Ritskoðað blogg

Þessa stundina er heilmikil umræða um bloggið á blogginu, þessir og hinir eru að hætta vegna óánægju með Moggabloggið. Aðrir eru að hætta vegna lágkúrulegra skrifa frá hinum og þessum og telja sig betur komna í öðrum félagsskap og svo framvegis og framvegis. Svo virðist sem einhverjir bloggarar láti það fara í taugarnar á sér að geta ekki skrifað um hvað sem er hvenær sem er og hafa nokkrir lent í því að síðum þeirra er lokað. Þeir tala um ritskoðun og heft tjáningarfrelsi en hvað er frelsi? Frelsi er vand með farið. Frelsið snýst m.a. og ekki sýst um það að kunna að fara með það. Frelsi er ekki frelsi ef það er farið að bitna á náunganum og samferðafólki okkar þannig að þau hin sömu vegna frelsis náungans búa við helsi.

Bloggið er öllum opið en auðvitað þarf að hafa eftirlit með því og ég efast ekki um að starfsmenn Moggabloggs séu vandanum vaxnir. Hugmynd Steingríms Joð um netlöggu, hversu heppilegt sem það orðalag nú var á sínum tíma snérist m.a. um þetta.

Eins og ég sagði í síðustu færslu tel ég og efast ekki um að bloggið sé ein skemmtilegasta og jafnframt magnaðasta leið seinni tíma til að viðhalda íslenskri tungu, menningu og texta en auðvitað þurfum við að vanda okkur, vanda okkur alltaf. 

Það er hægt að rokka á drottningunni

Byrjið á því að fá ykkur sæti. Strjúkið vinstri höndinni fram og til baka ofan á lærinu í c.a. hálfa mínútu. Þið eigið að ná um 30 ferðum fram og til baka. Þá er hægri höndinni skellt á hægra lærið og snúið í hringi. Athugið að vinstri höndin á að halda sínu striki upp og niður á sama tíma. Í næsta tíma bætum við inn takti með báðum fótum. Þetta er mjög góð æfing á hverjum morgni fyrir líkama og sál.

Trommuleikarar eru oft spurðir að því hvernig þeir geti gert sitthvorn hlutinn með fótum og höndum. Auðvitað er það heilmikil æfing og aðeins á færi fárra útvaldra. Það er samt rokk og ról í fleiri hljóðfærum en trommunum, t.d. í pípuorgelinu. Pípuorgelið er alltaf kallað drottning hljóðfæranna.

Í þessu fræga verki Bach er t.d. heilmikið að gera hjá hljóðfæraleikaranum. Ég vona að þið hafið ekki svo mikið að gera að þið gefið ykkur ekki tíma til að hlusta á allt verkið.

       

      

Almúgablogg

Ég hef fylgst með blogginu um nokkurra mánaða skeið og undanfarnar vikur tekið þátt í því og haft sérstaklega gaman af. Auðvitað eru svartir sauðir inn á milli sem kunna engin mörk á einu eða neinu eins og alstaðar. Ég hef reynt að hvetja marga bloggvini mína til að láta slíka bjána ekki komast upp með að skemma fyrir okkur hinum sem reynum að gera allt okkar besta til að skrifa um allt og ekkert og hafa gaman af .

Ég held að bloggið sé ein skemmtilegasta og jafnframt magnaðasta leið seinni tíma til að viðhalda íslenskri tungu, menningu og texta.

Eflaust eru margir á öðru máli enda hafa margir kosið að hverfa á braut en ekki alla leið heldur á önnur bloggmið. Bloggmið sem að þeirra mati eru ekki almúgablogg heldur eitthvað allt annað.

Ég kýs áfram almúgabloggið, því þar eru bloggararnir sem hafa að mínu mati púlsinn á okkar tilveru.

 Tilverunni sem við búum í.

Nú er ég þungt huxi

Þegar ég var að vaxa úr grasi þótti við hæfi að buxurnar væru vel girtar.

Í dag virðist sem ungdómurinn sé að vaxa upp úr brókunum. Hver axlar ábyrgðina? Jú auðvitað við sem huxum um þau dax daglega. Eilíft pex er samt ekki aðferðin til að fá unga fólkið til að huxa. Þá er maður bara talinn kex ruglaður.

Ég faxaði bréf um daginn á góðan vin sem er alltaf að baxa við eitthvað og hefur ráð undir rifi hverju. Hann sagði mér að saxa niður ávexti og mixa góðann drykk á sunnudaxmorgni og fara svo í messu í Fox vox kirkju. Eftir það yxu þessar dillur unglinganna ekkert í augum mínum.

