Lýðræði eða ekki.

Aðalfundur Umhverfis- og náttúrufræðifélags Mosfellsbæjar sem haldinn var s.l. þriðjudag heppnaðist í alla staði mjög vel. Hann var í senn fróðlegur og skemmtilegur. Fyrirlestur Jóhanns Óla Hilmarssonar fuglafræðings og myndasýning var sérstaklega áhugaverð. Stjórn félagsins verður sú sama og undanfarið ár, skipuð þeim Guðjóni Jenssyni formanni, Vigdísi Pétursdóttur og Bjarka Bjarnasyni.

Framundan er nú öðru sinni aðalfundur Varmársamtakanna en flestum er kunnugt um hvernig fyrsta aðalfundinum lyktaði. Fyrir þann fund var skorað á fólk að gefa kost á sér í framboð og til stjórnarsetu og skilaði sú áskorun árangri. Dæmi voru um talsverðan undirbúning á meðal þeirra sem gáfu kost á sér. Þegar komið var að liðnum um kosningu til stjórnar var sá hluti fundarins, öllum að óvörum, blásinn af . Í kjölfarið leystist fundurinn upp og að sögn fundargesta olli sú afgreiðsla bæði hneykslan og vonbrigðum.

Nú er spurning hvort lýðræðið fái að njóta vafans í annarri tilraun Varmársamtakanna. Það er engan veginn Varmársamtökunum til framdráttar sem hafa endalaust hamrað á ólýðræðislegum vinnubrögðum hjá bæjaryfirvöldum Mosfellsbæjar í fjölmiðlum og á hvaða vettvangi sem er, að láta slík vinnubrögð spyrjast út um sig.

Það má líka spyrja sig hvort í raun lýðræði sé fólgið í því að láta fámennan hóp fólks, sem virðist hafa flest á hornum sér gagnvart bæjarfélaginu og framkvæmdum því tengdu, sama hvort um veglagningar er að ræða, lagningu nýs knattspyrnuvallar, lagningu göngustíga eða hönnun og framkvæmdir við nýtt miðbæjartorg svo eitthvað sé nefnt, bitna á þorra bæjarbúa, ekki einungis með neikvæðum skrifum heldur einnig með kærum og málaferlum. Slíkt kostar bæjarfélagið og þegna þess óhemju fjármuni. Þess vegna er það afar mikilvægt að ígrunda  alltaf vel  forsendur og tilgang slíkra málaleitanna. 

Hann hafði því miður lítið upp úr krafsinu

Fín lending hjá Krumma.

Best að athuga hvað er í boði.

Óttalegt pokadrasl er þetta.

Best að hreinsa svolítið til. Það er örugglega eitthvert góðgæti hérna.

Óttalega er erfitt að komast að þessu.

Taktu þá eina mynd og vertu fljótur.

Þarna er eitthvað girnilegt, best að fara þangað.

Umhverfis- og náttúrufræðifélag Mosfellsbæjar

Fyrir ári síðan var haldinn stofnfundur Umhverfis- og náttúrufræðifélags Mosfellsbæjar. Aðal forsprakki að stofnun félagsins og núverandi formaður  er Guðjón Jensson en hann hefur um árabil sýnt umhverfismálum mikinn áhuga.  Af einurð, dugnaði og með sanngirni í skrifum sínum og málflutningi hefur hann opnað augu margra til að átta sig á því sem betur má fara í umhverfinu. Með Guðjóni í stjórn Umhverfis- og náttúrufræðifélags Mosfellsbæjar eru þau: Bjarki Bjarnason og Vigdís Pétursdóttir. 

Aðalfundur samtakanna verður haldinn á morgunn, þriðjudag 29.apríl í Listasal Bókasafns Mosfellsbæjar og hefst kl.17.30. Rétt er að skora á sem flesta að mæta.

Eftir venjuleg aðalfundarstörf heldur Jóhann Óli Hilmarsson erindi um fuglalíf í Mosfellsbæ og fyrirhugað fuglaskoðunarhús sem til stendur að reisa við Leiruvog. Jóhann Óli er m.a. höfundur umhverfismatsskýrslna sem tengjast fuglum og Mosfellsbæ. Skoða má þær á heimasíðu Mosfellsbæjar. 

Að lokum vil ég að gamni benda á fróðlegt og skemmtilegt viðtal við Guðjón Jensson á leirvogstunga.is

Moli flugustrákur

Frændi minn og móðurbróðir Ragnar Lár, teiknari og blaðamaður sem lést nýlega eftir erfið veikindi var óborganlegur lífskúnstner og húmoristi. Hann skapaði m.a. nokkrar skemmtilegar teiknimyndafígúrur. Ein þeirra var Moli flugustrákur.

