Hvaða foss er fallegastur á Íslandi og hvert eigum við að fara í fríinu?

Þar sem ég er sérstakur áhugamaður um fossa varpa ég nú fram þessari spurningu til gamans. Fjölskyldan stefnir á heildar ferðalag um landið, nú skal það skoðað.

Það væri gaman að heyra frá ykkur og fá hugmyndir um áhugaverða staði til að heimsækja.

Bestu kveðjur frá Kalla Tomm.

Er þetta ekki flott kæru vinir?

Fallegt baráttulag

Erum við mýs eða menn íslendingar?

Getur verið að loforð Samfylkingarinnar, þess eðlis að við Íslendingar eigum eftir að ganga um gullhúðaðar gangstéttar, sólbrúnir með Rolex-úr og aka um á Rolls-royce bifreiðum og snýta okkur á evrum eftir inngöngu í Evrópubandalagið eigi eftir fram að ganga?

Íslendingar sem þjóð er ekki lengur til ef heldur sem horfir. Tugmilljónaþjóðir eins og bretar og þjóðverjar hafa yfirtekið landið upp í ICE-SAVE skuldir. Íslendingar eru að mestu farnir til norðurlanda og margir líka til vesturheims.

Samfylkingunni virðist vera að takast markmið sitt að gera okkur að alheimsborgurum. Evrópusambandsflotinn er búinn að eyðileggja fiskimiðin. Virkjanir eru með 30m millibili og öll raforka er flutt til evrópu. Bretar og Frakkar geyma kjarnaorku-úrgang sem ekki er hægt að endurnýta í Egilshöllinni.

Alþingishúsið er sumarbústaður Gordons Browns og Alistair Darling er á sjóskíðum á þingvallavatni.

Þessi framtíðarsýn gæti orðið að raunveruleika ef alþingismenn gera þau afglöp að samþykkja ICE-SAVE nauðasamninginn. Þetta mál er stærra en svo að þarna ráði flokkapólitík ferðinni.

Afstýrum stórkostlegum mistökum. Látum ekki valta yfir okkur Íslendingar.

 

Einstakur listamaður

Sérstakir skúringadagar heyra sögunni til

Heimasætan á bænum, hún Birna Karls, kom í kvöld með góða hugmynd sem hún með leikrænum tilburðum kynnti fyrir foreldrum sínum.

Hér eftir eiga allir fjölskyldumeðlimir að nota moppur sem inniskó. Ballerínur eins og hún geta klæðst einni moppu, því þá þarf fólk að geta farið í fyrstu "porsesjón" Aðrir, t.d. stirðbusar eins og ég klæðast tveim eins og um hefðbundna inniskó sé að ræða.

Á þriggja daga fresti eru moppurnar settar í þvott og þá er gott að eiga tvo umganga af þeim. Einnig getur reynst vel, að eiga sérstakar gestamoppur.

Þessi er fyrir ballerínur sem geta farið í fyrstu porsesjón.

Þessar eru fyrir stirðbusa.

 

 

 

 

Ég er sammála PETA (People for the Ethical Treatment of Animals

Þetta er í eina skiptið sem Barack Obama hefur valdið mér vonbrigðum fram að þessu.

Hann hefði frekar átt að blása á litlu fluguna og leifa henni að flögra um, alsælli allt í kringum sig.

Hún var eflaust að fagna komu hans í embættið, loksins fékk hún tækifærið til þess.

 

Ógleymanleg markvarsla

Hann var kostulegur markvörður og karakter, Rene Higuita, sem lék með landsliði Colombiu á heimsmeistaramótinu árið 1995. Þessi markvarsla er kostuleg og þá átti hann það einnig oft til að leika sér með boltann í teignum eða jafnvel rekja hann upp hálfan völlinn. 

Hann einn og sér gerði það að verkum að mann hlakkaði alltaf jafn mikið til að sjá liðið spila á þessu heimsmeistaramóti.

Einstakt starf

Það er með sanni hægt að segja að Páll Helgason tónlistarmaður og kórstjórnandi í Mosfellsbæ hafi unnið einstakt starf í þágu tónlistarinnar í Mosfellsbæ.

Páll hefur um árabil stjórnað fjórum kórum í bæjarfélaginu. Álafosskórnum, Vorboðum, kór eldriborgara, Mosfellskórnum og Karlakór Kjalnesinga.

Í kringum Palla Helga og allt hans starf ríkir alltaf einstaklega góður andi.

Góðir gestir hér kemur Karlakór Kjalnesinga með lag af nýútkomnum geisladiski sem ég skora á alla að eignast.

Mútuþægni ?

