Nokkrar myndir frá góðum degi

Nýlega skrifaði ég grein um góðan og fallegan dag sem við áttum í Mosfellsbæ. Færsluna má sjá fyrir neðan þá síðustu. Þá vígðum við skóla og kvöddum einn af okkar ástsælustu kennurum, Sigríði Johnsen. 

Hér koma nokkrar myndir frá þessum fallega og góða degi.

 

 

 

 

Ævintýrið sem kom okkur hvað mest á óvart

Gildran hafði í raun aldrei verið hljómsveit sem fékkst við að spila annað en að mestu sín eigin lög. Vissulega tókum við gamla slagara inn á milli á tónleikum okkar og uppákomum og höfðum gaman af því og þá voru það auðvitað lög frá helstu áhrifamönnum okkar og átrúnaðargoðum.

Nokkru síðar, eftir að við vorum ákveðnir í að taka frí, fluttum við dagskrá sem sló gersamlega í gegn og kom öllum á óvart og sennilega þegar upp er staðið mest okkur sjálfum.

Sagan var þannig að eftir eina tónleika á Álafoss föt bezt í Mosfellsbæ, ræddum við það félagarnir að gaman væri að halda eina tónleika í Mosó og að sjálfsögðu á Álafoss föt bezt og spila eingöngu lög Creedence Clearwater Revival.

Við höfðum í gegnum árin flutt mörg lög þeirrar frábæru hljómsveitar sem var einnig í miklu uppáhaldi hjá okkur félögunum. Þessi hugmynd hefði vafalaust aldrei komið upp nema vegna þess að við kunnum að spila flest lög þeirra og vissum að söngvari okkar, hann Biggi, var engum líkur þegar kom að þessum lögum.

Ákveðið var að auglýsa CCR helgi á Álafoss föt bezt og viti menn, þetta varð eitt af okkar stóru ævintýrum.

Þessa dagskrá fluttum við 60 sinnum í Mosfellsbæ á Álafoss föt bezt, í hálft ár á Hótel Íslandi og í hálft ár á Kaffi Reykjavík. Einnig ferðuðumst við um land allt með þessa dagskrá. Í rúm tvö ár gerðum við ekkert annað. Það sem þetta virkaði og oftast komust færri að en vildu á þeim stöðum sem við spiluðum.

Þetta ævintýri kom okkur félögunum gersamlega á óvart og var einstaklega skemmtilegt.

Gildrumezz með Eiríki Haukssyni sem tróð upp með okkur á ógleymanlegum tónleikum í Mosfellsbæ í risatjaldi við Álafoss föt bezt og á Akureyri.

Síðar hljóðrituðum við Gildrumezz, eins og við kölluðum okkur þá, hljómplötu með öllum þessum lögum snillinganna í CCR. Gítarleikari var Sigurgeir Sigmundsson, söngvari Birgir Haraldsson, trommari Karl Tómasson og bassaleikari var Jóhann Ásmundsson.

Þessi hljómplata er enn sem komið er sú síðasta sem við höfum hljóðritað saman.

Þar með er þessari yfirferð minni um samstarf okkar og hljómplötuútgáfu lokið í bili.

Ég vona að þið hafið haft gaman af.

Bestu kveðjur frá Kalla Tomm úr Mosó. 

Félagarnir og vinirnir í 50 ára afmæli höfðingjans og stórsöngvarans

Bigga Haralds nú á dögunum.

 

Góður og fallegur dagur í Mosó

Mosfellsbær grænn og fallegur í dag

Veðrið lék við okkur Mosfellinga eins og fleiri landsmenn í dag. Við vígðum nýju skólastofurnar okkar í landi Helgafells sem hafa fengið nafnið Brekkukot. Ég held hreinlega að leitun sé að eins fallegu skólastæði.

Þessi skóli kemur í upphafi  til með að gegna hálfgerðri útibússtöðu fyrir væntanlegan Krikaskóla sem fljótlega verður hafist handa við að reisa og verður án vafa einn glæsilegasti skóli landsins. Að því loknu mun hann taka við væntanlegum nýbúum í landi Helgafells.

Herdís Sigurjónsdóttir formaður fræðslunefndar hélt góða og fróðlega tölu um tilurð skólans. Séra Ragnheiður Jónsdóttir blessaði mannvirkið og komandi skólastarf og að lokum hélt Þrúður Hjelm ný ráðin skólastjóri góða tölu.

Að þessu loknu stormaði öll hersingin í Hlégarð til að kveðja einn af okkar ástsælustu kennurum og skólastjóra í Lágafellsskóla nú hin síðari ár Sigríði Johnsen. Sigríður réð sig til starfa í Mosfellsbæ fyrir um 30 árum og hefur frá þeim tíma unnið óhemju gott og óeigingjarnt starf í skólamálum. Sigríður er einstök kona sem hefur með krafti sínum, elskulegheitum og frammúrskarandi stjórnunarhæfileikum átt sinn þátt í því að koma öllu skólastarfi í Mosfellsbæ í hæstu hæðir. Slíkri manneskju og starfskrafti verður seint full þakkað.

