Össur Skarp plokkar hár

Össur Skarp plokkar eitt og eitt nefhár í hvert skipti sem einhver mætir í ræðupúlt alþingis til að gagnrýna inngöngu í ESB.

Það er greinilega sárt.

Vonandi á hann eftir að hreinsa þau öll.

Skemmtilegur og efnilegur drengur

Þessi gutti á framtíðina fyrir sér í trommuleik. Það er hægara sagt en gert að tromma af slíkum krafti með lagið á bandi og halda allan tíman dampi. 

Ég er samt sammála Simon að uppákoma sem þessi er ekki í sérstöku uppáhaldi hjá mér en hann hélt manni við efnið þessi.

Það verður gaman að fylgjast með Kieran Gaffney í framtíðinni, hann er ákveðinn í því að gerast trommari í fremstu röð. Hann virkar einnig vel jarðbundinn og það er gott veganesti.

Ræningjarnir

Hefði ekki verið nær að hefja bankið og djöfulganginn í búsáhöldin þegar það spurðist út að "snillingarnir miklu" fengu greiddar 300 eða 500 milljónir fyrir það eitt að hefja störf eða jafnvel enda í hinum "vel" reknu einka bönkum?

Nei, þá sváfum við öll á verðinum og jafnvel trúðum því að þarna færu miklir snillingar sem væru að koma landinu á spjöld sögunnar. Sannir útrásarvíkingar.

Við þessu varaði Ögmundur Jónasson margsinnis í ræðu og riti.

Nei, þá sváfum við öll á verðinum, ef til vill ræddum við flest þessi háu laun þessara "snillinga"  í tíu kaffinu daginn eftir og hneyksluðumst mikið á en svo varð það ekki söguna meir. Margir höfðu einnig trú á því að þessar launakröfur væru eðlilegar. Eins og við 300.000 Íslendingar gætum staðið undir þeim.

Síðan liðu mánuðurnir og allt hrundi og þá var byrjað að banka og djöflast og vissulega var betra seint en aldrei og þökk sé öllu því dugnaðar fólki sem lagði það á sig. Nú hefur þjóðin vaknað af þessum gengdarlausa velferðardraumi sem hefur sett okkur öll á hausinn.

Verra er að ræningjarnir sem stálu af okkur öllu hafa einnig skuldsett börnin okkar ef allt stefnir í sem horfir, sem voru með bleyju á meðan ránið stóð yfir.

Málið er, að þeir plötuðu okkur en ekki börnin okkar og óskandi er að þau þurfi ekki að gjalda græðginnar og spillingarinnar sem þeir viðhöfðu.

Við þurfum að sjá til þess að svo verði ekki.

Ræningjar á ferð

Látum skríða skarar,
skútan liggur í vari.
Eftir flóðið fjarar,
flugháll er blautur þari.
Veldur ei sá er varar,
verr þótt fari.

Einar Sigfússon

 

Umhverfis - og náttúrufræðifélag Mosfellsbæjar

Nú í vikunni opnaði Umhverfis - og náttúrufræðifélag Mosfellsbæjar heimasíðu.

http://www.umhverfisfelagmos.blog.is/blog/umhverfisfelagmos/

Félagið hefur staðið fyrir nokkrum fróðlegum og skemmtilegum fyrirlestrum og vettvangsferðum allt frá stofnun, nú síðast fyrir fuglaskoðun í Leiruvoginum.

Forsvarsmenn Umhverfis - og náttúrufræðifélags Mosfellsbæjar er allt þaul kunnugt fólk um náttúru og umhverfi Mosfellsbæjar og hefur í áratugi látið til sín taka á þeim vettvangi. 

Á síðu félagsins segir:

"UNM eru frjáls félagasamtök sem leggja áherslu á að umgangast náttúru og umhverfi með gát og fræðslu. Félagið var stofnað í Mosfellsbæ þann 21. mars 2007. Formaður félagsins er Guðjón Jensson og í stjórn félagsins sitja einnig Bjarki Bjarnason og Vigdís Pétursdóttir".

 

Wonderful

Lífleg og skemmtileg heimasíða Vinstri grænna í Mosfellsbæ

Vinstri græn í Mosfellsbæ halda úti líflegri og skemmtilegri heimasíðu undir öruggri ritstjórn Högna Snæs Haukssonar.

Á síðunni er hægt að lesa heilmargt skemmtilegt sem um er að vera í Mosfellsbæ. Slóðin er vgmos.is

Nú gefst öllum tækifæri á að senda skemmtilegar fréttir eða greinar inn á síðuna undir fullu nafni.

Endilega notið tækifærið og smellið inn grein eða skemmtilegri frétt.

Ég hvet alla áhugasama að skrá sig og taka þátt í starfinu okkar, það er um þessar mundir blómlegra en nokkru sinni fyrr.

Höfum áhrif og látum til okkar taka. Ef ekki nú, hvenær þá?

Bestu kveðjur frá Kalla Tomm.

Frábær umgjörð hjá Aftureldingu

Í kvöld var fyrsti heimaleikur Aftureldingar í meistaraflokki karla á þessu keppnistímabili að Varmá. Afturelding mætti öflugum Haukum sem verma efsta sætið í fyrstu deild.

Leikurinn var bráð skemmtilegur og endaði með sanngjörnu jafntefli 1-1.

Það sem upp úr stendur hjá mér eftir þennan fyrsta heimaleik er sú einstaklega skemmtilega umgjörð í kringum kappleikinn. Hún er ómetanleg sú vinna hjá öllu því góða fólki sem leggur svo hart að sér að gera veg félagsins sem mestan og bestan. Mér er til efs að þetta geti verið gert mikið betur. 

Það er sannkölluð fjölskylduskemmtun að koma á kappleik að Varmá.

Ég held einnig hreinlega, að Varmá sé að verða einn glæsilegasti knattspyrnuvöllur landsins, umlukinn gróðri og fellum og fjöllum í baksýn.

Ég skora á alla Mosfellinga að vera duglega að mæta á völlinn í sumar og styðja við bakið á knattspyrnufólkinu okkar í kvenna og karla knattspyrnunni.

 

Meistaraflokkur kvenna

Meistaraflokkur karla

 

Reiðtúrinn skemmtilegi

Um árabil hafa félagar úr Hestamannafélaginu Herði boðið bæjarstjórn Mosfellsbæjar, nefndarfólki og starfsmönnum í reiðtúr og er það alltaf jafn skemmtilegur dagur.

Í gær fórum við í bráðskemmtilega ferð með þeim félögum og enduðum svo daginn í skemmtilegri grillveislu.

Hér koma nokkrar myndir frá yndislegum og ógleymanlegum degi. 

 

Við ætlum að kíkja þangað í sumar

Eigið gleðilegt og gott sumar kæru vinir