"Varmársamtökin verða að gegna hlutverki sérstaks saksóknara eða Evu Joly hér í Mosfellsbæ við sveitarstjórnarkosningar á næsta ári. Vera leiðandi um opna og heiðarlega umræðu þar sem sitjandi stjórnvöld þurfa að verja gjörðir sínar."

Þetta skrifar Gunnlaugur B Ólafsson fyrrum formaður Varmársamtakanna á síðu sinni í gær. Draumar Gunnlaugs um stöðu Varmársamtakanna hér í bæ eru ekki nýir af nálinni og svo sem ekkert við þeim að segja, hverjum og einum er hollt að láta sig dreyma, það má bara ekki gleymast að draumar geta verið fallvaltir.

Það sem vekur hinsvegar furðu mína við þessi skrif Gunnlaugs er eina athugasemdin sem komin er við þau. Það er athugasemd skrifuð af Arnþóri Jónssyni og þar segir:

"Aðrir í stjórn hafa hagað sér eins og gera má ráð fyrir á meðan Karl Tómasson forseti bæjarstjórnar hefur svikið kjósendur sína og selt verktökum hugsjónir sínar fyrir smáaura."

Nú er mér nóg boðið og fer ég fram á það við Arnþór og Varmársamtökin í heild sinni að þau útskýri á ábyrgan hátt afhverju ég sæti stanslausum ásökunum af hendi meðlima samtakanna um að ég þiggi mútur í einni eða annarri mynd. Skemmst er að minnast hamagangsins sem Ólafur í Hvarfi var með hér á síðunni minni vegna þess sem hann kallaði mútuþægni bæjarstjórnar og vildi gera mig ábyrgan fyrir að sú meinta mútuþægni viðgengist enn.

Einnig er vert að minnast orða Snorra Freys Hilmarssonar formanns Torfusamtakanna um mútuþægni bæjarfulltrúa í Mosfellsbæ gagnvart verktökum og fór ekki á milli mála að í þeim orðum átti hann við mig. Aðspurður sagðist hann hafa þetta eftir fólki í Mosfellsbæ en hann var ófáanlegur til þess að nefna það fólk á nafn. Hvað kemur formanni íbúasamtaka í öðru sveitarfélagi til að staðhæfa á þennan hátt um það hvernig málum er háttað í öðrum bæjarfélögum, nema hann hafi það frá einhverjum sem hann telur skothelda heimildarmenn? Það þarf ekki sérfræðing til þess að sjá tengslin á milli Torfusamtakanna og Varmársamtakanna og hvaðan Snorri hafði sínar heimildir.

Arnþór Jónsson, fyrrum íbúi Álafosskvosar, sem af einhverjum ástæðum flutti ekki bara úr Kvosinni heldur einnig bæjarfélaginu fyrir mörgum árum, sér sig nú knúinn til þess að skeiða fram á ritvöllinn með þessar ásakanir. Álafosskvosin er okkur öllum hugleikin, en að hún sé notuð sem skálkaskjól til handa fólki sem á í erfiðleikum með sjálft sig og þarf að taka það út á öðrum, er ekki samboðið Álafosskvosinni.

Það er ágætt að fyrrum formaður Varmársamtakanna láti sig dreyma um framtíð samtakanna en honum væri nær að beina orðum sínum um opna og heiðarlega umræðu inná við til samtakanna sjálfra til að byrja með og sjái til þess að samtökin geri hreint fyrir sínum dyrum. Því alltaf ber allt að sama brunni - Varmársamtökin eru það eina sem það fólk sem ásakar mig um mútuþægni og sér ástæðu til þess að halda úti bloggsíðum sem innihalda níðskrif í minn garð undir nafnleynd eiga sameiginlegt, bloggsíðum sem öllum hefur verið lokað vegna óhroðans.

Alltaf ber nafn Varmársamtakanna á góma og aldrei hafa samtökin séð sóma sinn í því að virkilega hreinsa af sér þessi tengsl og upplýsa hvað raunverulega er í gangi. Opin og heiðarleg umræða Varmársamtakanna ætti m.a. að fela í sér að gera allt sem í þeirra valdi stendur að upplýsa hvaðan einelti og skítleg framkoma í garð samborgaranna er komin. Sérstaklega þegar sú umræða virðist alltaf eiga rætur sínar innan samtakanna eða í tengslum við þau!!!

 

Arnþór - útskýrðu mál þitt!!! Ég krefst þess að þú sannir orð þín og sýnir fram á svo sannanlegt sé að ég hafi selt verktökum hugsjónir mínar fyrir smáaura.

Ég vil benda þér að tilhæfulausar ásakanir af þessu tagi varða við lög.