Mikið óskaplega þótti mér vænt um hlýleg og falleg orð hennar til pabba í ræðu hennar í dag en pabbi var skólastjóri í Varmárskóla og réði hana til starfa þegar hún kom í Mosfellssveitina. Hún talaði m.a. um það þegar pabbi leiddi hana um skólann til að kynna henni starfið og þegar hún hitti í þeirri skoðunarferð Birgi D. Sveinsson, kennara og síðar skólastjóra og stofnanda Skólahljómsveitar Mosfellssveitar. Hún talaði um að pabbi hafi reykt pípu og Birgir vindla sem hafi ekki þótt tiltökumál þá í skólahúsum. Eftir þessu man ég vissulega en samt óljóst. Það er einstaklega gaman að heyra svo mælska og skemmtilega konu eins og Sigríði segja frá.

Sigríður kom einnig mikið inn á það mikilvæga starf sem kennarar vinna um land allt og sagði þetta sennilega eitt skemmtilegasta starf sem hægt væri að hugsa sér.

Snemma í sumar heimsóttu Birgir og Jórunn okkur Línu og áttum við saman notalega stund og heilmikið og gott spjall. Birgir færði okkur þá gamlar og einstakar myndir sem hann á í fórum sínum, einar af mörgum og ég hef gaman af að fá tækifæri til að láta fylgja þessari færslu minni.

Mikil vinátta ríkti á meðal okkar fjölskyldna og eins og ég hef komið að störfuðu Birgir og pabbi náið saman í rúma tvo áratugi.

Samstarf þeirra og vinátta hófst í Brúarlandsskóla þar sem afi Lárus var skólastjóri.

Hér koma myndirnar og myndatextar undir hverri mynd. Takk fyrir þessa einstaklega skemmtilegu sendingu kæri Birgir.

Jóhanna skólastjóri Lágafellsskóla,

Garðar eiginmaður Sigríðar og Sigríður á góðri stund.

Séra Bjarni, Bragi Melax, Tómas, Ari Birgir, Guðmundur,

Lárus og Klara Klængs.

Guðmundur, Birgir D. Sigvaldi Sturlaugs, ( bróðir pabba) 

Klara, pabbi, Eyjólfur (pabbi Magga í Latabæ, sjáið svipinn.) og afi.

Jórunn, kona Birgis og mamma í útileigu á Laugarvatni.

Pabbi og Birgir á góðri stund í útileigu.

Afi Lárus, skólastjóri á Brúarlandi og Gunnlaugur Hreinsson.

 

Rúm vika í fjörið

Aðra helgi verður haldin okkar árlega bæjarhátíð í Túninu heima. Undirbúningur hefur eins og áður verið undir öruggri stjórn Daða Þórs Einarssonar. Daði á sannarlega hrós skilið fyrir þá miklu vinnu og metnað sem hann leggur ávalt í undirbúning fyrir hátíðina.

Nú er bara að vona að veðrið leiki við okkur og að sem flestir íbúar taki þátt í fjörinu.

 

Af heimasíðu Mosfellsbæjar mos.is

Við skipulagningu hátíðarinnar verður lögð áhersla á að skemmtileg innanbæjarstemmning ríki á hátíðinni okkar og að sem flestir bæjarbúar séu þátttakendur.. Liður í því hefur verið að virkja sem flesta listamenn, einstaklinga og félög í Mosfellsbæ og búa til dagskrá sem endurspeglar þá sveit í borg sem er okkar aðalsmerki. Til viðbótar þessu verða fengnir fyrsta flokks listamenn víðs vegar að. Þessi blanda af dagskráratriðum heppnaðist sérlega vel í fyrra.

Önnur ástæða fyrir því hversu vel gekk var ekki síst sú að bæjarbúar lögðust á eitt um að gera hátíðina eftirminnilega og skemmtilega. Dæmi um það eru skreytingar í mismunandi litum eftir hverfum. Þá grilluðu grannar einnig víða saman.

Heyrst hefur að hverfin séu þegar farin að skipuleggja skreytingar og grill fyrir hátíðina í ár!

Hægt er að hafa samband með tölvupósti á slóðann: [e-mail]  fyrir nánari upplýsingar. 

Besti bloggari Íslands. Rúmlega 800 hafa nú kosið og Lára Hanna leiðir hópinn.

Kæru bloggvinir og aðrir gestir. Baráttan er hörð á toppnum í kosningu um besta bloggara Íslands. Þegar þetta er skrifað er Lára Hanna með forystuna. Jens Guð, Jenný Anna, Ómar Ragnars og Jóna Á Gísla eru öll í hnapp í baráttunni á eftir Láru Hönnu og skiptast þau reyndar reglulega á um toppsætið.

Endilega takið þátt.

