegir og magnaði tónleikarnir sem hann hélt þar.

Til hamingju með diskinn Bjössi og takk fyrir mig.

Athugasemdir

[steinimagg, 13.1.2010 kl. 18:19]

Já ég sá hann tvisvar eða þrisvar (kannski oftar :-) á Álafoss föt bezt, það var alveg magnað.

[Karl Tómasson, 13.1.2010 kl. 18:47]

Björn Thoroddsen átti marga magnaða spretti á Fötunum. Mér eru t.d. minnisstæðir tónleikarnir, þar sem hann lék, ásamt Símon, heitnum Kuran og félögum.

Bestu kveðjur frá K. Tomm.

[Haukur Nikulásson, 14.1.2010 kl. 08:51]

Ég missti af þessum tónleikum en heyrði eins og margir að þetta hefði verið þrusugott kvöld. Ég myndi gjarnan vilja eignast þennan disk. Ég sé hann ekki á tonlist.is. Hvar fæst hann?

[Karl Tómasson, 14.1.2010 kl. 09:03]

Heill og sæll Haukur.

Eins og ég sagði, þá fékk ég diskinn hjá Bjössa rétt nýkomin til landsins.

Sennilega er verið að dreifa honum þessa dagana í verslanir.

Það er gaman að heyra í þessum gítarleikurum, ungum sem gömlum refum.

Bestu kveðjur frá Kalla Tomm.

[Haukur Nikulásson, 14.1.2010 kl. 09:34]

Bjössi má alveg selja mér hann sjálfur. Hann getur þá loksins selt mér eitthvað.

Ég seldi honum nefnilega Fender Super Reverb gítarmagnara árið 1976 sem Friðrik Karlsson átti á undan mér. Hvað skyldi hafa orðið af þeim stóra magnara? Skyldi vera hægt að rekja slíka sögu?

[Haukur Nikulásson, 14.1.2010 kl. 09:40]

Fyrirgefðu, þetta var Fendir Super Six Reverb. Í honum voru 6 10" hátalarar, stór og þungur og flott sánd!