Hvað eru margir í Varmársamtökunum í dag???

Nú velti ég því orðið fyrir mér hvað eru margir í Varmársamtökunum.

Á fundi sem Mosfellsbær hélt í gær til að kynna nýja tengibraut í væntanlegt Leirvogstunguhverfi mættu að vanda áhugasamir meðlimir Varmársamtakanna. Eins og undanfarið eru þetta yfirleitt sömu 3-5 manneskjurnar sem láta að sér kveða. Því spyr ég mig, hvar er áhuginn??? 

Samtökin státa sig af hundruðum félagsmanna en hvar eru þeir? Fund eftir fund eftir fund mæta aðeins 4 - 9 félagsmenn Varmásamtakanna og oftar en ekki eru c.a. þrír sem spyrja fyrir hönd samtakanna. 

Hvar er áhuginn??? Hvar eru Bryndís, Jón Baldvin, Árni Matt, Samfylkingin, Framsókn, og allir sem hafa stutt samtökin með ráðum og dáðum og endalausum skrifum??? 

Það koma engar jákvæðar athugasemdir við hinum nýju tillögum samtakanna að breyttri aðkomu í Helgafellsland frá þessum aðilum. 

Þetta áhugaleysi vekur óneitanlega furðu.

Kær kveðja frá Kalla Tomm.

Átta dagar í kosningar. Valið er einfalt Vinstri græn og Eiki Hauks

Í dag var ágætis útvarpsfundur hjá efstu frambjóðendum í suðvestur kjördæmi. Fundinum var útvarpað beint úr Mosfellsbænum frá veitingastaðnum Ásláki. Nokkrir gestir mættu á Láka til að hlýða á frambjóðendurna sem stóðu sig ágætlega.

Eins og við var að búast var fulltrúi okkar Vinstri grænna, Ögmundur Jónasson, beittur, skemmtilegur og málefnanlegur. Kobbi Frímans mætti í 30 grílna frakka og engu líkara en þar færi frambjóðandi með lágmark 70% fylgi, slíkur var slátturinn á kappanum þegar hann mætti á svæðið. Jakob er skemmtilegur, við verðum að viðurkenna það. Siv Friðleifs fékk slæm tíðindi um leið og hún gekk inn, því eina ferðina enn mælist hún utan þings í skoðanakönnun. Siv er nú líka svolítið töff eins og Kobbi. Sömu sögu er að segja af Kolbrúnu hjá Frjálslindum, þar vantar enn talsvert upp á að hún komist á þing. Frambjóðendur Sammaranna og Sjallanna stóðu sig bærilega, viðfeldnir strákar. 

Aðeins vantar herslumun upp á samkvæmt þessari könnun að Guðfríður Lilja Grétarsdóttir sé örugg inni fyrir okkur Vinstri græn. Það væri mikil lukka fyrir okkur að fá slíka afburða manneskju á alþingi. Í einu orði sagt frábær kona.

Svo vantar aðeins upp á varaþingmanninn hjá mér en til þess verðum við að tryggja öðlingnum honum Gesti Svavarssyni sem situr í þriðja sæti hjá VG öruggt þingsæti. Á þetta getum við öll haft áhrif 12. maí.

Hvað gengi Eiríks Hauks varðar sama dag í Helsinki getum við Íslendingar reyndar haft lítil áhrif annað en að senda honum góða strauma. Eika hef ég þekkt í 27 ár og hafa leiðir okkar í gegnum tónlistina oft legið saman. Þar ber hæst samkrull og vinátta okkar Gildrumanna og Startara með Pétur heitinn Kristjáns í fararbroddi. Eins eru ógleymanlegir margir frábærir tónleikar sem Gildran hélt með Eika sem sérstakan gest hér í Mósó, á Akureyri og í Reykjavík.

Bestu kveðjur til ykkar allra sem eruð í baráttunni 12. maí þó að sjálfsögðu helst til Ögmundar, Guðfríðar Lilju og Eika.

Á myndunum má sjá Eika bíta eyrað af Davíð Karlssyni trommara í Start og Hljóminn vinsæla úr Mosó skemmta fyrir Vinstri græn í Mosó.

Kær kveðja úr Mosó frá Kalla Tomm.

 

Opinn kynningarfundur um nýjan Tunguveg

Rétt er að skora á sem flesta Mosfellinga að mæta í dag fimmtudaginn 3. maí kl. 20 á opinn kynningarfund í sal yngri deildar Varmárskóla um nýjan Tunguveg.