Bestu kveðjur frá Kalla Tomm úr Mosó

Sextíuogsex

Árið 1993 fór Gildran í frí og upp úr því stofnuðum við Biggi dúettinn Sextíuogsex. Dúett sem varð fljótlega tríó með Frikka Hall, þeim ótrúlega náttúru tónlistarmanni, sem hefur komið mörgum á óvart með tónlistarhæfileikum sínum. Einnig starfaði með okkur í Sextíuogsex Jonni Ólafs Pelicani. Mikill húmoristi og snillingur, fullur af grallaraskap og endalausri reynslu sem var ómetanleg fyrir okkur.

Það sem meira var að upp úr þessu ævintýri okkar komu tveir hljómdiskar sem við hljóðrituðum á ógleymanlegum tíma með Óla í Hvarfi. Sextíuogsex var nefnilega svolítið skemmtileg hljómsveit.

Við spiluðum um land allt og það var bókstaflega brjálað að gera hjá okkur. Oftar en ekki fyrir troðfullum litlum krám. Krám sem höfðu öllu jafna ekki átt að venjast mikilli aðsókn. Það kom fyrir að auglýst væri að Gildran væri með tónleika. Það var stundum svolítið erfitt hjá okkur Bigga í upphafi slíkra tónleika að réttlæta þann gjörning en oftast tókst það.

Eitt sumarið fórum við með Bylgjunni og öllu hennar starfsfólki hringinn í kringum Ísland. Það var einstaklega skemmtileg ferð. Þá tróðum við upp við öll tækifæri í útvarpsþáttum þeirra fyrri part dags um land allt og síðar um kvöldið með dansleik. 

Þetta 66 ævintýri var sannarlega skemmtilegur tími.

Birgir Haraldsson 50 ára

Vinur minn og samstarfsfélagi í 30 ár Birgir Haraldsson fagnaði í gær fimmtugs afmæli sínu með glæsibrag. Samstarf okkar hófst árið 1979 og höfum við frá þeim tíma m.a. hljóðritað saman 8 hljómplötur og farið saman hundrað hringi í kringum Ísland.

Birgir er ekki einungis stórkostlegur söngvari og engum líkur sem slíkur. Heldur er hann einnig, ein besta manneskja sem ég hef nokkru sinni kynnst. Skemmtilegur, heiðarlegur og laus við alla tilgerð.

Til hamingju með áfangann elsku vinur.

Auðvitað var mikið sungið og spilað í veislunni og m.a. tókum við félagarnir í Gildrunni tvö lög. Andvökunætur og Mærina og mikið höfðum við gaman að því. 

Myndin var tekin af okkur eftir uppákomuna í gær.

Sigurgeir, Jói Ásmunds, Biggi Haralds og Kalli Tomm.

 

 

Þetta er skemmtilegt. Endilega fáið ykkur svona hljóðfæri

<object width="425" height="344"><param name="movie" value="http://www.youtube.com/v/2IPoTsqoujM&hl=en&fs=1"></param><param name="allowFullScreen" value="true"></param><embed src="http://www.youtube.com/v/2IPoTsqoujM&hl=en&fs=1" type="application/x-shockwave-flash" allowfullscreen="true" width="425" height="344"></embed></object>

Ógleymanlegur tími og lærdómur

Ég hef nú að undanförnu skrifað um samstarf okkar félaganna í Gildrunni og þær hljómplötur sem við gáfum út á þeim tíma sem við störfuðum saman að fullum krafti.

Gildran var í raun alla tíð svolítil Hulduhljómsveit eins og nafn okkar fyrstu hljómplötu gaf til kynna en aldrei fundum við fyrir öðru en virðingu og hlýju hvert sem við komum.

Hér koma myndir af plötunum okkar sem ég hef fjallað um.

 

 

 

 

 

 

 

 

 

 

 

 

 

Rúmlega 600 manns hafa nú greitt atkvæði í kosningu um besta bloggara Íslands árið 2008

 

 

 

 

 

Ekki hefur staðið á viðbrögðum í kosningunni um, besta bloggara Íslands árið 2008.

Í undanúrslitum voru úrslit nokkuð afgerandi en vegna tæknilegra mistaka var gefinn kostur á því að kjósa um þá 30 einstaklinga sem flest atkvæði fengu.

Endilega takið þátt og enn og aftur þetta er til gamans gert og endilega takið því þannig og ekkert öðruvísi.

Vissulega má segja að nær hefði verið að kalla þennan leik t.d. Uppáhalds bloggarinn minn. Besti bloggari Íslands er bara miklu flottara.

Í fyrra hlaut þessa heiðursnafnbót ofur bloggarinn Jens Guð og svo virðist sem hann ætli lítið að gefa eftir að þessu sinni í baráttunni, þrátt fyrir að nú þjarmi fleiri að honum en fyrir ári síðan. Hér má sjá myndir af þeim sem virðast leiða baráttuna um þessar mundir.

Koma svo og hafa gaman af.

Bestu kveðjur frá Kalla Tomm úr Mosó.