Um Mola komu út nokkrar bráðskemmtilegar bækur sem ég las spjaldanna á milli og hef gert fyrir börnin mín. Myndirnar í bókunum eru frábærar, í einfaldleika sínum segja þær svo miklu meira en mörg orð eins og auðvitað góðum barnabókum sæmir. Á myndirnar gat maður horft tímunum saman og bókstaflega dottið inn í atburðarásina.

Moli átti góðan vin sem hét Jói járnsmiður. Jói passaði alltaf vel upp á Mola litla flugustrák og þá sérstaklega fyrir Köngul kónguló sem vildi óspart ná Mola í vefinn sinn.

Ég held að þessar bækur séu ekki fáanlegar í dag en eflaust eru þær til á bókasöfnum.

Ég mæli með Mola flugustrák hann er skemmtilegur og góður. 

Ísbirnir og hundar að leik

Í fréttum í kvöld koma fram að stofn ísbjarna telji aðeins um 25.000.- dýr. Ég má til að setja hér inn skemmtilegt myndbrot af hundum og ísbjörnum að leik.

 

Látum lofta bloggarar

Ekki það að ég sé sérstakur fagmaður í uppsetningu, það er öðru nær. þetta á bara að vera góðlátleg ábending til félaga minna í bloggheimum. Ábending sem góður vinur minn og fagmaður mikill ráðlagði mér fyrir mörgum árum þegar ég fékkst við blaðamennsku.

Láta lofta, láta lofta, það er málið. þá er textinn auðlesanlegri og mun líklegra að hann fái lesningu.

Eins og þið sjáið í textanum hér að neðan að þá loftar hann ekkert og  virkar fyrir vikið hreinlega sem ein klessa.

 

Fjölærar lúpínutegundir hafa verið notaðar sem áburðargjafar í skógrækt erlendis (Gadgil 1971; Mikola o.fl. 1983; Sprent og Sprent 1990). Lúpína hefur, einkum á síðari árum, verið notuð sem hjálpartegund í trjárækt hér á landi. Lítið er þó til af gögnum sem sýna áhrif lúpínunnar á trjáplönturnar. Athuganir Þrastar Eysteinssonar og nemenda hans á vexti sitkagrenis með og án lúpínu sýndu þó að grenið óx yfirleitt betur þar sem lúpína er allsráðandi í undirgróðri en þar sem áhrifa hennar gætir ekki (Þröstur Eysteinsson 1988). Birki er mikið notað í landgræðsluskógrækt og hefur verið önnur algengasta tegundin í íslenskri skógrækt síðustu 50 ár (Jón Geir Pétursson 1999). Birkifræ eru smá og plönturnar eru viðkvæmar fyrir samkeppni frá öðrum gróðri fyrstu árin (Miles og Kinnaird 1979; Pigott 1983; Sigurður H. Magnússon og Borgþór Magnússon 1990; Ása L. Aradóttir 1991; Guðmundur Halldórsson o.fl. 1999). Því gæti birki átt erfitt með að komast á legg í lúpínubreiðum, einkum upp af fræi. Ungar trjáplöntur eiga að öllum líkindum erfiðara uppdráttar í lúpínubreiðum eftir því sem lúpínan er þéttari og hærri. Á fyrsta ári mynda lúpínuplönturnar einn stöngul og ná um 10 cm hæð en á þriðja ári hafa þær myndað 3-5 stöngla og ná um 60 cm hæð. Plönturnar halda svo áfram að fjölga stönglum og stækka framan af ævinni og getur fullvaxin, meðalstór planta haft 30 stöngla og náð yfir 120 cm hæð í lok sumars (Borgþór Magnússon o.fl. 1995; Borgþór Magnússon 1999). Því hækka lúpínubreiður og þéttast meðan plönturnar í þeim eru að ná fullum þroska. Einnig er stærð lúpínuplantna og þéttleiki lúpínubreiðanna háð skilyrðum á vaxtarstað (Borgþór Magnússon o.fl. 1995). Áhrif lúpínunnar á trjáplönturnar hljóta því að vera háð aldri lúpínunnar og vaxtarskilyrðum. Lúpínan er einnig viðkvæm fyrir slætti á ákveðnu þroskastigi og hafa tilraunir sýnt að sláttur á tímabilinu frá miðjum júní og fram yfir miðjan júlí veldur miklum afföllum á lúpínuplöntum og dregur mjög úr stönglafjölda og hæð þeirra plantna sem eftir lifa (Bjarni Diðrik Sigurðsson o.fl. 1995; Borgþór Magnússon 1999). Þetta bendir til þess að nota megi slátt til að draga kraft úr lúpínunni og þannig auka uppvaxtarlíkur birkis í lúpínubreiðum. Árið 1995 hófust rannsóknir er miðuðu að því að kanna áhrif lúpínu á landnám birkis og finna hagkvæmar leiðir til að koma birki á legg í lúpínubreiðum. Verkefnið var unnið í samstarfi Rannsóknastöðvar Skógræktar ríkisins á Mógilsá, Landgræðslu ríkisins og Rannsóknastofnunar landbúnaðarins. Rannsóknirnar fólust m.a. í tilraunum þar sem eftirfarandi vinnutilgátur voru prófaðar: Líkur á að birki komist á legg eru meiri eftir því sem lúpínubreiður eru gisnari. Þar sem þétt-leiki lúpínubreiðanna ræðst m.a. af aldri þeirra og vaxtarskilyrðum eru meiri líkur á að birki komist á legg eftir því sem lúpínan er yngri en minni eftir því sem vaxtarskilyrði henta lúpínunni betur. Hægt er að auka líkur á að birki komist á legg í lúpínubreiðum með því að slá lúpínuna, plægja hana niður eða opna breiðurnar á annan hátt. Hér á eftir verður greint frekar frá tilraununum og nokkrum helstu niðurstöðum þeirra.

