Þá var komið að Ljósvakaleysingjum

 

Plötuna hljóðrituðum við árið 1990 og eins og hinar þrjár fyrri í Stúdíó Stemmu hjá Didda fiðlu. Við félagarnir fengum til aðstoðar við upptöku hljómplötunnar gítarleikarann og rokkarann mikla, Guðlaug Falk. Hann gekk að upptökum loknum til liðs við Gildruna og starfaði með, í rúm tvö ár. Guðlaugur er frábær rokkgítarleikari og góður drengur sem hefur aldrei vikið frá uppruna sínum í rokkinu og gefið út nokkrar sólóplötur.

Þessi hljómplata markaði að vissu leyti tímamót hjá Gildrunni. Hún var gefin út bæði á vínil og cd og seldist geisladiskurinn upp á augabragði og er ófáanlegur í dag. Eftirspurn eftir hljómsveitinni varð einnig meiri en við höfðum átt að venjast.

Eins tókum við á þessari hljómplötu í fyrsta skipti upp á því að útsetja og flytja lag sem var ekki eftir okkur sjálfa. Lag sem átti eftir að reynast óhemju vinsælt og verða að ákveðnu leyti vörumerki hljómsveitarinnar. 

Aðdragandi þess var sá, að Guðmundur Þórarinsson, betur þekktur sem Mummi í Mótorsmiðjunni, var að vinna að gerð stuttmyndar með Rósu Ingólfs í aðalhlutverki og fór þess á leit við okkur að flytja titillag myndarinnar, Vorkvöld í Reykjavík og setja það í okkar búning. Gamla útgáfa Ragga Bjarna var flutt í upphafi myndarinnar og okkar útgáfa á laginu í lok myndarinnar. Þetta var skemmtilegt ævintýri. Annað lag á plötunni eftir Bigga, Andvökunætur, gerði það einnig gott og naut alltaf vinsælda á tónleikum okkar.

Platan eins og þær fyrri fékk mjög góða dóma og mér til mikillar ánægju kaus Morgunblaðið þetta eitt af flottustu plötualbúmum þess árs. Hugmynd mín á bakvið það, var að búa til einskonar línurit t.d. um vinsældir útvarpsstöðva eins og nafn plötunnar vitnar m.a. til. Úr línuritinu útbjó ég ýkta prófíl mynd af okkur félögunum þrem.

 

Hér kemur plötudómur Mbl (Andrésar Magnússonar)

Fimmtudaginn 10. janúar, 1991 - Tónlist

Ljósvakagildran

Hljómplötur Andrés Magnússon

Ljósvakagildran Hljómplötur Andrés Magnússon Gagnrýnandi hefur aldrei skilið hvers vegna Gildran hefur ekki "meikað það" á öldum ljósvakans. Og reyndar botna hljómsveitarmeðlimir hennar ekki í því sjálfir. Þaðan er nafn nýjustu plötu Gildrunnar, Ljósvakaleysingjarnir, fengið.

Gildran á sér tryggan aðdáenda hóp og miðað við aðsókn að tónleikum þeirra þarf hljómsveitin ekki að kvarta. Gildran hefur ekki hikað við að leika hressilegt rokk og ról fram að þessu, og bregst ekki nú frekar en endranær. Samt sem áður hefur melódían alltaf ráðið ferðinni og er í heiðurssæti hér.

Það er beinlínis þakkarvert hvað Gildran hefur þraukað þrátt fyrir afskiptaleysi ýmissa útvarpsstöðva. Hljómsveitin lætur dægurflugna höfðingja ekki stjórna sér og fyrir vikið er meiri breidd í íslensku poppi en ella. Án slíkra hljómsveita kæmi ekkert út þessi jól nema Rokklingarnir og Sléttuvarúlfarnir.

Gildran er skipuð þeim Birgi Haraldssyni, söngvara og gítarleikara, Karli Tómassyni, trumbuleikara, og Þórhalli Árnasyni, bassaleikara. Sér til fulltingis hafa þeir gítarleikarann Guðlaug Falk.

Birgir hefur gríðarlega kraftmikla og sérstæða rödd, sem hann beitir óspart. Mér finnst Karl reyndar ekki njóta sín jafnvel á plötunni og gerist á tónleikum, hann virðist halda aftur af sér og lætur nægja að vera á þungum skriði. Þórhallur er sérkapítuli, en að mínu viti er hann einn smekklegasti bassaleikari landsins. Hann sýnir margvísleg tilþrif á bassann, en fellir þau svo að lögunum að engin misfella verður á. Það getur hver sem er þjösnast á bassanum og leikið hraðar runur, en þetta er vandi.

Guðlaugur Falk er Gildrunni góð ur liðsauki. Hann er mjög lunkinn gítarleikari og gefur hljómsveitinni mjög góða fyllingu, sem hana hefur stundum skort. Flestir taka vafa laust eftir gítarsólóum hans, sem vissulega eru meiriháttar (taka mið af ekki minni foringjum en Eddie Van Halen og Stevie Vai), en mér finnst undirleikurinn jafnvel enn meiri snilld. Í lagi eins og Stundum gæðir hann það nýju lífi með "undir spils-riffi".