Um daginn þegar ég var ásmt fjölskyldu minni erlendis var ég spurður að því hvort við værum frá Finnlandi. Þessi spurning kom mér á óvart en eftir á að hyggja ekki.    

Mannvonska

Það var ömurlegt að lesa greinina í Morgunblaðinu í gær um drápin á górillunum í Virunga þjóðgarðinum í Kongó í gær.

Górillurnar voru fjórar og allar skotnar í hnakkann eins og um aftöku hefði verið að ræða. Ekki var síður átakanlegt að heyra að ein lítil górilla hafi hjúfrað sig að einu líkinu þegar að var komið.

Engin skepna myndi gera þetta sagði einn af þjóðgarðsvörðunum.

Þvílíka grimmd þarf til að fremja slíkann verknað.

Sveitin undurfríða

Sveitin mín undurfríða og fallegust allra átti afmæli í gær. Mikið ósköp var gaman að hitta fjöldann allan af sveitungum sínum í sannkölluðu hátíðarsakapi og fagna tímamótunum.

Mosfellssveit sem varð bær fyrir 20 árum er eitt fárra sveitarfélaga sem margir kjósa en þann dag í dag að kalla Mosfellssveit. Það er alltaf jafn vinalegt.  Hvenær heirum við t.d. Garðabæ kallaðan Garðahrepp?

Þegar ég var pínu lítill patti var mamma vön að vagga mér í vöggu heima í Markholti. Markholt var fyrsta gatan í Mosfellssveit. Svo kom Lágholt og Dvergholt og svo framvegis og framvegis og framvegis. Sveitin fríða stækkar ört og er blómlegri en nokkru sinni.

Ég skora á alla sveitunga mína nær og fjær að gera sér ferð í Kjarna og sjá ljósmyndasýninguna, Mosfellingar samtímans. Þetta er sýning sem ég og félagar mínir Hilmar Gunn og Magnús Már stöndum fyrir í samvinnu við listasalinn í Mosó.

Ég læt hér nokkrar myndir fljóta með sem eru á sýningunni.

 

 

 

 

 

 

 

Mosfellsbær 20 ára

Í dag fögnum við Mosfellingar því að liðin eru 20 ár frá því að Mosfellsveit varð að Mosfellsbæ. Í tilefni dagsins verður hátíðardagskrá í Kjarna, nánar tiltekið í listasal og bókasafni bæjarins og eru allir boðnir velkomnir. Dagskráin sem hefst kl. 17 verður svohljóðandi. 

1. Tríó Reynis Sigurðssonar leikur.  2. Hátíðarfundur bæjarstjórnar. 3. Ljósmyndasýning úr safni bæjarblaðsins Mosfellings. Sýningin er samstarfsverkefni Hilmars Gunnarssonar, Karls Tómassonar, Magnúsar Más Haraldssonar og umsjónarmanna Listasalarins. 3. ".... og Fjöllin urðu kyr" Dagskrá í umsjá Bjarka Bjarnasonar og Sigurðar Ingva Snorrasonar. Fram koma leikarar og tónlistarmenn. 

Besta bloggsíða Íslands. Úrslitin ljós!!!

Nú liggur orðið ljóst fyrir hverjir eiga möguleika á því að hljóta sæmdarheitið: Besti bloggari Íslands.

Í skoðanakönnunninni hér til hliðar eru nöfn þeirra einstaklinga sem flest atkvæði fengu í forvalinu.

Nú er því ekkert til fyrirstöðu að greiða einhverjum þessara eðalbloggara atkvæði sitt. Það verður svo fimmtudaginn 30. ágúst kl. 22:00 sem kosningu líkur og úrslit liggja fyrir.

Leyndarmálinu uppljóstrað

Kæru bloggvinir og aðrir gestir ég vona að þið erfið ekki við mig eitt eða neitt að lokinni lesningunni hér að neðan.

Þannig er að fyrir nákvæmlega hálfum mánuði sat ég með góðum vini mínum í hrókasamræðum, m.a. um bloggið. Þessi góði vinur minn hefur eins og svo margir aðrir látið bloggið fara svolítið í taugarnar á sér. Ég held samt að hann langi voða mikið að prófa og hélt ég því m.a. fram við hann. Ég sagðist sjá hann fyrir mér liggjandi á blogginu og háma í sig fróðleik og skemmtun af ýmsu tagi án þess að þora að taka þátt í fjörinu, ekki einu sinni með athugasemdafærslu. Ég sagði líka við hann að galdurinn við bloggið, rétt eins og lífið sjálft, væri á stundum að taka sig ekki of alvarlega. Bloggarar þyrftu að þola gagnrýni á skrif sín og þankagang og taka því eins og fólk.