"Mannhetjurnar í dýraríkinu"

Alltaf jafn flott og fín

Skólahljómsveit Mosfellsbæjar hefur nú í 44 ár verið ein af sannkölluðum skrautfjöðrum okkar Mosfellinga. Hljómsveitin, sem hélt sína fyrstu tónleika þann 17. júní 1964 við vígslu Varmárlaugar, hefur frá þeim tíma verið órjúfanlegur partur af menningu okkar Mosfellinga.

Stofnandi hljómsveitarinnar og stjórnandi allt til ársins 2004 eða í 40 ár var Birgir D. Sveinsson, við starfi hans tók þá, fyrrum félagi hljómsveitarinnar, Mosfellingurinn og básúnuleikarinn góðkunni, Daði Þór Einarsson. 

Undir stjórn og leiðsögn Birgis í 40 ár og nú Daða ásamt fjöldanum öllum af framúrskarandi kennurum hefur verið haldið úti í bæjarfélaginu ómetanlegu starfi sem seint verður full þakkað.

Þess má að gamni geta að þó nokkrir félagar Skólahljómsveitarinnar hafa gert tónlist að sínu aðal starfi og verið áberandi sem slíkir.

Ástæða þess að ég skrifa þetta núna er einfaldlega sú að ég var að skoða gamlar myndir og rak augun í mynd sem ég tók af hluta Skólahljómsveitarinnar í tilefni af 40 ára afmælinu. Myndina vildi Birgir endilega að ég tæki við minnisvarða sem stendur á skólalóð Varmárskóla og er til minningar um ömmu Kristínu og afa Lárus skólastjóra á Brúarlandi. Mér þótti sérstaklega vænt um þetta hjá Birgi og sagði þetta mér meira en mörg orð um hug hans til gömlu áranna í Brúarlandi.

Einnig er ástæðan sú að ég fékk hringingu frá góðum frænda mínum sem vildi vita hvort ég ætti til einhverjar skemmtilegar myndir til að setja á heimasíðu í tilefni þess að við ætlum að hittast öll frændsystkinin frá Brúarlandi í sumar.  

Birgir var kennari í Brúarlandsskóla hjá afa Lárusi og þar lágu leiðir hans og pabba saman. Birgir og pabbi unnu náið saman í rúma tvo áratugi ásamt því að vera næstu nágrannar í Markholti og Lágholti. Um tíma var nærri helmingur lúðrasveitarinnar skipaður barnabörnum afa og ömmu og höfum við bræðurnir fimm m.a. átt góð ár í lúðrasveitinni hjá Birgi. 

 

Gryfjurnar gróa

Í hressilegum göngutúr upp í Mosfellsdal sá ég hvernig gryfjurnar fyrir neðan Ásana fyllast nú óðum. Þessar gryfjur hafa verið sérlega hvimleiðar og ljótar og oft blásið hressilega upp úr þeim. Efnið sem notað hefur verið til að fylla gryfjurnar er fengið úr landi Helgafells þar sem þar rís nú brátt byggð. Að lokinni uppfyllingu verður svo sáð og gróðursett og því ekki langt að bíða eftir fallegu og grónu landsvæði.

 

Bömmerinn hans Bubba

Eins og ég fíla kallinn hann Bubba, afhverju eyðilagði hann þátt sinn svo yfirlýsingaglaður í síðasta þætti? Hann kunngerði úrslitin þá. 

Hvernig dettur Birni Jörundi, þeim bráðvelgefna og skemmtilega manni í hug að halda því fram að góður söngvari þurfi að geta spannað upp og niður tónskalann til að geta talist góður söngvari?

Það sem góður söngvari þarf til að bera er góð söngrödd, næmni fyrir tónlist og lagvissa. Hversu hátt eða lágt hann kemst er algert aukaatriði.