Ljósvakasnúðar hafa enga afsökun fyrir því að leika þessa plötu Gildrunnar ekki. Á henni er sandur af góðum lögum, sem vel falla að útvarpi. Sem dæmi má nefna Mín eina von, Stundum, Andvökunætur og blúsinn Játning. Vilji menn frekar hugljúfar ballöður eru þarna lög eins og Það sem var og Tregi, sem er alveg stórfallegt.

Satt best að segja er hið eina sem finna má að Ljósvakaleysingjunum að þar er ekki að finna yfirburða lagsmíð á borð við Mærina, sem kom út á Hugarfóstri. Þó má segja að Tregi sé af svipuðu kalíberi. Á þessari plötu er það hins vegar hressilegt rokk, sem er í aðalhlut verki, svo um það er ekki að fást. Þá ber að geta sérlega vel hannaðs umslags, sem er með því betra um þessi jól. Þessi plata fær fjórar stjörnur af fimm mögulegum.

Athugasemdir

[Jóna Á. Gísladóttir, 4.8.2008 kl. 22:00]

ert þú þessi í miðið?

Flott saga, albúm... hvar er lagið?

[Karl Tómasson, 4.8.2008 kl. 22:51]

Ég er þessi lengst til vinstri Jóna mín. Alltaf lengst til vinstri, ha, ha, ha!!!

Lagið Andvökunætur er í spilaranum hjá mér, Vorkvöldinu þarf ég endilega einnig að koma þangað.

Bestu kveðjur frá Kalla Tomm úr Mosó.

[Jóna Á. Gísladóttir, 4.8.2008 kl. 22:54]

Ekki finnst mér þú nú svona nefhvassur..  

og já, settu lagið endilega í spilarann.

[Kristján Kristjánsson, 5.8.2008 kl. 00:30]

Gulli er flottur gítarleikari og synd að þessi plata skuli ekki vera fáanleg. Það er kominn tími á endurútgáfu á þessum gripum. Engin spurning!

[Steinn Skaptason (IP-tala skráð) 5.8.2008 kl. 02:10]

Sammála, kominn tími til að endurútgefa allt með Gildrunni + aukaefni í góðum kassa !

[Jón Svavarsson, 6.8.2008 kl. 11:59]

Gildran er góð, en bara innlitskvittun, kær kveðja Jón

[Steinn Skaptason (IP-tala skráð) 6.8.2008 kl. 20:49]

Það rifjaðist upp fyrir mér að sumarið 1990 eða 1991 var ég staddur í nokkura fallega daga í sumarbústaðnum RJÓÐRI í Mosfellssveit, starfs míns vegna. Þegar ég fletti í og skoðaði gestabókina að þá komst ég að því að hljómsveitin Gildran hafði haft þar vetursetu í nokkura vetur og unnið þar að efni sem var á tveimur fyrstu hljómplötum hljómsveitarinnar "Huldumenn" frá 1987 og "Hugarfóstur" frá 1988. Þegar í bæinn kom að þá keypti ég mér þessar báðar hljómplötur og líkaði vel, þegar maður rýndi í textanna á þeim báðum, sérstaklega á þeirri fyrri og eitthvað á þeirri seinni, að þá skynjaði ég sterk áhrif frá umhverfinu í textum hljómsveitarinnar, allt fínir textar, allt nokkuð góð lög og hljómsveitin góð. Þannig hef ég alltaf tengt Gildruna við RJÓÐUR í Mosfellssveit og umhverfið þar. Reyndar sá ég forvera Gildrunnar, hljómsveitina Pass í Tónabæ árið 1982 í góðu stuði, mikið vatn hafði runnið til sjávar þegar ég sá þetta band aftur nokkurum árum síðar sem eðalhljómsveitin Gildran. 

P.S - ég á vel með farið aukaeintak af vínilhljómplötunni "Hugarfóstur" með Gildrunni í skiptum fyrir aðrar Gildruhljómplötur í vonandi þokkalegu standi, ef einhver hefur áhuga. Tildæmis "Huldumenn" eða "Prjónabandsplötuna" sem mig minnir að hafi heitið einfaldlega "Gildran", eru vel þegnar. 

[HP Foss, 7.8.2008 kl. 10:21]

Þú þarft að laga höfundarmyndina. það varð bilun um daginn á Blog.is og sennilega er þar komin skýringin á litla bróður Tarzans á höfundarmyndinni hjá þér.

venlig hilsen
HP Fors

[Hulda Bergrós Stefánsdóttir, 7.8.2008 kl. 12:27]

Gleðifréttir rafvirkinn er búin að fá allar vinylplötur Gildrunnar í hús, sonur okkar á svo einstaka tengdaforeldra

[Kjartan Pálmarsson, 7.8.2008 kl. 22:39]

Gildran fékk 4.mín og 37.sek á Voice FM 98,7 á Akureyri s.l. Sunnudag, einhvertíma milli kl.18 og 20.