Farið verður yfir fyrirhugaða legu tengivegarins og kynnt fyrirhuguð hliðrun Skeiðholts, undirgöng og aðrar breytingar sem bæta eiga umferðaröryggi barna á leið í og úr skóla.

Allir íbúar Mosfellsbæjar eru boðnir velkomnir.

Dagskrá fundarins er sem hér segir:

1. Jóhanna B. Hansen bæjarverkfræðingur fer yfir sjónarmið Mosfellsbæjar um væntanlegan Tunguveg. Gylfi Guðjónsson arkitekt og skipulagsráðgjafi fer yfir skipulag og legu vegarins.
2. Yngvi Loftsson frá Landmótun kynnir fyrirliggjandi umhverfisskýrslur.
3. Stefán G. Thors frá VSÓ-Ráðgjöf kynnir væntanlegt umhverfismat og aðkomu almennings að ferlinu.

Varmársamtökin í ham, nei, getur það verið?

Allt frá því að nýr meirihluti bæjarstjórnar var myndaður í Mosfellsbæ í júní 2006 hafa Varmársamtökin haldið uppi linnulausri gagnrýni á vinnubrögð hans. Hamrað á ólýðræðislegum vinnubrögðum og yfirgangi af öllum toga. Varmársamtökin hafa einnig sagt að bæjaryfirvöld láti hagsmuni verktaka ganga fram yfir hagsmuni íbúa, talað um þumbarahátt, þvergirðing, tortryggni og ókurteysi. 

Sérstaklega hefur þeim þó ávallt verið mikið í mun að gagnrýna mig persónulega og nánast láta líta út fyrir að á öllum þessum „hörmungum“ eigi ég einn sök. Því hefur til að mynda margoft verið haldið fram að ég hafi keypt forsetastólinn þrátt fyrir að öllum sé kunnugt um að svo sé ekki. Vinstri græn í Mosfellsbæ urðu þess ekki valdandi að samkomulag náðist ekki um myndun nýrrar bæjarstjórnar. Það var karp Marteins Magnússonar, oddvita framsóknarmanna og Jónasar Sigurðssonar, oddvita Samfylkingarinnar um hvor þeirra ætti að gegna embætti bæjarstjóra sem olli því. Upp úr því sleit Marteinn viðræðum flokkanna.

Þrátt fyrir það hef ég margsinnis fengi skilaboð bæði í tölvu mína og síma undir hinum ýmsu nöfnum og leyninúmerum að ég sé svikari, Júdas, drullusokkur, sé best geymdur í Byrginu hjá Guðmundi, eigi að drulla mér úr Mosfellsbæ og svo framvegis og svo framvegis. Slíkum símtölum hefur m.a. 16 ára sonur minn þurft að svara.

Í marga mánuði sá ég ekki ástæðu til að svara þessum ásökunum og reyndi að leiða þær framhjá mér. Þegar ég svo fór að tjá mig um málið og mínir vinir, virðist sem Varmársamtökin hafi ekki með nokkru móti þolað það að fá á sig gagnrýni. Auðvitað er ekkert óeðlilegt við það að stjórnarmenn og aðrir félagar í Varmársamtökunum hafi pólitískar skoðanir og séu sumir hverjir jafnvel flokksbundnir. Það er nú annað hvort. Á meðan stjórnarmenn Varmársamtakanna tjá sig hins vegar fyrir hönd þeirra á opinberum vettvangi og tala máli tveggja flokka og nota hvert tækifæri til að gera lítið úr störfum meirihluta bæjarstjórnar og þá aðallega Vinstri grænna þá eru samtökin pólitísk.

Hér er eitt dæmi frá Gunnlaugi B.

„Samfylkingin hefur undirbúið vel skilgrindar leiðir sem henta til úrlausnar á viðfangsefnum íslenskra stjórnmála vorið 2007. Sjálfstæðisflokkur og Vinstri grænir telja sig handhafar hins endanlega sannleika og eru tregir til að leyfa opna málefnalega umræðu um marga málaflokka. Tónar það ekki vel við það sem er að gerast í meirihlutasamstarfinu hér í Mosfellsbæ varðandi aðkomu almennings að ákvörðunum í skipulagsmálum?“

Bæjaryfirvöld Mosfellsbæjar hafa gert allt til að koma á móts við kröfur Varmársamtakanna og lagt í það meiri vinnu en dæmi eru um. Því er það rangt að halda því fram að aldrei sé á þau hlustað. Það vita allir starfsmenn á bæjarskrifstofum Mosfellsbæjar að öllum erindum samtakanna er svarað um hæl og eru þau nú allnokkur. 

