Uppspretta kærleikans

Ég hef undanfarna mánuði verið þess heiðursaðnjótandi að haldið er úti bloggsíðu af einhverjum leynimanni sem virðist mér sérstaklega tileinkuð. Auðvitað er það eitt útaf fyrir sig stórmerkilegt að einhver finni hjá sér þörf að gera slíkt. Fyrstu mánuðina nafngreindi hann mig óspart í skrifum sínum en nú undanfarið virðist hann ekki treysta sér lengur til þess, heldur notar þá frægu aðferð að tala undir rós.

Leynimaðurinn, hugrakki, hikar ekki heldur við að leggja dóm sinn á samferðafólk sitt. Á síðu hans er ekki óalgengt að fólk sé kallað geðsjúklingar, kotbændur, vanhæfir embættismenn, eða jafnvel  fjósakallar.

Leynimaðurinn segist flokksbundinn sjálfstæðismaður og því er óhætt að segja að það veki furðu hversu oft hann fárast út í samstarf núverandi meirihluta Sjálfstæðismanna og Vinstri grænna í Mosfellsbæ. Tilvist okkar Vinstri grænna í því samstarfi virðist honum sérstaklega erfiður biti að kyngja.

Nú spyr maður sig, er leynimaðurinn þegar upp er staðið ekki nógu greindur? Honum fatast svo hratt flugið. Það er sama hvað hann tekur sér orðið fyrir hendur, ekkert gengur upp. Það vill engin lengur þekkja leynimanninn eða hans fólk. Allir hættir að mæta á fundi hjá honum, ekkert fjölmiðlafár í kringum hann, engar athugasemdir á síðuna hans. Með öðrum orðum allt er á niðurleið. Ég tel því rétt að reyna að rétta honum hjálparhönd. Tilfinningagreind er honum ofarlega í huga eins og sjá má á skrifum hans og því er mitt fyrsta heilræði til leynimannsins að lesa sér til um hana og reyna að læra af.   

Til að komast inn á síðu þessa hugrakka manns er auðveldast að fara fyrst inn á heimasíðu umhverfissamtaka sem kenna sig við Varmá og þaðan er slóð inn á þessa síðu sem ber heitið Valdi Sturlaugz. Varmársamtaka Valdi, eins og hann var einhvertíma kallaður breytir reyndar oft um nafn og á það einnig til svona öðru hvoru að fjarlægja part af skrifum sínum og þá einna helst þau sem hann setur inn um miðjar nætur.

Ég hvet alla sem sem hafa áhuga á umhverfismálum, mannrækt, auknu flæði í mannlegum samskiptum og síðast en ekki síst, hafa mikinn kærleika að bera að líta við hjá Varmársamtökunum og vippa sér þaðan yfir á Valda, það er á við marga jóga tíma.