Þegar ég seldi UAZ, þá glæsi bifreið

Ég hef í gegnum árin nokkrum sinnum fengist við sölumennsku og alltaf haft jafn gaman af. Hápunkturinn hjá mér í því starfi var þegar Halldór, heitinn, Snorrason stofnandi Aðalbílasölunnar réði mig til starfa á sinni gömlu og þekktu bílasölu. 

Sérstaklega er mér minnisstætt atvinnu viðtalið sem ég átti við Halldór og margar þær spurningar sem hann lagði fyrir mig, rokkarann, með hárið niður á mitt bak. Ein þeirra var t.d. sú afhverju ég væri með svona sítt hár og hvort til greina kæmi hjá mér að láta klippa það. Ég sagði strax við Halldór að það kæmi ekki til greina. Hann sagði að loknu viðtalinu við mig að hann myndi hringja í mig og láta mig vita á hvorn veginn sem færi varðandi umsókn mína um starf hjá honum. Nokkru síðar hringdi Halldór í mig og bauð mér að koma til reynslu og mikið var ég spenntur að fá að spreyta mig hjá þeim gamla, ég sem var og er bókstaflega forfallinn bíladellu karl.

Við Aðalbílasöluna starfaði ég í rúm tvö ár og mikið óskaplega var það ógleymanlegur og skemmtilegur tími. Halldór var sölumaður engum líkur og með ótrúlega hæfileika sem slíkur. Mannþekkjari, sálfræðingur, ótrúlega minnugur á nöfn viðskiptavina og allt sem við kom sínu starfi. Hann vissi nákvæmlega hverjir voru í kauphugleyðingum og hverjir ekki og benti mér oft á það ef honum fannst ég vera að eyða óþarfa tíma í einhverja sem voru ekki líklegir á meðan aðrir biðu.

Mér er sérstaklega minnisstætt þegar sá gamli skammaði mig fyrir eitt slíkt atvik. Þá var ég í nokkurn tíma búinn að gera allt sem í mínu valdi stóð til að koma gömlum UAZ Rússajeppa í gang með startköplum á bílasöluplaninu og ekkert gekk. Hann sagði við mig þegar ég kom inn og spurði hvort ekki væri til kaðall til að draga drusluna í gang "Kalli minn, hættu að eyða tíma í þessa vitleysu, þennan bíl selur þú ekki" Til að gera langa sögu stutta hrökk gamli Rússajeppinn ekki í gang, þrátt fyrir endalausan drátt um alla borg en mikið ósköp var Halldór stoltur af síðhærða rokkaranum þegar hann gekk frá sölusamningnum og nýi eigandinn af Rússanum dró bílinn heim til sín.

Halldór sagði við mig að honum hefði ekki þrátt fyrir langan tíma í faginu tekist að selja bíl sem þurft hefði að draga út af bílasölunni eftir marg ítrekaðar gangsetningar tilraunir.

Ekki fylgir sögunni hvort gamli Rússinn komst nokkru sinni í gang. Af þessu sölu "afreki" mínu var ég alltaf jafn stoltur og montinn. Ég vildi samt sem áður óska þess að ég ætti þennan forláta UAZ húsbíl í dag. 

Á dögunum fékk ég einn besta sölumann Íslands í heimsókn, söngvarann og tónlistarmanninn góðkunna, Herbert Guðmundsson. Þvílíkur sölumaður og snillingur í faginu er maðurinn. Það rifjuðust upp fyrir mér svo margir taktar frá Halldóri gamla í þann stutta tíma sem Herbert dvaldi hjá mér.

Já fátt er skemmtilegra en að heyra góða sölumenn spreyta sig.