Einn aðaltalsmaður Varmársamtakanna sagði nýlega: 

„Það hvaða leið mér eða þér eða Röggu ríku eða Helgafellsbyggingum finnst best kemur málinu ekki við fyrr en faglegt mat hefur verið gert af hlutlausum aðila, slíka ákvörðun á ekki að taka á einhverjum tifinningalegum nótum né eftir þörfum landeigenda og verktaka“

Í þessum málflutningi felst slíkur hroki og dónaskapur að engu tali tekur. Bæjaryfirvöld Mosfellsbæjar geta ekki einungis gætt hags Varmársamtakanna,  þau þurfa að gæta hags allra bæjarbúa. 

Nú er svo komið að Varmársamtökin sjá orðið til þess ástæðu að reyna að koma höggi á Hilmar Gunnarsson og Mosfelling. Samtökin segja sig hafa rakið ip-tölur frá heimili hans og aðseturs Mosfellings. Vert er að benda á að á skrifstofu Mosfellings er oft unnið allan sólarhringinn og eins og Hjördís Kvaran segir á bloggi sínu og fullyrðir hefur Hilmar Gunnarsson ekkert með Halldór eða aðra kynlega kvisti að gera sem þaðan skrifa.

Bæjarblaðið Mosfellingur hefur verið starfrækt í Mosfellsbæ í 7 ár. Blaðið hefur alla tíð notið fádæma vinsælda og er með vönduðustu bæjarblöðum sem koma út á landinu. Blaðið hefur frá fyrstu tíð flutt vandaðar og óháðar fréttir úr sveitarfélaginu og hefur aldrei borið skugga á. Hilmar tók fyrir rúmu ári síðan við ritstjórn blaðsins og er ég manna kunnugastur um hversu mikinn metnað hann leggur í það.

Ég er eigandi og stofnandi Mosfellings en kem ekki að vinnslu blaðsins á nokkurn hátt og hef ekki gert frá því Hilmar tók við. Oftar en ekki sé ég ekki blaðið fyrr en á sama tíma og aðrir bæjarbúar. Efnistök blaðsins eru mér að öllu ókunn fram að þeim tíma.

Nú rennur óneitanlega á mig sá grunur að næsta markmið Varmársamtakanna sé að koma höggi á fyrirtækið mitt. Geti Varmársamtökin bent mér á eina frétt úr Mosfellingi þar sem ekki er gætt hlutleysis þá verð ég hissa.

Hilmar Gunnarsson þekki ég betur en svo að hann hafi á því áhuga að skrifa eitthvað undir leyninöfnum. Hann er fádæma vandaður og yfirvegaður maður sem að leggur mikinn metnað í allt sem hann tekur sér fyrir hendur.

Í Mosfellingi hafa Varmársamtökin fengið að koma fram öllu því sem þau hafa sóst eftir enda sagði Gunnlaugur B. Varaformaður samtakanna nýlega orðrétt:  

„Ég er ánægður með Mosfelling og hef ekkert undan blaðinu að kvarta. Finnst Hilmar hafa gert umfjöllun um tengibraut mjög góð skil. Fullur þakklætis og kærleika gagnvart blaðinu og öllum starfsmönnum þess, fyrr og síðar.“

Að lokum, nú sáu Varmársamtökin ástæðu til að birta bloggfærslur sem skrifaðar hafa verið undir hinum ýmsu nöfnum. Þar er þeim mikið í mun að reyna að tengja mig persónulega öllum þeim færslum vegna vináttu minnar við viðkomandi aðila. Varmársamtökunum hefur aldrei borist ein einasta athugasemd úr minni tölvu. Færslurnar sem samtökin tala um fóru ekki á þeirra síðu og umræddar færslur voru ekki á nokkurn hátt meiðandi eða dónalegar. Ég hef þegar gert kunnugt um færslur sonar míns og sé ekki ástæðu til að fara nánar út í það. Á mínu heimili eru þrjár tölvur og að þeim hafa aðgang fleiri en ég. 

Hvað gerist í tölvum vina minna eða út í bæ kemur mér ekkert við. Ég á sem betur fer marga vini og satt að segja kemur mér ekkert á óvart að þeir hafi reynt að taka upp hanskann fyrir mig og skrifað undir hinum ýmsu nöfnum. Mörgum af mínum nánustu var fullboðið sú framkoma sem ég hef þurft að sæta og jafnvel miklu fyrr en mér.

Aðaltalsmenn Varmársamtakanna hafa ítrekað gert sama hlut, skrifað undir hinum ýmsu nöfnum en  reyna nú að hvítþvo samtökin með því að segja að það hafi bara verið grín. 

Virðingarfyllst Karl Tómasson.