Ég sagði honum einnig að til væru nokrir eðalbloggarar sem vildu helst engar athugasemdir á sína síðu og hann gæti t.d. verið í hópi þeirra.

Hann vildi meina að það væri ekkert mál að hrúa til sín gestum á bloggið eins og mörgum bloggurum virtist svo í mun um að gera. Málið væri bara að skrifa einhverjar neðanbeltis pælingar eða einhverja dúndur pólitík og þar með væri málið leist. Ég þvertók fyrir þetta hjá honum og sagði það alls ekkert markmið allra bloggara, ég gæti til að mynda fjölgað heimsóknum hjá mér margfallt ef það væri mér eitthvert kappsmál og það án þess að tala um eitthvað neðanbeltis eða pólitík.

Gerðu það þá sagði hann!!!  Nú voru góð ráð dýr, átti ég að standa við stóru orðin?

Hann sagði að ef mér tækist að komast í hóp 100 vinsælustu bloggara á hálfum mánuði myndi hann færa mér glaðning þegar hann kæmi úr sumarfríinu.

Greindarpróf og vinsældakosningar

Undanfarnar tvær vikur hefur blogg mitt einkennst af greindarprófum og bloggvinsældum. Ég gat ekki valið mér efiðara viðfangsefni, því að á fáu hef ég eins lítinn áhuga og litla trú.

Vinsælda- og viskupróf og hvað er best og hvað er vest eru forkastanlega heimskar mælingar, oftar en ekki.

Auðvitað ætla ég samt að enda þetta með stæl og bjóða gestum mínum að velja sinn uppáhalds bloggara eins og fram kemur hér efst í skrifum mínum og auðvitað er það í gamni gert og vonandi taka flestir því þannig. Nöfnin á tíu efstu eru komin í skoðanakönnunina hér að ofan. 

Stundum má taka þátt í glensi þó það virki ekkert sérstaklega gáfulegt og til þess var leikurinn gerður. Það hafa í það minnsta nógu margir gert á minni síðu undanfarnar tvær vikur á skemmtilegan og jákvæðan hátt og fyrir vikið náði ég markmiðinu.

Hátíð í Mosfellsbæ

Í lokin skora ég á alla að gera sér ferð í Mosfellsbæinn helgina 23. - 26. ágúst. Þá verður okkar árlega bæjarhátíð, Í túninu heima. Bærinn fagnar 20 ára afmæli 9. ágúst og verður hátíðin glæsilegri en nokkru sinni. Ég mun koma betur að þessu seinna.

Nú er mál að linni og ætla ég nú að taka mér smá bloggfrí næstu daga enda stendur svo mikið til hjá okkur í Mosó og ég er líka hálf dasaður eftir öll skrifin.

Ég vona að ég hrynji ekki niður vinsældalistann fyrir vikið.

Lifið heil. Kalli Tomm

Besta bloggsíða Íslands. Allt á suðupunkti.

Gríðarleg harka einkennir keppnina um bestu bloggsíðu Íslands. Nú er svo komið að nöfn þekktustu bloggara eru komin í baráttuna sem þó má með sanni segja að hafi einkennst af drengskap og góðum anda meðal þeirra sem eru í fremstu víglínu þess sæmdarheitis að verða kosinn besti bloggari Íslands.

Efstu bloggarar keppast við að kjósa hvern annan og ruglar það óneitanlega talningarfólk við störf sín. Því fer ég að ráði bloggvinkonu minnar Guðríðar Haraldsdóttur og skelli þeim tíu efstu að loknum sólarhring í hina hefðbundnu Moggabloggs skoðanakönnun.  

Röð efstu manna að loknum síðasta sólarhring er að mestu óbreytt.  Nú er að sjá hverjir komast í úrslit. Það ræðst eftir sólarhring.

Bestu kveðjur frá Kalla Tomm. 

Besta bloggsíða Íslands, baráttan harðnar

Nú er baráttan farin að harna á toppnum. Jón Steinar Ragnarsson (prakkarinn) er kominn upp að Hlið Jónu Á Gísladóttur (jonaa) og Jens Guð (jensgud) er kominn upp að hlið Önnu Ólafsdóttur (anno)

Nú virðist sem hlutirnir geti gerst hratt, því aðeins vantar suma örfá atkvæði til að blanda sér í toppbaráttuna.

Næstu tölur koma eftir sólarhring.

Bestu kveðjur frá Kalla Tomm úr Mosó.